অপেক্ষাৰ অন্ত, আৰ চি বিৰ নতুন অধিনায়ক ঘোষণা, ভাৰতীয় দলৰ পৰা বাহিৰ হ’লেও আই পি এলত অধিনায়ক
ৰয়েল চেলেঞ্জাৰছ বাংগালুৰুৰ নতুন অধিনায়ক ঘোষণা। আই পি এল ২০২৫ৰ বাবে দলটোৰ কমাণ্ড অৰ্পন কৰা হৈছে ৰজত পাটিদাৰৰ হাতত। বিগত দুটা ছিজনত আৰ চি বিৰ হৈ খেলি থকাৰ সময়ত ৰজতৰ প্ৰদৰ্শন অতিকে ভাল আছিল।
আনহাতে ঘৰুৱা ক্ৰিকেট মুস্তাক আলী প্ৰতিযোগিতাত তেওঁৰ অধিনায়কত্বত মধ্যপ্ৰদেশ দলটোক প্ৰতিযোগিতাৰ ফাইনেললৈ লৈ গৈছিল।
আৰম্ভনিতে অনুৰাগীয়ে ভাবিছিল আৰ চি বিৰ অধিনায়কত্ব আকৌ এবাৰ বিৰাট কোহলীৰ হাতলৈ যাব। পাছে বিৰাটে অধিনায়কত্বৰ প্ৰতি আগ্ৰহ প্ৰকাশ নকৰাৰ বাবে ৰয়েল চেলেঞ্জাৰছ বাংগালুৰে ৰজতক আগন্তুক ছিজনৰ বাবে অধিনায়ক হিচাপে নিযুক্তি দিয়াৰ সিদ্ধান্ত লৈছে।
উল্লেখ্য যে, ২০২১ চনত আই পি এলত অভিষেক ঘটিছিল ৰজতৰ। আৰচিবিৰ হৈ ইণ্ডিয়ান প্ৰিমিয়াৰ লীগৰ প্ৰথম ছিজন খেলিছিল ৰজতে, কিন্তু তেওঁৰ প্ৰদৰ্শন বিশেষ নাছিল। ইয়াৰ পিছত তেওঁ আই পি এল ২০২২ত বিক্ৰী নোহোৱাকৈয়ে থাকে।
কিন্তু ২০২২ চনতেই যেতিয়া লুভনিথ চিছ’দিয়া আঘাতপ্ৰাপ্ত হৈছিল, তেতিয়া ৰজতে ৰয়েল চেলেঞ্জাৰছ বেংগালুৰু কেম্পত ফিট হৈ প্ৰৱেশ কৰে আৰু তাৰ পিছৰে পৰা দলৰ সদস্য হৈ আছে ৰজত।
এলিমিনেটৰ মেচত শতকীয় ইনিংছ খেলি তেওঁ সকলোৰে দৃষ্টি আকৰ্ষণ কৰিছিল। অৱশ্যে আঘাতৰ বাবে আই পি এল ২০২৩ খেলিব পৰা নাছিল। ২০২৪ চনত পুনৰ বেটেৰে আলোড়নৰ সৃষ্টি কৰি ১৭৭ ষ্ট্ৰাইক ৰেটত খেলি ৩৯৫ ৰান সংগ্ৰহ কৰিছিল। ইয়াৰ পিছত আৰ চি বিয়ে আই পি এল ২০২৫ৰ মেগা নিলামৰ পূৰ্বে ৰজতক ধৰি ৰখাৰ সিদ্ধান্ত লয়। কিন্তু বৰ্তমানে ৰজত ভাৰতীয় ক্ৰিকেট দলৰ সদস্য নহয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
