আৰক্ষীত নিযুক্তি লাভৰ স্ফূৰ্তিতে সুৰাৰ পাৰ্টী! বিষাক্ত সুৰা সেৱন কৰি ৮জনৰ মৃ*ত্যু

গুজৰাটত সুৰা নিষিদ্ধ হোৱা সত্ত্বেও বিষাক্ত সুৰা সেৱনৰ ফলত ভয়ংকৰ ঘটনা সংঘটিত হৈছে। এতিয়ালৈকে এই ঘটনাত ৯জন লোকৰ মৃ*ত্যু হৈছে। শুকুৰবাৰে চুৰাটৰ বাসিন্দা সঞ্জয়সিংহ ডোডিয়া নামৰ এজন যুৱককো চিকিৎসকে ব্ৰেইন ডেড ঘোষণা কৰে। সঞ্জয়ে ১৬ আগষ্টৰ নিশা ভাবনগৰত হোৱা এটা সুৰাৰ পাৰ্টিত অংশ লৈছিল।
সুৰা সেৱন কৰাৰ পিছত সঞ্জয় নিশাই চুৰাটলৈ উভতি আহিছিল। কিন্তু পিছদিনা পুৱাই তেওঁৰ স্বাস্থ্যৰ অৱস্থা অতি সংকটজনক হৈ পৰে। তেওঁক চুৰাটৰ INS হাস্পতালত ভৰ্তি কৰোৱা হয়। যোৱা তিনিদিন ধৰি তেওঁ ভেণ্টিলেটৰত আছিল। বৃহস্পতিবাৰে নিশা সঞ্জয়ৰ হাৰ্ট এটেক হয় আৰু শুকুৰবাৰে পুৱা চিকিৎসকে তেওঁক ব্ৰেইন ডেড ঘোষণা কৰে। ভাবনগৰৰ বিভিন্ন হাস্পতালত বৰ্তমান বিষাক্ত সুৰা সেৱনৰ ফলত গুৰুতৰভাৱে অসুস্থ হৈ ২৫জন লোক চিকিৎসাধীন হৈ আছে। ইয়াৰে ৫জনৰ অৱস্থা অতি সংকটজনক। সেয়ে মৃতকৰ সংখ্যা আৰু বৃদ্ধি পোৱাৰ আশংকা কৰা হৈছে।

১৬ আগষ্টৰ নিশা হৈছিল সুৰাৰ পাৰ্টি

এই ঘটনা ১৬ আগষ্টৰ নিশা ঘোঘাৰ খাৰকড়ী গাঁৱৰ পৰা আৰম্ভ হৈছিল। এজন যুৱকে আৰক্ষীত চাকৰি লাভ কৰাৰ আনন্দত সুৰাৰ পাৰ্টিৰ আয়োজন কৰিছিল। এই পাৰ্টিৰ বাবে ঘনশ্যাম নামৰ এজন সুৰা সৰবৰাহকাৰীৰ পৰা সুৰা অনা হৈছিল। অভিযোগ অনুসৰি, বিষাক্ত সুৰাখিনি বিদেশী সুৰাৰ বটলত ভৰাই বিক্ৰী কৰা হৈছিল। পাৰ্টিৰ পিছতে বহু লোক অসুস্থ হৈ পৰে। কিছুমান লোকৰ অৱস্থা ইমানেই দ্ৰুতগতিত বেয়া হৈছিল যে তেওঁলোকক হাস্পতাললৈ নিয়াৰ সুযোগো পোৱা নগ’ল। ভাবনগৰৰ তিনিজন যুৱকে ঘৰত বমি কৰি কৰি মৃ*ত্যুক সাৱটি লয়। স্থানীয় লোকসকলৰ দাবী অনুসৰি, এই বিষাক্ত সুৰা বহু গাঁৱলৈ সৰবৰাহ কৰা হৈছিল। পিছদিনা আন অঞ্চলতো একেধৰণৰ অসুস্থতাৰ ঘটনা পোহৰলৈ আহে।

বিষাক্ত সুৰা প্ৰস্তুত কৰা লোকজনৰো মৃত্যু

গুজৰাট আৰক্ষীয়ে এই ঘটনাৰ সৈতে জড়িত এতিয়ালৈকে ১৫জন লোকক গ্ৰেপ্তাৰ কৰিছে। ইয়াৰে ১৩জন ভাবনগৰৰ বাসিন্দা আৰু অবৈধ সুৰা সৰবৰাহৰ সৈতে জড়িত বুলি আৰক্ষীয়ে জানিবলৈ দিছে। এই ঘটনাৰ মূল অভিযুক্ত ৰইছ আৰু জুবেইৰ মধ্যপ্ৰদেশৰ উজ্জয়িনীৰ বাসিন্দা। দুয়োজনকো আৰক্ষীয়ে গ্ৰেপ্তাৰ কৰিছে। তদন্তত মুৰেনাৰ বাসিন্দা নৰেন্দ্ৰ যাদৱ ওৰফে ‘ডাক্তৰ’ নামৰ এজন লোকৰ নামো পোহৰলৈ আহিছে। আৰক্ষীৰ মতে, ৰইছেই নৰেন্দ্ৰক অবৈধ সুৰা প্ৰস্তুত কৰিবলৈ গুজৰাটলৈ মাতিছিল। নৰেন্দ্ৰ আৰু তেওঁৰ সহযোগীসকলে ভাবনগৰৰ স্থানীয় সুৰা সৰবৰাহকাৰী গৌতম চোলংকীৰ সৈতে মিলি এই ভেজাল সুৰা প্ৰস্তুত কৰিছিল। সুৰা কাণ্ডৰ প্ৰায় তিনিদিন পূৰ্বে নৰেন্দ্ৰ আৰু তেওঁৰ সহযোগীসকলে বিষাক্ত সুৰাৰ ২৫টা কাৰ্টন প্ৰস্তুত কৰিছিল বুলি আৰক্ষীৰ তদন্তত প্ৰকাশ পাইছে। এই সুৰা সেৱন কৰাৰ ফলতে বহু লোক অসুস্থ হৈ পৰে আৰু কেইবাজনো লোকৰ মৃত্যু হয়। আচৰিতভাৱে, নৰেন্দ্ৰ যাদৱেও সেই নকল সুৰা সেৱন কৰিছিল আৰু তেওঁৰো মৃত্যু হৈছে।

১৩টা সুৰাৰ কাৰ্টনৰ সন্ধান নাই

আৰক্ষীৰ প্ৰাথমিক তদন্ত অনুসৰি, উজ্জয়িনীৰ পৰা ভাবনগৰলৈ মুঠ ২৮টা নকল সুৰাৰ কাৰ্টন অনা হৈছিল। ইয়াৰে ১৫টা কাৰ্টন উদ্ধাৰ কৰা হৈছে। কিন্তু বাকী ১৩টা কাৰ্টনৰ এতিয়াও সন্ধান পোৱা নাই। এই সুৰা বহু গাঁৱলৈ গৈ সৰবৰাহৰ আশংকাত প্ৰায় ১,০০০খন গাঁৱত সতৰ্কতা জাৰি কৰা হৈছে। প্ৰশাসনে লোকসকলক সন্দেহজনক সুৰা সেৱন নকৰিবলৈ সতৰ্ক কৰি দিছে।

ভাবনগৰ চহৰৰ এক্সিকিউটিভ মেজিষ্ট্ৰেট কিশন বি. চান্দালিয়াই জানিবলৈ দিয়া মতে, বৃহস্পতিবাৰে ১০জন লোকক হাস্পতালৰ পৰা ঘৰলৈ যাবলৈ দিয়া হৈছে। আনহাতে, হাস্পতাললৈ অহা ১৮জন লোকক চিকিৎসকে পৰীক্ষা কৰে যদিও তেওঁলোকক ভৰ্তি কৰাৰ প্ৰয়োজন হোৱা নাছিল। বৰ্তমান প্ৰশাসনৰ চিকিৎসা দলে ঘটনাৰ সৈতে জড়িত লোকসকলৰ তথ্য সংগ্ৰহ কৰি পৰীক্ষা চলাই আছে। অসুস্থ লোকসকলৰ তেজৰ নমুনা ফৰেনছিক ছায়েন্স লেবৰেটৰী (FSL) আৰু আন পৰীক্ষাগাৰলৈ প্ৰেৰণ কৰা হৈছে। তদন্তৰ ফলাফলৰ পিছত নকল সুৰাত কি বিষাক্ত পদাৰ্থ আছিল, সেই বিষয়ে অধিক তথ্য পোহৰলৈ অহাৰ সম্ভাৱনা আছে।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ