অসম লাইভ ২৪ঃ ৰাজ্যৰ ৰাষ্ট্ৰীয় ঘাইপথসমূহত যান-বাহনৰ গতিবেগ ঘণ্টাত ১০০ কিঃমিঃ পৰ্যন্ত বৃদ্ধি কৰিলে মুখ্যমন্ত্ৰী হিমন্ত বিশ্ব শৰ্মাই। সোমবাৰে লোকনিৰ্মান বিভাগৰ শীৰ্ষ বিষয়াসকলৰ সৈতে হোৱা এক গুৰুত্বপূৰ্ণ বৈঠকত এই সিদ্ধান্ত গ্ৰহণ কৰে মুখ্যমন্ত্ৰীয়ে। ইয়াৰোপৰি, স্পৰ্শকাতৰ অংশসমূহত গাড়ীৰ গতিবেগ ঘণ্টাত ৪০ কিঃমিঃ ধাৰ্য কৰাৰ লগতে জৰিমনা সন্দৰ্ভতো গুৰুত্বপূৰ্ণ সিদ্ধান্ত গ্ৰহণ কৰে। জনসাধাৰণৰ মাজত উপযুক্ত সচেতনতা গঢ়ি নুঠা পৰ্যন্ত পৰৱৰ্তী কিছু দিনৰ বাবে জৰিমনা সংগ্ৰহ বন্ধ ৰাখিবলৈ নিৰ্দেশ দিয়ে পৰিবহন বিভাগক। ৩ মাহৰ ভিতৰত ৰাষ্ট্ৰীয় ঘাইপথৰ স্পৰ্শকাতৰ ঠাইত পথ নিৰ্দেশনাৰ ফলক লগোৱাৰ উপৰি গতিৰোধ স্থাপনৰ বাবে ৰাষ্ট্ৰীয় ঘাইপথ প্ৰাধিকৰণ, ৰাষ্ট্ৰীয় ঘাইপথ আন্তঃগাথনি উন্নয়ন নিগম লিমিটেড আৰু লোকনিৰ্মাণ বিভাগক মুখ্যমন্ত্ৰীয়ে নিৰ্দেশনা জাৰি কৰে। লগতে, ঘাইপথৰ কাষত থকা শিক্ষানুষ্ঠান, চিকিৎসালয় আদি স্পৰ্শকাতৰ অঞ্চলসমূহ চিনাক্ত কৰি সেই স্থানসমূহত উপযুক্ত আৰু দৃশ্যমানৰূপত পথ নিৰ্দেশনা ফলক স্থাপনৰ ব্যৱস্থা কৰিবলৈ নিৰ্দেশ দিয়ে লোকনিৰ্মাণ বিভাগক। ৰাইজৰ মাজত ২ মাহজুৰি প্ৰচাৰ অভিযান চলাবলৈ পৰিবহণ বিভাগক নিৰ্দেশ দিয়ে মুখ্যমন্ত্ৰী হিমন্ত বিশ্ব শৰ্মাই। এই ক্ষেত্ৰত ৰাইজৰ জ্ঞাতাৰ্থে ছপা আৰু বৈদ্যুতীন মাধ্যমযোগে মনোগ্ৰাহী বিজ্ঞাপন প্ৰচাৰৰ ব্যৱস্থা কৰাৰ লগতে এই অভিযানত ক্ৰীড়া আৰু সাংস্কৃতিক জগতৰ জনপ্ৰিয় তাৰকাসকলক জড়িতকৰণৰ পদক্ষেপ ল’বলৈও মুখ্যমন্ত্ৰীয়ে আহ্বান জনায়। বৈঠকত উপস্থিত থাকে পৰিবহন বিভাগৰ সচিব কে কে দ্বিবেদী, মুখ্যমন্ত্ৰীৰ প্ৰধান সচিব সমীৰ কুমাৰ সিনহা আৰু ৰাষ্ট্ৰীয় ঘাইপথ প্ৰাধিকৰণ, ৰাষ্ট্ৰীয় ঘাইপথ আন্তঃগাথনি উন্নয়ন নিগম লিমিটেড আৰু লোকনিৰ্মাণ বিভাগৰ শীৰ্ষ বিষয়াসকল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
