পাক অধিকৃত কাশ্মীৰত ভয়াৱহ হৈ পৰিছে পৰিস্থিতি। অঞ্চলটোৰ জইণ্ট আৱামী এক্সন কমিটী নামৰ সংগঠনটোক চৰকাৰৰ দ্বাৰা নিষিদ্ধ ঘোষণা কৰাৰ পিছতে উত্তপ্ত হৈ পৰে অঞ্চলটোৰ পৰিস্থিতি। উত্তপ্ত পৰিস্থিতিৰ মাজতে পাক অধিকৃত কাশ্মীৰৰ ৰাওলকোটত প্ৰতিবাদকাৰী আৰু নিৰাপত্তাৰক্ষীৰ মাজত ভয়াৱহ সংঘৰ্ষ হয়। এই সংঘৰ্ষত এই পৰ্যন্ত ৪জন নিৰাপত্তাৰক্ষীসহ ১১গৰাকী লোকে প্ৰাণ হেৰুৱাইছে। আনহাতে সংঘৰ্ষত আহত হৈছে ৭০জনতকৈও অধিক লোক। ইপিনে ১০ জুনত পাক অধিকৃত কাশ্মীৰৰ মুখ্য চহৰ মুজাফ্ফৰাবাদস্থিত বিধানসভাৰ সন্মুখত বৃহৎ প্ৰতিবাদী কাৰ্যসূচী ৰূপায়ণ কৰিছে JAAC নামৰ সংগঠনটোৱে। ইপিনে পাক চৰকাৰে কোনো কাৰণতে সংগঠনটোৰ এই প্ৰতিবাদী কাৰ্যসূচী ৰূপায়ণ কৰিবলৈ দিয়া নহ’ব বুলি সকীয়াই দিছে। প্ৰতিবাদৰ ফলত বিগত দেওবাৰৰ পৰাই অঞ্চলটোত চেপা উত্তেজনা বিৰাজ কৰিছে।
এই প্ৰতিবাদৰ কাৰণ কি?
বিগত কিছুদিনৰ পৰাই পাক অধিকৃত কাশ্মীৰত বিভিন্ন সংগঠনে যুটীয়াভাৱে পাক চৰকাৰ বিৰোধী শ্লোগানেৰে প্ৰতিবাদমুখৰ হৈ আছে। ৪৫জনীয়া বিধানসভাৰ ১২খনকৈ আসন নতুনকৈ সংৰক্ষণ কৰাৰ বিৰোধিতাৰে আৰম্ভ হৈছিল এই প্ৰতিবাদ। এই আসনকেইখন পাক অধিকৃত কাশ্মীৰৰ বাহিৰৰ অৰ্থাৎ পাকিস্তানৰ অন্য অঞ্চলৰ পৰা অহা শৰণাৰ্থীৰ বাবে সংৰক্ষণ কৰাৰ বিৰোধিতাৰে JAAC-এ আৰম্ভ কৰিছিল এই প্ৰতিবাদ। এই বিধেয়কৰ উপৰিও দামবৃদ্ধি, পাকিস্তানৰ অন্য অঞ্চলৰ তুলনাত পাক অধিকৃত কাশ্মীৰক ৰাজনৈতিকভাৱে উপেক্ষা কৰাকে ধৰি কেইবাটাও বিষয়ক লৈ JAAC নামৰ সংগঠনটোৱে চলাইছিল প্ৰতিবাদী কাৰ্যসূচী
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
