অসম লাইভ ২৪ঃ নাইজেৰিয়াৰ বিদ্যালয়ত অচিনাক্ত দুৰ্বৃত্তৰ অপহৰণ কাণ্ড। নাইজাৰ ৰাজ্যৰ চালিহু টাংক’ ইছলামিক স্কুলত সংঘটিত হৈছে এই ঘটনা। নাইজেৰিয়াৰৰ এই বিদ্যালয়খনৰ পৰা শতাধিক শিক্ষাৰ্থীক অপহৰণ কৰে বন্দুকধাৰীৰ দলে। দেওবাৰে সংঘটিত হৈছে এই চাঞ্চল্যকৰ ঘটনা। নাইজাৰ চৰকাৰে টুইটযোগে জনাইছে এই কথা। বন্দুকধাৰীৰ দলে শতাধিক ছাত্ৰ-ছাত্ৰীক অপহৰণ কৰিছিল যদিও পৰৱৰ্তী সময়ত মুকলি কৰি দিয়ে কিছু সংখ্যক ছাত্ৰ-ছাত্ৰীক। শিক্ষাৰ্থীসকলৰ ভিতৰত আছে ৪ বছৰৰ পৰা ১২ বছৰ বসয়ৰ শিশুও। নাইজেৰিয়াৰ এখন বিশ্ববিদ্যালয়ৰ ১৪ জন পণবন্দী শিক্ষাৰ্থীক মুক্তি দিয়াৰ এদিনৰ পাছত সংঘটিত হৈছে এই অপহৰণ কাণ্ড। অপহৰণৰ সময়ত ২০০ জন শিক্ষাৰ্থী আছিল বিদ্যালয়খনত, কিন্তু তাৰে অধিকসংখ্যকক অপহৰণ কৰি নিয়ে অপহৰণকাৰীৰ দলে। নাইজাৰ আৰক্ষীৰ মুখপাত্ৰৰ ভাষ্য অনুসৰি, বাইকত অহা অপহৰণকাৰীয়ে প্ৰথমে টেজিনা টাউনত নিৰ্বিচাৰে গুলীচালনা কৰে। গুলীচালনাত নিহত হয় এগৰাকী ব্যক্তি আৰু আহত হয় এগৰাকী। তাৰ পাছতেই বিদ্যালয়খনত প্ৰৱেশ কৰি অপহৰণ কৰে শিক্ষাৰ্থীসকলক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ