‘বিজেপি চৰকাৰ সলনিৰ লগে লগে বাতিল হ’ব ৱাকফ আইন’, মমতা বেনাৰ্জী
ৰাজপথৰ পৰা আৰম্ভ কৰি উচ্চতম ন্যায়ালয়লৈকে বৰ্তমানে দেশজুৰি ৱাকফ আইনৰ বিৰুদ্ধে প্ৰতিবাদ চলি আছে। আটাইতকৈ ডাঙৰ সংগ্ৰাম দেখা গৈছে মমতা বেনাৰ্জীৰ পশ্চিম বংগত। মুখ্যমন্ত্ৰী মমতা বেনাৰ্জীয়েও ৱাকফ আইনৰ বিৰুদ্ধে ফ্ৰণ্ট মুকলি কৰিছে।
আজি ১৬ এপ্ৰিল তাৰিখে কলকাতাৰ নেতাজী ইনড’ৰ ষ্টেডিয়ামত উপস্থিত হৈ মুখ্যমন্ত্ৰী মমতাই মুছলমান ধৰ্মগুৰু আৰু ইমামসকলক সাক্ষাৎ কৰে। এই সময়ত মমতাই ইমামসকলক ৱাকফ আইন সম্পৰ্কেও সম্বোধন কৰে। মমতাই কয় যে বংগক বদনাম কৰা হৈছে।
য’ত হিংসা সংঘটিত হৈছিল তাত কংগ্ৰেছৰ আসন আছে। ভাৰতীয় জনতা পাৰ্টিক ক্ষমতাৰ পৰা উচ্ছেদ কৰাৰ লগে লগে ৱাকফ সংশোধনী আইন বাতিল কৰা হ’ব বুলিও ক্ষোভ উজাৰে মুখ্যমন্ত্ৰী মমতাই।
মমতা বেনাৰ্জীয়ে কয় যে ইউ পি আৰু বিহাৰৰ ভিডিঅ’ দেখুৱাই বংগক বদনাম কৰা হৈছে। ভুৱা বাতৰি বিয়পি পৰিছে। বিজেপিয়ে ভুৱা ভিডিঅ’ দেখুৱাই বদনাম কৰিছে।
মমতাই ইমামসকলৰ সৈতে ৱাকফ আইন সন্দৰ্ভত ভৱিষ্যতৰ কৌশল সম্পৰ্কে আলোচনা কৰে, য’ত অল ইণ্ডিয়া মুছলিম পাৰ্চনেল ল ব’ৰ্ডৰ সভাপতি ছাইফুল্লাহ ৰহমানী, এআইএমপিএলবিৰ সাধাৰণ সম্পাদক ফজলুৰ ৰহিম মুজাদ্দিনী আৰু কলকাতাৰ মেয়ৰ ফিৰহাদ হাকিমকে ধৰি বহু মুছলমান ধৰ্মীয় নেতা আৰু ইমাম উপস্থিত থাকে।
মমতা বেনাৰ্জীয়ে হুংকাৰ কৰি কয় যে, পশ্চিমবংগত ৱাকফ আইন কাৰ্যকৰী কৰিবলৈ দিয়া নহ’ব। পশ্চিম বংগত ৱাকফ আইনৰ বিৰুদ্ধে ব্যাপক প্ৰতিবাদ। ৰাজপথত প্ৰতিবাদ সাব্যস্ত কৰিছে বহু মুছলমান সম্প্ৰদায়ৰ লোকে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
