অসম লাইভ২৪ঃ শনিবাৰে পুৱাৰে পৰাই দিল্লীৰ কপূৰথলাত উখল মাখল পৰিবেশ। সন্ধিয়া নমাৰ লগে লগেই এজনৰ পাছত আনজন ৰাজনৈতিক নেতাৰ ভীৰ। দুই ৰাজ্যৰ দুজনকৈ মুখ্যমন্ত্ৰী, হলীউড অভিনেত্ৰীৰ পৰা আৰম্ভ কৰি বহুজন চেলিব্ৰিটিয়ে ভীৰ কৰিছিল এলেকাটোত। উপলক্ষ্য এটাই, পৰিণীতি আৰু ৰাঘৱৰ বাগদান অনুষ্ঠান। আত্মীয়-স্বজন আৰু বন্ধু-বান্ধৱৰ উপস্থিতিত ৰাঘৱ পৰিণীতিৰ বাগদান সম্পূৰ্ণ হয়। নিশাৰে পৰাই দুয়োৰে বাগদানৰ বহু ফটো ভাইৰেল হৈ পৰিছে। দুয়োৱেই অনুষ্ঠানটোত বগা ৰঙৰ পোছাক পৰিধান কৰিছে। দুয়োৰে অনামিকা আঙুলিত জিলিকিছে আঙুঠি। ছবিসমূহ দেখিলেই বুজা যায় এজনে আনজনৰ মাজত হেৰাই যোৱাৰ কথা।
বাগদানৰ ভাইৰেল ভিডিঅ’ত দেখা গৈছে যে ৰাঘৱ-পৰিণীতিয়ে ‘কেছৰী’ ছবিৰ ঔ মাহি ভে… গীতত কণ্ঠ মিলাইছে। তাৰমাজতেই সকলোৰে সন্মুখতেই এজনে আনজনক সাবটিও ধৰিছে। ৰাঘৱৰ তুলনাত পৰিণীতিক অধিক উৎসাহীৰূপত দেখা গৈছে ভিডিঅ’টোত।এই অনুষ্ঠানৰ অন্যতম আকৰ্ষণ আছিল পৰিণীতিৰ ভগ্নী তথা তাৰকা অভিনেত্ৰী প্ৰিয়ংকা চোপ্ৰা। স্বামী নিক জোনাছ আৰু কন্যা মালতীক এৰি শনিবাৰে পুৱাই ভগ্নীৰ বাগদানত উপস্থিত হৈছে প্ৰিয়ংকা। ইয়াৰোপৰি অনুষ্ঠানটোত উপস্থিত আছিল আদিত্য ঠাকৰে, পি চিডাম্বৰম, ভগৱন্ত মানৰ দৰে ৰাজনৈতিক নেতাও।
বিগত কেইবামাহ ধৰি দুয়োৰে প্ৰেমৰ কথা চৰ্চাৰ বিষয় হৈ আছিল। অভিনেত্ৰী পৰিণীতি চোপ্ৰা আৰু আপ নেতা ৰাঘৱ চাড্ডাৰ প্ৰেমক লৈ সকলোৰে মাজত চলিছিল চৰ্চা। এই সম্পৰ্ক সঁচা জানো এই প্ৰশ্নও আহিছিল বহুতৰে মনত। নাহিবনো কিয়, পৰিণীতিয়ে নিজেই এক সাক্ষাতকাৰত পূৰ্বে কৈছিল, ‘কোনো ৰাজনীতিবিদৰ সৈতে মই বিয়াত বহিব নোখোজো।’ কিন্তু প্ৰেমে যে সকলো সলাই দিয়ে এই কথা প্ৰমাণ হ’ল পৰিণীতিৰ ক্ষেত্ৰতো। কলেজীয়া বন্ধু ৰাঘৱে ৰাজনীতিত ওতপ্ৰোতভাৱে জড়িত থকাস্বত্ত্বেও বিবাহলৈ এখোজ আগবঢ়াই দিলে পৰিণীতিয়ে।
ইয়াৰৰোপৰি সেই সাক্ষাতকাৰটোত পৰিণীতিয়ে তেওঁৰ স্বামী কেনে হোৱাটো বিচাৰে সেই সন্দৰ্ভত কৈছিল, ‘যাক ভালপাম, তেওঁ মুক্ত মনৰ এজন মানুহ হ’ব লাগিব। তেওঁৰ মাজত ৰসবোধো থাকিব লাগিব। তেওঁ দায়িত্ববান পুৰুষ হ’ব লাগিব। মোতকৈ ২০ বছৰতকৈ অধিক ডাঙৰো হ’ব নালাগিব। মই ৰন্ধা বঢ়াও একেবাৰে নাজানো। আনকি চাহো বনাই পোৱা নাই। ৰন্ধা বিষয় জানিবলৈ মোৰ আগ্ৰহ আৰু ধৈৰ্য্য একেবাৰে কম।’
আনহাতে তেওঁ জীৱনসংগী হিচাপে বিচৰা পুৰুষৰ কথা ক’বলৈ গৈ কৈছিল, ‘মই এনে পুৰুষ বিচাৰো যি স্বনিৰ্ভৰ। নিজকে নিজেই প্ৰতিষ্ঠা কৰাৰ বাবে যুঁজ কৰিছে। ইয়াৰোপৰি প্ৰেমতো নিশ্চয় থাকিবই লাগিব। মোৰ সংগীজন ফুৰি ভালপোৱা মানুহ হ’ব লাগিব। মোৰ প্ৰধান ভালপোৱা হৈছে মই ফুৰি ভালপাওঁ। সমুদ্ৰ, নদী মোৰ দৰে তেওঁৱো ভালপাব লাগিব।’
উল্লেখ্য যে পৰিণীতিয়ে এই সাক্ষাতকাৰ ৰাঘৱৰ সৈতে প্ৰেমৰ কথা চৰ্চালৈ অহাৰ পূৰ্বেই কৈছিল। ইয়াৰ মাজতেই এটা কথা ঠিক যে ৰাঘৱো ভ্ৰমণপ্ৰিয় এজন মানুহ। বিভিন্ন ৰাজ্যলৈ সততেই ৰাঘৱে যাত্ৰা কৰি ভালপায়। বিভিন্ন লোক গাথা জানিবলৈ আগ্ৰহী হোৱাৰ ওপৰিও জন নেতা হোৱাৰ বাবে জনতাৰ অভাৱ অভিযোগ সম্পৰ্কে জানিবলৈ তেওঁ সততেই উদগ্ৰীৱো হৈ থাকে বুলি বহুতেই দাবী কৰে। কালিৰ দিনটোত বাগাদান সম্পূৰ্ণ হোৱাৰ পাছতেই ৰাঘৱে প্ৰাণভৰা সাবটেৰে ধৰি থকা ফটো শ্বেয়াৰ কৰি পৰিণীতিয়ে লিখিছে, ‘বহুদিনীয়া আশা পূৰণ হৈছে।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
