চীনৰ সামৰিক আৰু অৰ্থনৈতিক সহায়তাত পাকিস্তানে তেওঁলোকৰ পাৰমাণৱিক অস্ত্ৰ আধুনিকীকৰণ কৰিছে। দেওবাৰে মাৰ্কিন প্ৰতিৰক্ষা সংস্থাই প্ৰকাশ কৰা ৱাৰ্ল্ড থ্ৰেট এছেচমেণ্টত এই তথ্য পোৱা গৈছে। ভাৰতক ভয় দেখুৱাবলৈকে পাকিস্তানৰ এই উদ্যোগ বুলিও ধাৰণা কৰিছে বহু বিশ্লেযকে।
সেই ৰিপৰ্টত উল্লেখ কৰা হৈছে যে আগন্তুক বছৰত পাকিস্তানী সেনাবাহিনীৰ শীৰ্ষ অগ্ৰাধিকাৰৰ মাজত আছে আঞ্চলিক প্ৰতিবেশীৰ সৈতে সীমান্তত সংঘৰ্ষ আৰু পাৰমাণৱিক অস্ত্ৰৰ আধুনিকীকৰণ অব্যাহত ৰখা।
ৱাৰ্ল্ড থ্ৰেট এছেচমেণ্টৰ ৰিপৰ্ট অনুসৰি- পাকিস্তানে তেওঁলোকৰ পাৰমাণৱিক অস্ত্ৰ আধুনিকীকৰণ কৰিছে আৰু পাৰমাণৱিক উপকৰণ পাৰমাণৱিক কমাণ্ড আৰু নিয়ন্ত্ৰণৰ নিৰাপত্তাও বজায় ৰাখিছে। পাকিস্তানে প্ৰায় নিশ্চিতভাৱেই বিদেশী সৰবৰাহকাৰী আৰু মধ্যস্থতাকাৰীৰ পৰাও গণবিধ্বংসী পণ্য সংগ্ৰহ কৰিছে।
ৰিপৰ্টত লগতে উল্লেখ কৰা হৈছে যে, পাকিস্তানে গণবিধ্বংসী অস্ত্ৰ তৈয়াৰৰ বাবে চীনৰ পৰাও উপকৰণ আৰু প্ৰযুক্তি লাভ কৰিছে। যাৰ মাজত কিছু স্থানান্তৰ কৰা হৈছে হংকৰ, চিংগাপুৰ, তুৰস্ক আৰু সংযুক্ত আৰৱ আমিৰচাহীৰ দৰে দেশসমূহৰ মাধ্যমেৰে। যদিও চীন, পাকিস্তানৰ সামৰিক সৰঞ্জামৰ প্ৰধান সৰবৰাহকাৰী তথাপিও পাকিস্তানত কৰ্মৰত চীনা নাগৰিকক লক্ষ্য কৰি ধাৰাবাহিক সন্ত্ৰাসবাদী আক্ৰমণৰ কাৰণে ইছলামাবাদৰ প্ৰতি মোহভংগ হৈছে বেইজিঙৰ। সম্পৰ্ক তিক্ত হৈয়ো উঠিছে।
ৱাৰ্ল্ড থ্ৰেট এছেচমেণ্ট ৰিপৰ্টত কোৱা হৈছে যে ভাৰতক, পাকিস্তানে নিজৰ অস্তিত্বৰ ধমকি হিচাপে চায়। ভাৰতৰ প্ৰচলিত সামৰিক সুবিধাক সৰু কৰাৰ বাবে যুদ্ধক্ষেত্ৰৰ পাৰমাণৱিক অস্ত্ৰৰ উন্নয়নসহ সামৰিক ভাণ্ডাৰ আধুনিকীকৰণৰ প্ৰচেষ্টা চলায় যাব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
