ৰাজতন্ত্ৰ উভতাই বিচাৰি চলিত বছৰতেই উত্তাল হৈছিল নেপাল৷ সেই বিক্ষোভৰ কেইটামান মাহ পাৰ নৌহওঁতেই আকৌ উত্তপ্ত নেপাল৷ নেপালত বিক্ষোভ ৰখাব নোৱাৰি গুলিচালনা কৰিব লগা পৰিস্থিতিয়ে বিৰাজ কৰিছে৷ কিন্তু কিয় এই বিক্ষোভ?
বিগত সপ্তাহত নেপালত ছচিয়েল মিডিয়া ব্যৱহাৰৰ ওপৰত নিষেধাজ্ঞা জাৰি কৰা হৈছে৷ তাৰপৰাই পুঞ্জীভূত ক্ষোভ এইবাৰ প্ৰকাশ্যে বাহিৰলৈ আহিছে৷ বহুতৰে মত, কেৱল ছচিয়েল মিডিয়া নিষিদ্ধ হোৱাই কেৱল ক্ষোভৰ কাৰণ নহয়৷ এই ক্ষোভৰ আঁৰত আছে সাম্প্ৰতিক সময়ত বাৰে বাৰে দেশৰ চৰকাৰৰ বিৰুদ্ধে উত্থাপিত নানান দূৰ্নীতিৰ অভিযোগো৷ সকলো মিলি দেওবাৰৰ পৰা উত্তাল হৈ আছে নেপাল৷ পৰিস্থিতিয়ে ভয়াৱহ ৰূপ লৈছে সোমবাৰে অৰ্থাৎ আজি৷
সৰ্বভাৰতীয় সংবাদ মাধ্যমৰ প্ৰতিবেদন সূত্ৰৰ খবৰ অনুসৰি সোমবাৰে পুৱাৰে পৰাই বাঢ়িছে ক্ষোভ৷ দিনৰ ভাগত বিক্ষোভকাৰীৰ সন্মুখৰ ভাগত থকা যুৱপ্ৰজন্মই বেৰিকেড ভাঙি পাৰ্লিয়ামেণ্টত সোমাই পৰে৷ তাৰপিছতেই আকৌ উত্তপ্ত হৈ পৰে পৰিস্থিতি৷ প্ৰতিবেদন প্ৰস্তুত কৰা পৰ্যন্ত নেপাল আৰক্ষীৰ গুলিত নিহত হৈছে ৮গৰাকী লোকৰ৷ কোনো কোনো সংবাদমাধ্যমে এই সংখ্যা ১০ বুলিও দাবী কৰিছে৷ আৰু আহত হৈছে প্ৰায় ৮০জন লোক৷
সৰ্বভাৰতীয় সংবাদমাধ্যম সূত্ৰৰ খবৰ অনুসৰি বিক্ষোভকাৰীয়ে পাৰ্লিয়ামেণ্টৰ দুৱাৰত জুই লগাই দিয়াৰ পাছতহে গুলিওৱাৰ নিৰ্দেশ দিয়া হয়৷ অন্যহাতে বিক্ষোভকাৰীৰ অভিযোগ, আৰক্ষীয়ে তেওঁলোকক লক্ষ্য কৰি গুলি কৰি থকাৰ বাবে তেওঁলোকে এনেদৰে উগ্ৰৰূপ ধাৰণ কৰিছে৷ তেওঁলোকৰ শ্লোগান আছে, দুৰ্নীতি বন্ধ হওক, ছচিয়েল মিডিয়া এপ নহয়৷
দ্যা কাঠমাণ্ডু পোষ্টৰ এক প্ৰতিবেদন অনুসৰি কিছু বিক্ষোভকাৰীয়ে সংসদৰ প্ৰাংগনত প্ৰৱেশ কৰে৷ কোনো কোনোৱে গছৰ ডাল আৰু পানীৰ বটল দলিয়াই চৰকাৰ বিৰোধী শ্লোগান দিয়ে৷ পৰিস্থিতি বেয়া হোৱাত আৰক্ষীয়ে পানীৰ ডোম, টিয়াৰগেছ, ৰাবাৰ বুলেট ব্যৱহাৰ কৰে যদিও পৰিস্থিতি ক্ষাম নাকাটিল৷ অৱশেষত সেয়ে গুলিচালনা কৰিবলগীয়া হয়৷
উল্লেখ কৰা প্ৰয়োজন যে নেপালত ফেছবুক, ইনষ্টাগ্ৰাম, আৰু এক্সসহ ২৬ টা ছচিয়েল মিডিয়া প্লেটফৰ্ম নিষিদ্ধ কৰা হৈছে৷ এই প্লেটফৰ্মসমূহক নেপালৰ তথ্য আৰু প্ৰযুক্তি মন্ত্ৰণালয়ে সাত দিনৰ ভিতৰত নথিভুক্ত কৰাৰ কথা আছিল, কিন্তু ছচিয়েল মিডিয়া প্লেটফৰ্মসমূহে সেয়া নকৰিলে৷ মন্ত্ৰণালয়ে সংস্থাসমূহক নাম নথিভুক্ত কৰাৰ বাবে ২৮ আগষ্টৰ পৰা ৭ দিনৰ সময়সীমা বান্ধি দিছিল৷ এই সময়সীমা বিগত বুধবাৰে নিশা শেষ হৈছিল৷ নেপালৰ প্ৰশাসনিক কৰ্তাই জনাইছে যে, নিষেধাজ্ঞা তাৎক্ষণিকভাৱে সমগ্ৰ দেশত কাৰ্যকৰ হব আৰু মন্ত্ৰণালয়ে সংশ্লিষ্ট সংস্থাসমূহক চিঠি দিয়াও আৰম্ভ কৰিছে৷ চৰকাৰে ইতিমধ্যেই নিয়ম মানি নচলা প্লেটফৰ্মসমূহক স্থগিত কৰাৰ বিষয়ে সতৰ্ক কৰিছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
