অসম লাইভ ২৪ঃ ‘মই বোৱাৰীক বোৱাৰী হিচাপে ৰখা নাছিলো, তাইক নিজৰ ছোৱালীৰ দৰে ৰাখিছিলো৷ আমি বোৱাৰী হিচাপে কোনোদিনে ভবাই নাছিলো৷ ময়ো এদিন ছোৱালী আছিলো, তাৰ পাছত বোৱাৰী হ’লো আৰু এতিয়া শাহু হ’লো৷ গতিকে বোৱাৰীৰ মনৰ বেদনা বুজি পাওঁ৷ তাই যাতে চিৰজীৱন বিধৱাৰ সাজ পিন্ধি থাকিব নালাগে, তাইক মই আকৌ বোৱাৰী কৰি ল’লো৷’— এয়া এগৰাকী শাহুৱে কোৱা কথা৷
দৰাচলতে মঙলদৈৰ পৰাগ নগৰৰ জুলা চলিহা আৰু বংশীধৰ চলিহাৰ প্ৰথম পুত্ৰ বিগত জানুৱাৰী কোভিডত আক্ৰান্ত হৈ মৃত্যুক সাৱটিছিল৷ ২০১৫ চনত বিবাহপাশত আবদ্ধ হোৱা পুত্ৰৰ মৃত্যুৰ পিছত বিধৱা হৈ পৰিছিল পত্নী৷ কিন্তু শোকত ভাগি পৰা শাহু-শহুৰে তাইক মাকৰ ঘৰলৈ যাবলৈ নিদি নিজৰ ছোৱালীৰ দৰে ৰাখিলে৷ পুত্ৰশোকৰ লগতে ফুলকুমলীয়া বোৱাৰীৰ চিন্তাই ব্যথিত কৰিছিল শাহু-শহুৰক৷
শেষত শাহু জুলা চলিহা আৰু শহুৰ বংশীধৰ চলিহাই আলোচনা কৰি সৰু পুত্ৰৰ সৈতে বিয়া পাতি দি বোৱাৰীক বোৱাৰী হিচাপেই ৰখাৰ সিদ্ধান্ত ল’লে৷ সেই অনুসৰি বোৱাৰী বন্দনা চলিহাৰ সৈতে আলোচনা কৰাত বোৱাৰীয়েকে সন্মতি দিলে৷ তাৰ পিছত বৌয়েকৰ সৈতে বিয়া সন্দৰ্ভত সৰু পুত্ৰ মুন্নাক প্ৰস্তাৱ দিয়াত পুত্ৰয়ো সন্মতি দিলে৷ দুয়োৰে সন্মতিৰ পিছত শাহু-শহুৰে সমাজৰ দুই-চাৰিজনৰ লগতে আলোচনা কৰে৷ আৰু তেওঁলোকেও সন্মতি জনোৱাত দুয়োৰে বিবাহৰ সম্পন্নৰ বাবে সাজু হয়৷ সেই অনুসৰি সনাতন ধৰ্ম সভাৰ প্ৰাংগণৰ বিষ্ণু মন্দিৰত উদুলি-মুদুলি পৰিৱেশ৷ ভগৱানক সাক্ষী কৰি সম্পন্ন হয় দুয়োৰে বিবাহ৷ এক নতুন জীৱন আৰম্ভ কৰে বন্দনা আৰু মুন্নাই৷ সকলোৱে আশীৰ্বাদ দিছে দুয়োৰে সংসাৰ সুখময় হওক৷
ইপিনে যিটো সময়ত শাহু-বোৱাৰীৰ সংঘাতে বাতৰিৰ শিৰোনাম দখল কৰে, তেনে সময়তে বোৱাৰীক লৈ শাহু-শহুৰৰ এই কৰ্মই সমাজলৈ কঢ়িয়াইছে এক ইতিবাচক বাৰ্তা৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ