অসম লাইভ ২৪ঃ মৃত্যু নিচেই কাষত জানি জীৱনৰ শেষ সময়ছোৱাত তেওঁ নিজেই লিখি সুৰ দিছিল, ‘মই নাথাকিলেও সাজৰ তৰায়ে মোৰেই কথাকেই ক’ব…৷’ কম সময়তেই তেওঁ অসমীয়া সংগীতৰ ক্ষেত্ৰখনত নিজকে প্ৰতিষ্ঠা কৰিছিল৷ ১৫ অক্টোবৰ, শিল্পী জয়ন্ত হাজৰিকাৰ মৃত্যু তিথি৷ খুব কম সময়তে জীৱন নাট সামৰি আঁতৰি যোৱা শিল্পী জয়ন্ত হাজৰিকাৰ গীতে আজিও তেওঁক জীঁপাল কৰি ৰাখিছে৷
জয়ন্ত হাজৰিকাৰ ৪৫ সংখ্যক মৃত্যু তিথিত বিগত বৰ্ষৰ দৰে এইবাৰো জয়ন্ত হাজৰিকা স্মৃতি উদ্যানত অনুস্থিত হৈছে স্মৃতি তৰ্পণ কাৰ্যসূচী৷
শিল্পী জেপি দাস, পত্নী মনিশা হাজৰিকাকে ধৰি উপস্থিত কেইবাগৰাকীও গণ্য-মান্য ব্যক্তিৰ উপস্থিতিত মনিশা হাজৰিকাই স্বামীক লৈ ক’লে বিশেষ কিছু কথা৷ মনিশা হাজৰিকাই তেওঁৰ মন্তব্যত কয়, ‘বহু নাৰীৰ দৰে ময়ো স্বামীহীনা। অথচ মই স্বামীহীনা বুলি অনুভৱ কৰা নাই৷ মোৰ স্বামী মানুহৰ মাজত আজিও জীয়াই আছে৷’
১৯৬০-ৰ দশকত অসমীয়া সংগীত জগতত আত্মপ্ৰকাশ কৰা জয়ন্ত হাজৰিকাই ১৯৭৭ চনৰ ১৫ অক্টোবৰৰ দিনটোতেই পশ্চিমবংগৰ এখন চিকিৎসালয়ত বিদায় মাগে৷ খুব কম সময়তে জনপ্ৰিয় হৈ পৰা জয়ন্ত হাজৰিকাই তেওঁৰ গীতৰ সুৰ সন্দৰ্ভত কৈছিল, ‘মই সূত্ৰগতভাৱে সুৰ বিচাৰি নুফুৰোঁ৷ সুৰ মই ভালপাওঁ৷ উৎস কি বা ক’ত থাকে সেয়া মই নিজেই নাজানো৷ কাৰণ পৃথিৱীখনেই সুৰৰ তৰংগেৰে ভৰপূৰ৷’ ৩৪ বছৰীয়া চুটি জীৱনকালত জয়ন্ত হাজৰিকাই সৃষ্টি কৰি থৈ যোৱা গান আজিও জনপ্ৰিয়তাৰ শীৰ্ষত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
