অসম লাইভ২৪ঃ যদিও দুয়ো পৃথক দুয়োখন দেশৰ খেলুৱৈ তথাপিও দুয়োৰে মাজৰ সম্পৰ্ক ভাতৃত্বৰ৷ ৰোহিত শৰ্মা আৰু বাবৰ দুয়ো ভাল বন্ধু৷ বিভিন্ন সময়ত ৰোহিত আৰু বাবৰে এজনে আনজনৰ প্ৰশংসাও কৰে৷ ভাৰত আৰু পাকিস্তান দুয়োখন বৈৰী দেশৰ সম্পৰ্কক লৈ দুয়োৱে দাঙি ধৰা বাখ্যাই এতিয়া সমগ্ৰতে লাভ কৰিছে চৰ্চা৷
দুয়োৱে সংবাদমেলত উল্লেখ কৰা অনুযায়ী, ভাৰত-পাকিস্তানৰ ক্ৰিকেটাৰসকলৰ মাজত এটা ভাল সম্পৰ্ক পূৰ্বৰে পৰাই আছে৷ ভাৰত-পাকিস্তানৰ একোখন খেলক লৈ সৃষ্টি হোৱা উত্তেজনা, চাপ, প্ৰত্যাশাই কেতিয়াও দুয়োপক্ষৰ খেলুৱৈসকলৰ মাজৰ সম্পৰ্কক প্ৰভাৱিত নকৰে। ভাৰতীয় দলৰ ৰোহিত শৰ্মা, বিৰাট কোহলী, কে এল ৰাহুল, ঋষভ পন্থা আৰু পাকিস্তানী ক্ৰিকেটাৰ বাবৰ আজম, শ্বাহিন শ্বাহ আফ্ৰিদি আৰু তেওঁলোকৰ প্ৰশিক্ষক মহম্মদ ইউছুফ আৰু চাকলাইন মুস্তাকৰ মাজৰ সৌহাৰ্দ্যপূৰ্ণ সম্পৰ্ক UAE-ত অনুষ্ঠিত এছিয়া কাপত পৰিস্ফুত হৈছিল৷
টি-২০ বিশ্বকাপৰ অষ্টম সংস্কৰণ আৰম্ভ হোৱাৰ আগতে মেলবৰ্ণত সংবাদমাধ্যমক সম্বোধন কৰিবলৈ ১৬ টা দলৰ অধিনায়কসকল দুটা গোটত একত্ৰিত হৈছিল। ভাৰতৰ অধিনায়ক ৰোহিত শৰ্মা আৰু পাকিস্তানৰ বাবৰ আজম দ্বিতীয় গ্ৰুপৰ অংশ আছিল য’ত ৱেষ্ট ইণ্ডিজৰ অধিনায়ক নিকোলাছ পুৰাণ, দক্ষিণ আফ্ৰিকাৰ অধিনায়ক টেম্বা বাভুমা, বাংলাদেশৰ অধিনায়ক চাকিব আল হাছান, জিম্বাবোৱেৰ অধিনায়ক ক্ৰেগ এৰভাইন আৰু স্কটলেণ্ডৰ অধিনায়ক ৰিচাৰ্ড বেৰিংটনো আছিল।
সংবাদমেলতে ৰোহিত আৰু বাবৰে এজনে আনজনৰ প্ৰশংসাত কয়,‘ ৰোহিত মোতকৈ ডাঙৰ, মই যিমানদুৰ সম্ভৱ হয় সদায়ে তেওঁৰ পৰা শিকিবলৈ চেষ্টা কৰি আহিছো৷’ ৰোহিত সম্পৰ্কে বাবৰে এই মন্তব্য কৰাৰ পিছতেই ৰোহিতেও কয়,‘আমি খেলুৱৈ হিচাপে দুয়োখন দেশক প্ৰতিনিধিত্ব কৰিলেও আমাৰ সম্পৰ্ক ভাতৃসুলভ৷ আপোনালোকে মিছাতেই আমাৰ সম্পৰ্ক বোৰক লৈ প্ৰশ্ন নকৰিব৷ আমি এজনে আনজনক লগ পালেই সোধো খবৰ কেনে, পৰিয়ালত সকলোৰে ভালনে?’ ২২ অক্টোবৰৰ পৰা আৰম্ভ হ’ব লগা টি-২০ বিশ্বকাপৰ চুপাৰ-১২ত ভাৰত-পাকিস্তানৰ মাজত খেলা অনুষ্ঠিত হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
