আকৌ এক বিবাহ বিচ্ছেদৰ খবৰ৷ অলিম্পিক পদক বিজয়ী আৰু বক্সিং আইকন মেৰি কমৰ ব্যক্তিগত জীৱন এতিয়া আৰু পূৰ্বৰ দৰে ৰঙীন নহয়৷ একাধিক সূত্ৰই নিশ্চিত কৰিছে যে মেৰি কম আৰু তেওঁৰ স্বামী কৰুং ওঙ্খালাৰ মাজত বিচ্ছেদ ঘটিছে৷ অৰ্থাৎ দুয়োৰে বিবাহবিচ্ছেদ হৈছে৷
প্ৰেম আৰু এজনে আনজনৰ প্ৰেৰণা বুলি বিভিন্ন ইণ্টাৰভিউত মেৰিকমে কৈ আহিছিল৷ সেই দম্পত্তিয়েই এতিয়া পৃথকে থকাৰ সিদ্ধান্ত ল’লে৷ ২০২২ চনৰ মনিপুৰ বিধানসভা নিৰ্বাচনত ওঙ্খেলাৰৰ ব্যৰ্থতাৰ পাছৰে পৰাই মেৰি আৰু ওঙ্খেলাৰে পৃথকে আছে৷ সূত্ৰৰ খবৰ অনুসৰি মেৰিয়ে তেওঁলোকৰ চাৰি সন্তানক লৈ ফৰিদাবাদলৈ একেবাৰেই যাত্ৰা কৰিছে৷ অন্যহাতে ওঙ্খেলাৰে তেওঁৰ পৰিয়ালৰ সদস্যৰ সৈতে দিল্লীত বসবাস কৰে৷ দম্পত্তিৰ এক ঘনিষ্ঠ সূত্ৰই হিন্দুস্তান টাইমছক জনাইছে যে নিৰ্বাচনৰ পাছতেই তেওঁলোকৰ মাজত মতবিৰোধ আৰম্ভ হৈছিল৷ সেই মতবিৰোধ পাছলৈ তীব্ৰ হৈ উঠে৷ নিৰ্বাচনী প্ৰচাৰৰ নামত মেৰিৰ স্বামীয়ে প্ৰায় ২-৩ কোটি আৰ্থিক ক্ষতিও কৰিছিল৷ ইয়াৰপাছতো তেওঁ পৰাজয় বৰণ কৰা কথাটো মেৰিয়ে সহজভাৱে ল’ব পৰা নাছিল৷
পদ্মভূষণ বঁটাৰে সন্মানিত বক্সাৰ মেৰি ২০১৬ চনত সংসদলৈকো নিৰ্বাচিত হৈছিল৷ আৰু এক আভ্যন্তৰীণ সূত্ৰই দাবী কৰিছে যে ওঙ্খেলাৰে প্ৰথমভাগত ৰাজনীতিত প্ৰৱেশ কৰিবলৈ অনিচ্ছুক আছিল৷ ৰাজনীতিত প্ৰবেশ কৰোৱাটোও মেৰিৰেই পৰিকল্পনা আছিল৷ ওঙ্খেলাৰে নিৰ্বাচনো মেৰিৰ জোৰতেই খেলিছিল৷ মনিপুৰৰ ৰাজনৈতিক অস্থিৰ পৰিস্থিতিত তেওঁ ৰাজনীতিত নামিবই খোজা নাছিল৷ কিন্তু পত্নীৰ কথা পেলাব নোৱাৰি আগবাঢ়ে ওঙ্খেলাৰ৷কিন্তু নিৰ্বাচনত ভাল ফলাফল দেখুৱাব নোৱাৰিলে৷ যাক লৈ অতিষ্ট হৈ পৰে পত্নী মেৰি৷ অৱশ্যে মেৰিয়ে এই ঘটনাক লৈ বা বিচ্ছেদক লৈ বৰ্তমানলৈকো কোনো বিবৃত্তি প্ৰকাশ কৰা নাই৷ বক্সিং দুনীয়াৰ একাংশ লোকে অৱশ্যে মেৰিৰ অন্য পুৰুষৰ সৈতে সম্পৰ্ক থকা বুলিও দাবী উত্থাপন কৰিছে৷
নাম প্ৰকাশত অনিচ্ছুক এগৰাকী বক্সাৰৰ মত, ‘মেৰিকম আৰু ওঙ্খেলাৰ বিচ্ছেদৰ গুঞ্জৰ কেৱল গুঞ্জৰেই নহব পাৰে৷ মেৰিৰ অৱশ্যে অন্য এগৰাকী বক্সাৰৰ স্বামীৰ সৈতে ঘনিষ্ঠ সম্পৰ্ক আছে৷ সেই ব্যক্তিক মেৰিয়ে তেঁওৰ ইনষ্টাগ্ৰাম পোষ্টসমূহত ব্যৱসায়িক অংশীদাৰ হিচাপে উপস্থাপন কৰি আহিছে৷’
মেৰিকম আৰু কৰুং ওঙ্খেলাৰ প্ৰেম কাহিনী
বিভিন্ন সূত্ৰই প্ৰকাশ কৰা প্ৰতিবেদন মতে মেৰি আৰু ওঙ্খেলাৰৰ প্ৰেমকাহিনী আৰম্ভ হৈছিল দিল্লীতেই৷ ২০০০ চনত তেতিয়া দিল্লী বিশ্ববিদ্যালয়ৰ আইন বিভাগৰ ছাত্ৰ আছিল ওঙ্খেলাৰ৷ ওঙ্খেলাৰে এক প্ৰতিযোগিতাত যোৱাৰ পথত মেৰিৰ হেৰুওৱা বেগ বিচৰাত সহায় কৰিছিল৷
২০০৫ চনত তেওঁলোক দুয়ো বিবাহপাশত আৱদ্ধ হয়৷ ২০০৭চনত দুয়ো যমজ সন্তানৰ পিতৃ মাতৃ হয়৷ ২০১৩ চনত আৰু এটি পুত্ৰসন্তানৰ জন্ম হয়৷ ২০১৮ চনত তেওঁলোকে এগৰাকী কন্যা সন্তান দত্তক লয়৷ কাৰণ মেৰিয়ে এগৰাকী কন্যা সন্তানৰ মাতৃ হোৱাৰ হেঁপাহ পুঁহি ৰাখিছিল মনত৷ সন্তানকেইটিৰ লালন পালনৰ বাবেই ওঙ্খেলাৰে তেওঁৰ ফুটবল কেৰিয়াৰ ত্যাগ কৰিছিল৷
এগৰাকী উদ্যমী বক্সাৰ মেৰি দেশৰ অন্যতম আইকন৷ যাৰ নামত ৬ টা বিশ্ব চেম্পিয়নছিপ আৰু এটা অলিম্পিক ব্ৰঞ্জ পদক আছে৷ তেওঁ প্ৰায় প্ৰতিসময়তে এই সফলতাৰ আঁৰত স্বামীৰ হাত থকাৰ কথাও কৈ আহিছিল৷ সেই মেৰিয়েই তেওঁৰ স্বামীক বিচ্ছেদ দিলে নেকি সেয়াহে এতিয়া বহুতৰে মনত ডাঙৰ প্ৰশ্ন৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
