‘মুখ্যমন্ত্ৰীয়ে অচিৰেই এই ঘটনাক লৈ ব্যৱস্থা লওক৷ আমি ৫ দিন বান্ধি দিছো৷ অচিৰেই এই আৰক্ষীৰ বিৰুদ্ধে ব্যৱস্থা লওক৷ অন্যথা আমিও বিহিত ব্যৱস্থা ল’বলৈ বাধ্য হম৷ তদন্ত আৰু নিলম্বনতেই ঘটনাটো শেষ নকৰি অসম আৰক্ষীয়ে যাতে কোনো সাধাৰণ মানুহৰ ওপৰতেই জপিয়াই নপৰে তাৰবাবে বিহিত ব্যৱস্থা ল’ব লাগে৷’ এই মন্তব্য আমাৰ নহয় এই মন্তব্য কৰিছে কটনৰ কেইবাগৰাকীও ছাত্ৰই৷
OC ভাৰ্গৱ বৰবৰাই কটনৰ ছাত্ৰ তথা ডেলিভাৰি বয় হিচাপে কৰ্মৰত জ্ঞানদ্বীপক শাৰীৰিকভাৱে অপদস্ত কৰাক লৈ উত্তাল হৈ আছে ৰাজ্য৷ ৰাজ্যৰ প্ৰায়সংখ্যক লোকেই এই ঘটনাক লৈ আৰক্ষী বিষয়া ভাৰ্গৱ বৰবৰাক নিন্দা কৰিছে৷ আৰক্ষীয়ে সাধাৰণ লোকক নিৰাপত্তা দিয়াৰ সলনি সুযোগ পালেই কিয় সাধাৰণ জনতাৰ ওপৰত জঁপিয়াই পৰে সেই প্ৰশ্নও উত্থাপিত হৈছে৷ তেনে সময়তে ভাইৰেল হৈছে হিমন্ত বিশ্ব শৰ্মাৰো এক মন্তব্য৷
মুখ্যমন্ত্ৰী হিমন্ত বিশ্ব শৰ্মাই প্ৰায় দুবছৰ পূৰ্বেই আৰক্ষীক উদ্দেশ্যি কৰিছিল বিশেষ মন্তব্য৷ মুখ্যমন্ত্ৰীগৰাকীয়ে আৰক্ষীক উদ্দেশ্যি কৈছিল, ‘পুলিছৰ মাইণ্ডছেটত আছে যে দুখীয়া মানুহৰ কাৰণে আইন নাই৷ দুখীয়া মানুহক গালিগালাজ কৰিব পাৰি৷ আমাৰ এজন সাধাৰণ নাগৰিকৰ বিৰুদ্ধে পুলিছে কোনো কথাত সৰু গালিগালাজ এটাও কৰিব নোৱাৰিব৷ শ্ৰম কৰা মানুহ, কষ্ট কৰা মানুহ দেখিলে অফিচাৰৰ পৰা কনিষ্টবললৈকে সকলোৱে সন্মান কৰিব লাগিব৷ এই শ্ৰম কৰা মানুহৰ বাবেই আমাৰ এই সমাজ চলি আছে৷ থানাত কোনোবা দুখীয়া মানুহ এজাহাৰ দিবলৈ আহিলে কোনো আৰক্ষীয়ে সেই লোকৰ পৰা ধন ল’ব নালাগে৷ কাৰণ তেওঁৰ ঘৰত অলৰেডী চুৰি হৈছে৷ বিপদত পৰিহে তেওঁ আৰক্ষীৰ ওচৰলৈ আহিছে৷ চোৰেও নিলে, পুলিছেও নিলে সাধাৰণ মানুহৰ কি থাকিব? মই মুখ্যমন্ত্ৰী হোৱাৰ পৰা এই কথা মন কৰি আছো৷
মোৰ বাহন গ’লেও মই দেখো পুলিছে মোৰ গাড়ীৰ আগত এখন ৰিক্সা দেখা পালে চিধাই লাঠি উলিয়াই৷ সি কি দোষ কৰিছে? মুখ্যমন্ত্ৰীৰ বাহনৰ আগত যি যাত্ৰাহে কৰি আছে৷ সি কেনেকৈ জানিব এই সময়ত এই ৰাস্তাৰে চিফ মিনিষ্টাৰ ঘৰৰ পৰা ওলাই আহিব! আমাৰ থানৰ এছ আই, ট্ৰেফিকসকলে ৰিস্কাচালকৰ ওপৰত হাত উঠোৱাৰ কোনো দৰকাৰ নাই৷ সি দুটকা উপাৰ্জনৰ বাবেহে ঘৰৰ পৰা ওলাই আহিছে৷ লাগিলে মুখ্যমন্ত্ৰীয়ে দুই মিনিট ৰৈ দিব৷ নিৰীহ মানুহৰ আগত লাঠি লোৱাৰ স্বভাৱ অসম আৰক্ষীয়ে কমাব লাগিব৷ এজন শ্ৰমিকৰ মুখ্যমন্ত্ৰীতকৈ সন্মান বেছি৷ কাৰণ সি শ্ৰম কৰে৷ পুলিছৰ চকুত তেওঁৰ সন্মান মুখ্যমন্ত্ৰীতকৈ বেছি হ’ব লাগে৷ আৰু অপৰাধীৰ ক্ষেত্ৰত কিন্তু পুলিছৰ লাঠি কৃষ্ণৰ সুদৰ্শন চক্ৰৰ দৰে ঘূৰিব লাগে৷ তাত বাধা দিয়াৰ কথা নাই৷ অপৰাধীৰ লগতহে আমি জিৰ টলাৰেন্স৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
