নেচনেল এলিজিবিলিটি এণ্ট্ৰেন্স টেষ্ট (NEET)ৰ পৰীক্ষাত মহিলা পৰীক্ষাৰ্থীৰ অন্তৰ্বাস খুলিবলৈ বাধ্য কৰোৱাৰ ঘটনাই সমগ্ৰ দেশজুৰি বিতৰ্কৰ সৃষ্টি কৰিছিল৷ উক্ত ঘটনাৰ ভুক্তভোগী বুলি দাবী কৰা পৰীক্ষাৰ্থীৰ বাবে ‘নেচনেল টেষ্টিং এজেঞ্চি’(NTA)ৰ পুনৰ পৰীক্ষা অনুষ্ঠিত কৰা হ’ব বুলি ঘোষণা কৰিছে৷
NTAএ অহা ৪ ছেপ্টেম্বৰত এই পৰীক্ষা অনুষ্ঠিত কৰিবলৈ সিদ্ধান্ত গ্ৰহণ কৰিছে৷ জানিব পৰা মতে NTAএ ইতিমধ্যে ভুক্তভোগী উক্ত মহিলা পৰীক্ষাৰ্থীসকলৈ এই সম্পৰ্কীয় এক মেইলও প্ৰেৰণ কৰা হৈছে৷
লগতে পঢ়ক ভুল চিকিৎসাৰ বলি! সন্তান জন্ম দিয়ে আকস্মিক মৃত্যু বিশ্ববিদ্যালয়ৰ অধ্যাপিকাৰ
উল্লেখ্য যে যোৱা জুলাই মাহত কেৰালাৰ কোলামৰ চাথামংগলামৰ এটা পৰীক্ষা কেন্দ্ৰত এই কাণ্ড সংঘটিত কৰাৰ অভিযোগ উত্থাপন হৈছিল। এগৰাকী পৰীক্ষাৰ্থীৰ পিতৃয়ে আৰক্ষী থানাত এই ঘটনা সন্দৰ্ভত এজাহাৰ দাখিল কৰি কয় যে পৰীক্ষা কেন্দ্ৰত প্ৰৱেশ কৰাৰ পূৰ্বে তেওঁৰ কন্যাকে ধৰি NEETৰ একাংশ মহিলা প্ৰাৰ্থীক অন্তৰ্বাস খুলিবলৈ কোৱা হৈছিল। অভিযোগ অনুসৰি পৰীক্ষা কেন্দ্ৰত প্ৰৱেশ কৰাৰ পূৰ্বে বলপূৰ্বকভাৱে পৰীক্ষাৰ্থী অন্তৰ্বাস খুলিবলৈ দিয়া হৈছিল।
উক্ত ঘটনা সন্দৰ্ভত ভাৰতীয় দণ্ডবিধিৰ ৩৫৪, ৫০৯ ধাৰাত গোচৰ ৰুজু কৰা হৈছিল। ঘটনা সন্দৰ্ভত ৭ গৰাকী লোকক আৰক্ষীয়ে গ্ৰেপ্তাৰো কৰে। ধৃতসকলৰ ভিতৰত মহাবিদ্যালয়খনৰ দুজন কৰ্মচাৰীও আছিল। অৱশ্যে পিছত আটাইকেইজন অভিযুক্তই জামিন লাভ কৰে। অভিযোগ তদন্ত কৰিবলৈ এনটিএয়ে এখন তিনিজনীয়া বিশেষ সমিতিও গঠন কৰি দিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
