ৰাছিয়াৰ ইউক্ৰেইন আক্ৰমণে মংগলবাৰে ১৩ টা দিনত ভৰি দিলে৷ এই তেৰটা দিনত ৰাছিয়াই মাজতে চহৰকেন্দ্ৰিক নামমাত্ৰ যুদ্ধবিৰতি ঘোষণা কৰিলেও ইউক্ৰেইনৰ বিৰুদ্ধে আক্ৰমণ অব্যাহত ৰাখিছে৷ ইফালে নিজ দেশৰ যুদ্ধ বিৰোধী জনতাৰ ওপৰত হিংস্ৰ জন্তুৰ দৰে জঁপিয়াই পৰিছে ভ্লাদিমিৰ পুটিনৰ চৰকাৰ৷ যুদ্ধ বিৰোধী মিছিলত অংশগ্ৰহণ কৰা হাজাৰ হাজাৰ ৰাছিয়ান জনতাক পোতাশাললৈ প্ৰেৰণ কৰিছে ৰাষ্ট্ৰপতি পুটিনে৷
ইতিমধ্যে ৰাছিয়াৰ আক্ৰমণত ইউক্ৰেইনৰ প্ৰায়বোৰ প্ৰধান চহৰেই ধ্বংসস্তূপত পৰিণত হৈছে৷ ইফালে ৰাষ্ট্ৰসংঘই প্ৰকাশ কৰা অনুসৰি ৰুছ বাহিনীৰ আক্ৰমণত ৩৫০ৰো অধিক সাধাৰণ নাগৰিকৰ মৃত্যু হৈছে৷ ৰাছিয়াৰ আক্ৰমণে তেৰটা দিন অতিক্ৰম কৰাৰ পিছতো ৰুছ ৰাষ্ট্ৰপতি ভ্লাদিমিৰ পুটিনে কি বিচাৰিছে কোনেও অনুমান কৰিব পৰা নাই৷
ইফালে ইউক্ৰেইন আক্ৰমণ কৰি ৰাছিয়া সমগ্ৰ বিশ্বতে প্ৰায় অকলশৰীয়া হৈ পৰিছে৷ আমেৰিকাসহ ইউৰোপীয়ান ইউনিয়নেও ৰাছিয়াৰ বিৰুদ্ধে অৰ্থনৈতিক প্ৰতিবন্ধকতা আৰোপৰ লগতে সকলোধৰণৰ নিষেধাজ্ঞা বলৱৎ কৰিছে৷ বিশ্বৰ সকলো দেশেই ৰাছিয়াৰ পৰা খাৰুৱা তেলৰ আমদানি বন্ধ কৰি দিছে৷ ইয়াৰ ফলত ৰাছিয়ান জনসাধাৰণে অৰ্থনৈতিক সংকটৰ সন্মুখীন হ’বলৈ আৰম্ভ কৰিছে৷
লগতে পঢ়ক কি হ’ব বলিউদৰ ছবি ‘দ্য কাশ্মীৰ ফাইলছ’ৰ? কাইলৈ শুনানি বোম্বে উচ্চ ন্যায়ালয়ত
ৰাছিয়াৰ বৃহৎসংখ্যক জনতাই ইউক্ৰেইন আক্ৰমণৰ তীব্ৰ বিৰোধিতা কৰা পৰিলক্ষিত হৈছে৷ দেশখনৰ বিভিন্ন চহৰত যুদ্ধ বিৰোধী জনতাই প্ৰতিবাদ সাব্যস্ত কৰিছে৷ এই প্ৰতিবাদী জনতাৰ বিৰুদ্ধে ৰাষ্ট্ৰপতি ভ্লাদিমিৰ পুটিনে চূড়ান্ত একনায়কত্ববাদী আচৰণ কৰা দেখা গৈছে৷ যুদ্ধ বিৰোধিতাৰে ৰাজপথত মিছিল উলিওৱা অতি কমেও ১৩ হাজাৰ ৰাছিয়ান প্ৰতিবাদকাৰীক কাৰাগাৰলৈ নিক্ষেপ কৰিছে ভ্লাদিমিৰ পুটিনে৷
ইমানেই নহয়, ইতিমধ্যে ক্ৰেমলিনে ৰাছিয়াত টিকটক, ফেচবুক আদি বিভিন্ন চ’ছিয়েল মিডিয়াৰ চাইট আৰু ৱেবচাইট আদিকো দেশখনত নিষিদ্ধ কৰিবলৈ উঠিপৰি লাগিছে৷ সামাজিক মাধ্যমত ৰাছিয়ান সেনাৰ বৰ্বৰতা প্ৰচাৰ বন্ধ কৰাৰ মানসেৰে ৰাছিয়ান প্ৰকাশনে এই পদক্ষেপ গ্ৰহণ কৰা বুলি প্ৰকাশ পাইছে৷
আনহাতে, সামাজিক মাধ্যমত ৰাছিয়ান সেনাৰ বৰ্বৰতা প্ৰচাৰ কৰা লোকৰ বিৰুদ্ধে কঠোৰ শাস্তিও ঘোষণা কৰা হৈছে৷ এনে ধৰণৰ প্ৰচাৰক ভুৱা প্ৰচাৰ বুলি গণ্য কৰি প্ৰচাৰ কৰা লোকক ১৫ বছৰ পৰ্যন্ত কাৰাবাস আৰু জৰিমনা বিহা হ’ব৷
লগতে পঢ়ক ৰাজধানী কীয়েভসহ চাৰি চহৰত যুদ্ধবিৰতি ৰাছিয়াৰ; নাটক আখ্যা ইউক্ৰকেইনৰ
ইয়াৰ পিছতে পশ্চিমীয়া সংবাদ মাধ্যমসমূহে ক্ৰেমলিনে সংবাদ মাধ্যমৰ স্বাধীনতাৰ ওপৰত নিয়ন্ত্ৰণ আনিবলৈ চেষ্টা কৰা বুলি গুৰুতৰ অভিযোগ উত্থাপন কৰিছে, যাতে ৰাছিয়ান সেনাৰ যুদ্ধৰ বৰ্বৰতা বিশ্ববাসীৰ মাজত প্ৰচাৰ হ’ব নোৱাৰে৷
আনফালে বিশ্ব সম্প্ৰদায়ৰ দৰেই বহুজাতিক কোম্পানীসমূহেও ৰাছিয়াৰ যুদ্ধ বিৰোধ কৰা দেখা গৈছে৷ ‘নেটফ্লিক্স’ আৰু ‘টিকটক’-এ ৰাছিয়াত তেওঁলোকৰ সেৱা সম্পূৰ্ণ বন্ধ কৰি দিছে৷ ‘নেটফ্লিক্সে’এ ইতিমধ্যে ৰাছিয়াৰ ৰাষ্ট্ৰীয় দূৰদৰ্শন চেলেনত সম্প্ৰচাৰ বন্ধ কৰা বুলিও ঘোষণা কৰিছে৷
ইয়াৰ মাজতে আটাইতকৈ ডাঙৰ খবৰটো হৈছে হোৱাইট হাউছে ৰাছিয়াত উৎপাদিত তেলৰ ওপৰত বিশ্বৰ নিৰ্ভৰশীলতা হ্ৰাস কৰিবলৈ ভেনিজুৱেলাৰ ওপৰত থকা নিষেধাজ্ঞা উঠাই লোৱাৰ কথা বিবেচনা কৰি আছে। উল্লেখ্য যে কমিউনিষ্ট ৰাষ্ট্ৰ ভেনিজুৱেলাই বৃহৎ পৰিমাণৰ খাৰুৱা তেল উৎপাদন কৰে।
কিন্তু ভেনিজুৱেলাৰ ওপৰত প্ৰতিবন্ধকতা আৰোপ কৰাৰ বাবে বিশ্বৰ বহু দেশলৈ এই খাৰুৱা তেল ৰপ্তানি কৰিব পৰা নাছিল৷ বিশ্বৰ ৰাষ্ট্ৰসমূহে ৰাছিয়াৰ পৰা খাৰুৱা তেল আমদানি বন্ধ কৰাৰ পিছত হোৱা নাটনি পূৰ কৰিবলৈ এতিয়া ভেনিজুৱেলাৰ পৰা খাৰুৱা তেল আমদানিকৰ কথা বিবেচনা কৰা হৈছে৷ যদি আমেৰিকাই ভেনিজুৱেলাৰ ওপৰত থকা প্ৰতিবন্ধকতা উঠাই লয় তেনে ই ৰাছিয়াৰ প্ৰতি বৃহৎ অৰ্থনৈতিক আঘাতৰূপে বিবেচিত হ’ব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
