ৰাহুল দ্ৰাবিড়ৰ উভতনি যাত্ৰা, পুনৰ মূখ্য প্ৰশিক্ষক পদত…
ৰাহুল দ্ৰাবিড় টিম ইণ্ডিয়াৰ পৰা বিচ্ছিন্ন হৈছে যদিও ক্ৰিকেট খেলপথাৰত পুনৰ দেখা পোৱা যাব। কিয়নো পুনৰবাৰ মূখ্য প্ৰশিক্ষক হিচাপে উভতি অহাৰ সম্ভাৱনা দা ৱাল খ্যাত খেলুৱৈ তথা প্ৰশিক্ষকগৰাকীক। অৱশ্যে এইবাৰ ভাৰতীয় দলৰ হৈ নহয়, আই পি এল ২০২৫ত ৰাজস্থান ৰয়েলছ দলৰ সৈতে দেখা যাব ৰাহুল দ্ৰাবিড়ক।
দ্ৰাবিড়ক ৰাজস্থান ৰয়েলছৰ মুখ্য প্ৰশিক্ষকৰ পদত দেখা যাব। ইয়াৰ পূৰ্বে ৰাজস্থান ৰয়েলছৰ হৈ আই পি এলত খেলাৰ লগতে দলটোৰ মেণ্টৰ হিচাপেও কাম কৰিছিল।
টিম ইণ্ডিয়াৰ সৈতে প্ৰশিক্ষক হিচাপে ৰাহুল দ্ৰাবিড়ৰ কাৰ্যকাল ২০২৪ চনৰ টি-২০ বিশ্বকাপলৈকে আছিল। ভাৰতে টি-২০ বিশ্বকাপ জয় কৰাৰ পিছত দ্ৰাবিড়ে এই ভূমিকাৰ পৰা পদত্যাগ কৰে আৰু এতিয়া গৌতম গম্ভীৰ দলটোৰ মুখ্য প্ৰশিক্ষক। দ্ৰাবিড়ে টিম ইণ্ডিয়া এৰি যোৱাৰ পিছৰে পৰা তেওঁ ইয়াৰ পিছত কি কৰিব সেই সম্পৰ্কে জল্পনা-কল্পনাৰ সৃষ্টি হৈছিল।
সেই জল্পনা-কল্পনাৰ এতিয়া অন্ত পৰিছে। সূত্ৰ অনুসৰি আই পি এল ২০২৫ৰ পূৰ্বে দ্ৰাবিড়ে ৰাজস্থান ৰয়েলছত যোগদান কৰিব। তেওঁক দলৰ মুখ্য প্ৰশিক্ষকৰ পদৰ প্ৰস্তাৱ দিয়া হৈছে। আলোচনা অন্তিম পৰ্যায়ত।
উল্লেখ্য যে, ২০১২ আৰু ২০১৩ চনত ৰাজস্থান ৰয়েলছৰ হৈ অধিনায়ক হিচাপে খেলিছিল ৰাহুল দ্ৰাবিড়ে৷ লগতে দুবছৰ ধৰি দলৰ মেণ্টৰ হৈ আছিল। ইয়াৰ পিছত দ্ৰাবিড়ে ২০১৬ চনত দিল্লী কেপিটেলছত যোগদান কৰাৰ পিছত বেংগালুৰুৰ নেশ্যনেল ক্ৰিকেট একাডেমীৰ নেতৃত্ব দিয়ে। শেষত ২০২১ চনত ৰবি শাস্ত্ৰীৰ ঠাইত তেওঁ ভাৰতীয় দলৰ মুখ্য প্ৰশিক্ষক হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
