দুৰ্কপাল নে ৰেকৰ্ড, ২৩৮ বাৰ নিৰ্বাচনত পৰাজয় বৰণ কৰিয়ো পুনৰ থিয় দিছে এইবাৰ
দুৰ্কপাল বুলি কব নে ৰেকৰ্ড বুলি কব, এগৰাকী এনে লোক যিয়ে কেৱল নিৰ্বাচনত হাৰিবলৈয়ে থিয় দিয়ে। এতিয়ালৈকে ২৩৮ বাৰ নিৰ্বাচন খেলিছে লোকগৰাকীয়ে।
পাছে ২৩৮ বাৰ নিৰ্বাচন খেলিয়ো এবাৰো জয় হ’ব পৰা নাই আজি পৰ্যন্ত। কিন্তু তথাপি জনপ্ৰিয় লোকগৰাকী। তামিলনাডুৰ মেত্তুৰ নিবাসী পদ্মৰাজন নামৰ এইগৰাকী লোক ‘ইলেকছন কিং’ বুলি জনাজাত।
লাখ লাখ টকা খৰচ, সময় নষ্ট, বহু কষ্ট, তথাপি হাৰ মানি যোৱা নাই ইলেকচন কিং পদ্মৰাজনে। এতিয়ালৈকে ৰাষ্ট্ৰপতি নিৰ্বাচন, প্ৰধানমন্ত্ৰী নিৰ্বাচন, লোকসভা, বিধানসভা, পঞ্চায়ত একো নিৰ্বাচনেই এৰা নাই পদ্মৰাজনে।
বৰ্তমানৰ প্ৰধানমন্ত্ৰী নৰেন্দ্ৰ মোদী, প্ৰাক্তন প্ৰধানমন্ত্ৰী অটল বিহাৰী বাজপেয়ী, মনমোহন সিং, কংগ্ৰেছৰ নেতা ৰাহুল গান্ধী আদিৰ বিৰুদ্ধেও নিৰ্বাচন খেলি পাইছে এই পদ্মৰাজনে।
১৯৮৮ চনত প্ৰথমবাৰৰ বাবে নিৰ্বাচন খেলিছিল পদ্মৰাজনে। বৰ্তমানলৈ ৩০০ বাৰ মনোনয়ন দাখিল কৰি পাইছে লোকগৰাকীয়ে। ইয়াৰ ভিতৰত কেইবাখনো মনোনয়ন বাতিল হৈ ২৩৮ বাৰ খেলিছে নিৰ্বাচন।
পাছে নিৰ্বাচন হাৰিলেও নিবিচৰাকৈয়ে ৰেকৰ্ড গঢ়িছে পদ্মৰাজনে। ইণ্ডিয়া লিমকা বুক অৱ ৰেকৰ্ডত অসফল প্ৰাৰ্থী হিচাপে নাম লিপিবদ্ধ হৈছে।
এইবাৰো লোকসভাৰ বাবে নিৰ্দলীয় প্ৰাৰ্থী হিচাপে ইতিমধ্যে মনোনয়ন দাখিল কৰিছে পদ্মৰাজনে। তেখেতৰ মন্তব্য, এইবাৰো হাৰিব, কেৱল হাৰিবৰ বাবেই নিৰ্বাচন খেলে। হাৰি হাৰিয়েই বিশ্ব ৰেকৰ্ড গঢ়াৰ প্ৰৱল ইচ্ছা ইলেকচন কিঙৰ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
