অসম লাইভ২৪ঃ বাল্য বিবাহ সমাজৰ বাবে ভয়াৱহ৷ প্ৰকৃততে বাল্য বিবাহে বহু শিশুৰ জীৱন ধ্বংস কৰিছে৷ বাল্যবিবাহে বহুতৰে সপোন ভাঙি চুৰমাড় কৰে৷ তেনে এটি ঘটনাই সংঘটিত হৈছে ৰাজস্থানৰ এজন যুৱকৰ সৈতে৷ কিন্তু মনত অদম্য শক্তি থাকিলো কোনো বাধাই হেঙাৰ নহয়৷ সেই প্ৰমাণেই দাঙি ধৰিলে যুৱকজনে৷ ৰাজস্থানৰ চিতোৰগড় জিলাৰ ঘোষুন্দা এলেকাৰ বাসিন্দা আছিল ৰামলাল ভোই৷ কোনো প্ৰতিকূল পৰিস্থিতিতেই তেওঁ হাৰ নামানি নীট পৰীক্ষাত ভাল ফলাফল দেখুৱাইছে ৰামলালে৷
শৈশৱৰ পৰাই ৰামলালৰ চিকিৎসক হোৱাৰ সপোন আছিল৷ কিন্তু মন থাকিলেও দাৰিদ্ৰতাই জুৰুলা কৰা ৰামলালে সপোনটোক সামৰি সুতৰি থবলৈ বাধ্য হৈ পৰিছিল৷ ৰামলালৰ পিতৃয়ে দিন হাজিৰা কৰিছিল৷ ঘৰত বিদ্যুৎ সংযোগ থাকিলেও বেছিভাগ সময়েই বিদ্যুতো নাথাকে ৰামলালৰ ঘৰত৷ কিয়নো পিতৃয়ে কাৰেণ্টৰ বিল পৰিশোধ কৰিবলৈ অপাৰগ৷ তাৰপাছতেই মাত্ৰ ১১ বছৰ বয়সত পৰিয়ালৰ হেঁচাত ৰামলালে বিয়া কৰাব লগাত পৰে৷ বিবাহৰ সময়ত তেওঁৰ পত্নীও তেনেই সৰু৷ বাল্যবিবাহে কাঢ়ি ল’লে ৰামলালৰ শিক্ষাজীৱন৷ তথাপিও পৰিয়ালৰ বিৰুদ্ধাচৰণ কৰি দশম শ্ৰেণীলৈকে পঢ়াশুনা কৰে ৰামলালে৷
দশম শ্ৰেণী পোৱালৈ বয়সো কিছু বাঢ়িল বাবে পৰিয়ালৰ লোকৰ হেঁচাও বাঢ়িল৷ ঘৰত অভাৱ ৰামলালে কামত ধৰিব লাগে৷ তেওঁ এই সন্দৰ্ভত কয়, ‘মোৰ পত্নীয়েও পঢ়াশুনা কৰিব খুজিছিল৷ কিন্তু মোৰ সৈতে বিবাহপাশত আৱদ্ধ হোৱাৰ পাছত তেওঁৰো পঢ়াশুনাত যতি পৰে৷ তেওঁ মোৰবাবেই সকলো নিজস্বতা বিসৰ্জন দিলে৷ কিন্তু মোৰ ভিতৰত পঢ়াৰ প্ৰতি ধাউতি থকা দেখি মোক আগুৱাই দিলে৷ ঘৰৰ সকলো দায়িত্ব ইমান কম বয়সতেই তেওঁ মূৰ পাতি ল’লে৷’
পৰিয়ালৰ লোকে নুবুজিলেও ৰামলালৰ পত্নীয়ে বুজিছিল৷ সেয়ে স্বামীক পাৰ্যমানে সহায় কৰিছিল৷ ৰামলালৰ পত্নীয়ে তেওঁৰ শহুৰেকক অৰ্থাৎ ৰামলালৰ পিতৃক এই সন্দৰ্ভত বুজাই কয়৷ ৰামলালৰ পিতৃয়ে বুজনিত মান্তি হৈ পুত্ৰক পঢ়িবলৈ কয়৷ পোনতে ৰামলালে পলাই গৈ উদয়পুৰ পাইছিলগৈ৷ পাছত পিতৃয়ে তেওঁৰ পঢ়াৰ খৰচ যোগান ধৰিবলৈ মান্তি হয়৷ পাছলৈ ধাৰ কৰি হ’লেও পুত্ৰক পঢ়াৰ খৰচ দিবলৈ আৰম্ভ কৰে পিতৃয়ে৷
ৰামলালৰ জীৱনৰ লক্ষ্য আছিল ডাক্তৰ হোৱাৰ৷ তেওঁ উদয়পুৰতেই নীট পৰীক্ষাৰ কচিং ল’বলৈ আৰম্ভ কৰে৷ ২০১৯ চনত ৮১ শতাংশ নম্বৰ লৈ দ্বাদশ শ্ৰেণীৰ পৰীক্ষাত উত্তীৰ্ণ হয় ৰামলাল৷ তাৰপাছতেই নীট পৰীক্ষাত অৱতীৰ্ণ হয় ৰামলাল৷ কিন্তু প্ৰথমবাৰ তেওঁ নীটত উত্তীৰ্ণ হ’ব নোৱাৰিলে৷ হাৰ নামানিলে ৰামলালে৷ পঞ্চমবাৰ নীট পৰীক্ষাত অৱতীৰ্ণ হৈ উত্তীৰ্ণ হৈছে ৰামলাল৷ ৰামলালে লাভ কৰিছে ৬৩২ নম্বৰ৷ কেটাগৰীৰ দিশেৰে তেওঁৰ ৰেঙ্ক ৫১৩৭৷ অৱশেষত ৰামলালে শৈশৱতেই দেখা সপোনটোৱে পূৰ্ণতা পালে৷ ৰামলালৰ এই সাফল্যই ঘৰলৈকো আনন্দৰ বন্যা বোৱাই আনিছে৷ ইফালে নীট পৰীক্ষাৰ ৬মাহ পূৰ্বে তেওঁৰ ঘৰলৈ এগৰাকী কন্যা সন্তানো আহিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
