অসম লাইভ ২৪ঃ ধর্ষণ— কাকতে, টিভিয়ে সততে শুনিবলৈ পোৱা এটা শব্দ। এই শব্দটোৱেই এটা বিশ্বজুৰি আতংকৰ কাৰণ হৈ পৰিছে। সমাজৰ মাৰাত্মক ব্যাধিৰূপে চিহ্নিত হৈছে ধর্ষণকার্য। এচাম বিকৃত মানসিকতাৰ লোকৰ কবলৰ পৰা সাৰি যাব পৰা নাই ফুলকুমলীয়া শিশু। সাৰিব পৰা নাই কিশোৰী, যুৱতী তথা বয়স্থ মহিলা৷ ধর্ষণকাৰীৰ বিৰুদ্ধে ভাৰতকে ধৰি বিভিন্ন দেশত কঠোৰতম শাস্তিৰ বিধান আছে যদিও সেই শাস্তিক ভ্ৰূক্ষেপ নকৰি সময়-সুযোগ পালেই এচামে উদ্যত হৈ উঠে এনে জঘন্য কর্মৰ বাবে ৷ যাৰ ফলত দিনক দিনে বৃদ্ধি পাব ধৰিছে ধর্ষণৰ ঘটনা। গতিকে এনে জঘন্য অপৰাধ নির্মূল কৰাৰ বাবে শিশুক যৌন আতিশায্য চলোৱাৰ অপৰাধীৰ বিৰুদ্ধে কঠোৰ আইন প্ৰয়োগৰ পদক্ষেপ গ্ৰহণ কৰিছে কাজাখাস্তানে৷ দেশখনত শিশুক যৌন উৎপীড়ন চলোৱা অপৰাধীক নপুংসক বনাই আছে৷ আনকি যৌন অপৰাধীক সতর্ক কৰাৰ বাবে প্ৰশাসনে গণমাধ্যমৰ জৰিয়তে প্ৰচাৰো চলাইছে৷ বিট্ৰেইনৰ কাকত ‘ডেইলি মেইল’ৰ ৰিপোর্ট অনুসৰি কাজাখাস্তানত নিয়মিতভাৱে এনে অপৰাধীক ইনজেকচনৰ জৰিয়তে নপুংসক বনোৱা হৈ আছে৷ জে’লত দীর্ঘদিনীয়া শাস্তি ভোগ কৰাৰ পিছতো ইয়াৰ পৰা হাত সাৰিব পৰা নাই শিশুক যৌন উৎপীড়ন চলোৱা অপৰাধী৷ জে’লৰ পৰা বাহিৰ ওলোৱাৰ পিছতো এনে অপৰাধীক ইনজেকচন দিয়াৰ বিধান কৰা হৈছে৷ নপুসংক বনোৱা এজন অপৰাধীয়ে ইনজেকচন লোৱাৰ পিছত টেলিভিচনৰ পর্দাত ইয়াক বর্বৰ খাখ্যা দিছে আৰু এই প্ৰক্ৰিয়াৰ ওপৰত নিষেধাজ্ঞা জাৰি কৰাৰ দাবী জনাইছে৷ তেওঁ কয় যে তেওঁৰ আটাইতকৈ ডাঙৰ শত্ৰুকো এই শাস্তি দিয়াতো নিবিচাৰে৷ আন এজন অপৰাধীয়ে টেলিভচনৰ সন্মুখত কয়— ‘মই দুখিত যে মই এনেকুৱা অপৰাধ কৰিছো৷ মই মোৰ উদাহৰণৰ দ্বাৰা অন্য পুৰুষক ক’ব বিচাৰো যে এনেকুৱা ভয়ানক অপৰাধ কৰিব নালাগে৷ মই তেওঁলোকক ক্ষমা ভিক্ষা বিচাৰিছো, যিয়ে নপুংসক বনোৱাৰ আদেশ দিছে, তেওঁ এই আদেশ প্ৰত্যাহাৰ কৰা উচিত৷ মোৰ বয়স বহুত কম৷’ স্কুলীয়া ছাত্ৰী বলাৎকাৰ কৰা এজন ৫০ বছৰীয়া অপৰাধীয়ে নপুংসক বনোৱা এই শাস্তিৰ বিষয়ে জানি হুক হুকাই কান্দি উঠিছে৷ কেৱল এয়াই নহয় এনেকুৱা অপৰাধী জে’লৰ পৰা ৰেহাই হোৱাৰ পিছত তেওঁলোকৰ ফটো, নাম আৰু ঠিকনা প্ৰকাশ কৰাৰো আইনী বিধান আছে৷ কাজাখাস্তান চৰকাৰৰ দাবী যে এই কঠোৰ শাস্তিৰ বিধানৰ বাবে দেশখনত শিশুৰ ওপৰত হোৱা যৌন উৎপীড়নৰ ঘটনা ১৫ শতাংশ নিম্নগামী হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
