ফটকা কাৰখানাত ভয়ংকৰ বিস্ফোৰণ, ৬ শ্ৰমিক নিহত, অন্য ১২ শ্ৰমিকৰ অৱস্থা সংকটজনক
উত্তৰ প্ৰদেশৰ আমৰোহাত সংঘটিত হৈছে এক ভয়ংকৰ বিস্ফোৰণৰ ঘটনা। আমৰোহাস্থিত এটা ফটকা ফেক্টৰীত সংঘটিত হোৱা এই বিস্ফোৰণত ঘটনাস্থলীতে প্ৰাণ হেৰুৱাই ৬ শ্ৰমিকে। আনহাতে অন্য প্ৰায় ১২ শ্ৰমিকৰ অৱস্থা সংকটজনক।
এই বিস্ফোৰণ ইমানেই ভয়ংকৰ আছিল যে, প্ৰায় ১ কিলোমিটাৰ মান দূৰলৈ ইয়াৰ শব্দ শুনা যায়। যাৰ ফলত আতংকিত হৈ পৰে ফেক্টৰীটোৰ নিকট সাধাৰণ লোক।
ঘটনাৰ খবৰ লাভৰ লগে লগে ঘটনাস্থলীত সাধাৰণ লোকৰ লগতে আৰক্ষী, উদ্ধাৰকাৰী দল আদি উপস্থিত হয়। ততাতৈয়াকৈ কাৰখানাত আৱদ্ধ মহিলাসকলক উদ্ধাৰ কৰে। উদ্ধাৰকাৰী দলে সকলোকে হাস্পতাললৈ প্ৰেৰণৰ ব্যৱস্থা কৰি দিয়ে।
বিস্ফোৰণটোৰ সময়ক কাৰখানাটোত অধিকাংশ মহিলাই কাম কৰি আছিল। যাৰ বাবে নিহত ৬ গৰাকীয়েই মহিলা শ্ৰমিক বুলি জানিব পৰা গৈছে। আনহাতে সংকটজনক অৱস্থাত হাস্পতালত ভৰ্তি কৰোৱা হৈছে অন্য ১২ গৰাকীমান মহিলাক।
ইয়াৰে অধিকাংশই এতিয়া হাস্পতালৰ আই চি ইউত জীৱন-মৃত্যুৰে যুঁজ দি আছে। মৃতকৰ সংখ্যা পাছলৈ অধিক বৃদ্ধি পোৱাৰ আশংকাই দেখা দিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
