অসম লাইভ২৪ঃ বিশ্বত প্ৰথমবাৰৰ বাবে এখন দেশত চৰকাৰে ধূমপানৰ বিৰুদ্ধে কঠোৰ আইন প্ৰণয়ন কৰিছ। নিউজিলেণ্ডৰ প্ৰধানমন্ত্ৰী জেচিণ্ডা আৰ্ডাৰ্ণৰ চৰকাৰে আনিছে এই নুতন আইন। চিগাৰেট ক্ৰয় কৰাৰ ওপৰত নিষেধাজ্ঞা আৰোপ কৰি ধপাত সেৱন, ধূমপান সম্পূৰ্ণৰূপে নাইকিয়া কৰিবলৈ এখন আইন গৃহীত কৰিছে নিউজিলেণ্ড চৰকাৰে।
নতুন আইনত কি উল্লেখ আছে?
ধপাতমুক্ত দেশ হোৱাৰ দিশত দ্ৰুতগতিত আগবঢ়া এইখন দেশে যুৱকসকলক যাতে ধুমপানৰ পৰা আঁতৰাই ৰাখিব পাৰি সেই উদ্দেশ্যেৰেই আইন প্রণয়ন কৰিছে। নতুন আইন অনুসৰি নিউজিলেণ্ডত ধপাতৰ তাৎক্ষণিক প্ৰভাৱৰ বাবে ১ জানুৱাৰী ২০০৯ পিছত জন্ম হোৱা কোনো যুৱকেই ক্ৰয় কৰিব নোৱাৰিব চিগাৰেট। নতুন আইনৰ অধীনত, সময়ৰ সৈতে চিগাৰেট ক্ৰয় কৰাৰ নিম্নতম বয়স বৃদ্ধি হ’ব। এতিয়াৰ পৰা ৫০ বছৰৰ পাছত চিগাৰেটৰ পেকেট ক্ৰয় কৰিবলৈ যুৱকজনক ৬৩ বছৰ বয়স হোৱা বুলি এখন প্ৰমাণপত্ৰৰ দাখিল কৰিব লাগিব।
চিগাৰেট ক্ৰয়ৰ বাবে দেখুৱাব লাগিব বয়সৰ প্ৰমাণপত্ৰ
চিগাৰেট ক্ৰয় কৰিবলৈ মানুহে এতিয়া সকলো ঠাইতে তেওঁলোকৰ বয়সৰ প্ৰমাণপত্ৰ দেখুৱাব লাগিব। প্ৰতিবেদন অনুসৰি, নিউজিলেণ্ডে ২০২৫ চনৰ ভিতৰত দেশখনক ধঁপাতমুক্ত কৰাৰ পৰিকল্পনা কৰিছে। নিউজিলেণ্ড চৰকাৰে প্ৰকাশ কৰা পৰিসংখ্যা অনুসৰি, নিউজিলেণ্ডৰ প্ৰায় ৮% প্ৰাপ্তবয়স্কই ধূমপান কৰে। চিগাৰেট আৰু ধঁপাতজাতীয় সামগ্ৰীৰ ওপৰত মোটা কৰ আৰোপ কৰাৰ পিছতেই এই নিষেধাজ্ঞা জাৰি কৰিছে।
নিউজিলেণ্ডৰ স্বাস্থ্যমন্ত্ৰীৰ মন্তব্য
নিউজিলেণ্ডৰ স্বাস্থ্যমন্ত্ৰীয়ে তেওঁৰ মন্তব্যত কয় যে, এই আইনে দেশত ধূমপান কৰা লোকৰ সংখ্যা হ্ৰাস কৰিব। লগতে তেওঁ কয়, ‘দেশত ধপাত বিক্ৰী কৰিবলৈ অনুমতি দিয়া দোকানীৰ সংখ্যা ৬০০০ ৰ পৰা ৬০০ লৈ হ্ৰাস কৰা হ’ব। ধূমপান কৰা লোকৰ সংখ্যাও হ্ৰাস হ’ব।’ ইয়াৰোপৰি স্বাস্থ্যমন্ত্ৰীগৰাকীয়ে কয়, ‘এনে সামগ্ৰী বিক্ৰী কৰিবলৈ দিয়াটোত কাৰোৱেই লাভ হোৱা নাই। ধূমপানে লাখ লাখ লোকৰ প্ৰাণহে লৈছে। আমি ভৱিষ্যতে আমাৰ দেশত সম্পূৰ্ণৰূপে ধূমপান নিষিদ্ধই কৰিম। নতুন স্বাস্থ্য প্ৰণালী গঢ়ি তুলিম, যি প্ৰণালীয়ে ধূমপান সম্পৰ্কীয় ৰোগ, যেনে কৰ্কট ৰোগ, হৃদৰোগ আদি সম্পূৰ্ণৰূপে নিৰ্মূল কৰিব। তেতিয়া আমাৰ দেশত চিকিৎসাৰ নামত ব্যয় হোৱা বিলিয়ন ডলাৰ ৰাহি হ’ব।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
