মায়ানগৰী মুম্বাইত প্ৰতিদিনে মনত সৰু-বৰ অলেখ সপোন লৈ আহে বহু লোক। দেশৰ অৰ্থনৈতিক ৰাজধানীখনত সপোন বাস্তবায়িত কৰা সহজসাধ্য নহয় যদিও তাৰ মাজতেই উজ্বলি উঠে বহুজন। নিজৰ ধৈৰ্য, একাগ্ৰতা আৰু মনোবলৰ ফলত সফল হয় তেওঁলোক। এনেদৰেই মনত কিবা এটা কৰি দেখুওৱাৰ হেঁপাহ পুহি ৰখা এগৰাকী অটোচালক হৈ উঠে শ্বেয়াৰ বজাৰ বিশেষজ্ঞ।
শ্বেয়াৰ বজাৰত দৈনিক লেনদেন হয় কোটি কোটি টকাৰ। সৰু-বৰ বিনিয়োগকাৰীয়ে নিতৌ বিনিয়োগ কৰি উপাৰ্জন কৰে ধন। বিনিয়োগকাৰীসকলে ইয়াৰ বাবে পৰামৰ্শ লয় বিশেষজ্ঞৰ। এনে এগৰাকী শ্বেয়াৰ বজাৰ বিশেষজ্ঞ এতিয়া চৰ্চালৈ আহিছে। মুম্বাইৰ এগৰাকী অটোচালকে নিজে ট্ৰেডিং কৰাৰ উপৰিও অন্য লোকক আগবঢ়ায় শ্বেয়াৰ বজাৰত বিনিয়োগৰ পৰামৰ্শ।
মুম্বাইত কিবা এটা কৰি দেখুওৱাৰ সপোন পুহি ৰখা বিশাল পাইকৰাও নামৰ যুৱকজনে পৰিয়ালৰ দায়িত্ব কান্ধ পাতি ল’বলগীয়া হোৱাত নিজৰ শিক্ষা দ্বাদশ শ্ৰেণীতে সামৰিব লগা হয়। পৰিয়াল পোহপালৰ বাবে অটো চলাবলৈ লোৱা বিশালৰ মনত খুন্দিয়াই আছিল অন্য কিবা কৰাৰ কথা। তেনে সময়তে বিশালৰ মন শ্বেয়াৰ বজাৰৰ ফালে ঢাল খায়। অটো চলাই থকাৰ মাজতে বিশালে অধ্যয়ন কৰে শ্বেয়াৰ বজাৰৰ সবিশেষ।
প্ৰথমতে ছ’চিয়েল মিডিয়াত শ্বেয়াৰ বজাৰৰ বিষয়ে অধ্যয়ন কৰা বিশাল পাইকৰাৱে লাহে লাহে নিজৰ সাঁচতীয়া ধনেৰে সৰু সৰু ট্ৰেডিং কৰিবলৈ লয়। বিশালৰ অটোত সকলো সময়তে এটা লেপটপ থাকে আৰু সময় পালেই বিশালে শ্বেয়াৰ বজাৰৰ তথ্য লৈ থাকে। অটো চলাই পৰিয়াল পোহপাল দিয়াটো কষ্টকৰ বাবে ট্ৰেডিঙৰ জৰিয়তে অতিৰিক্ত উপাৰ্জন কৰি থকা বুলি কয় বিশাল পাইকৰাৱে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
