কল্যাণকামী গৃহত অনৈতিক কাৰ্য, ৪০২ শিশু উদ্ধাৰ, গ্ৰেপ্তাৰ ১৭১ জন
মালয়েছিয়াৰ পৰা পোহৰলৈ আহিছে এক ভয়ংকৰ ঘটনা। আৰক্ষীয়ে অভিযান চলাইছিল এটা ডাঙৰ ইছলামিক ব্যৱসায়িক গোটৰ সৈতে জড়িত ২০টা কল্যাণকামী প্ৰতিষ্ঠানত। অভিযোগ উত্থাপন হৈছে যে এই কল্যাণকামী গৃহসমূহত কন কন ল’ৰা-ছোৱালীক যৌন নিৰ্যাতন চলোৱা হৈছিল।
এই সমগ্ৰ গোচৰত ১০৫ গৰাকী মহিলাকে ধৰি ১৭১ জন লোকক গ্ৰেপ্তাৰ কৰিছে আৰক্ষীয়ে। ইয়াৰ ভিতৰত শিক্ষক আৰু তত্ত্বাৱধায়কসকলো আছে। একে সময়তে ১ৰ পৰা ১৭ বছৰৰ ভিতৰৰ ৪০২টা শিশু আৰু কিশোৰক উদ্ধাৰ কৰা হৈছে।
আৰক্ষীয়ে ব্যৱস্থা গ্ৰহণ কৰা ২০টা স্থানৰ ভিতৰত ১৮টা কল্যাণকামী গৃহ মধ্য চেলাংগ’ৰ ৰাজ্যত আৰু ২টা দক্ষিণ নেগেৰী চেম্বিলান ৰাজ্যত।
আৰক্ষী বিষয়াগৰাকীৰ মতে, তেওঁলোকে কল্যাণকামী গৃহত শিশুৰ যৌন শোষণ আৰু দুৰ্ব্যৱহাৰৰ অভিযোগ লাভ কৰিছিল, তাৰ পিছতে এই ব্যৱস্থা গ্ৰহণ কৰা হৈছিল। তথ্য অনুসৰি এই কল্যাণকামী গৃহসমূহ মালয়েছিয়াৰ ইখৱান বিজনেছ গ্ৰুপৰ।
সংবাদমেলত আই জি ৰাজাউদ্দিন হুছেইনে কয় যে এই শিশুসকলক কেৱল তত্ত্বাৱধায়কসকলে যৌন নিৰ্যাতন কৰাই নহয়, তেওঁলোকে নিজৰ মাজতে ভুল কাম কৰিবলৈও বাধ্য হৈছিল। তেওঁ কয় যে যদি কোনো শিশু অসুস্থ হৈ পৰে তেন্তে অৱস্থা গুৰুতৰ নোহোৱালৈকে তেওঁক চিকিৎসা প্ৰদান কৰা নহয়।
আৰক্ষীৰ মতে, শিশুবোৰে যদি কোনো ভুল কৰে, তেন্তে শাস্তি হিচাপে গৰম চামুচেৰে জ্বলাই দিয়া হৈছিল শৰীৰ। কেয়াৰটেকাৰসকলে মেডিকেল চেকিঙৰ নামত শিশুসকলৰ শৰীৰৰ স্পৰ্শকাতৰ অংশ স্পৰ্শ কৰিছিল।
আৰক্ষীয়ে সন্দেহ কৰিছে যে গ্ল’বেল ইখৱান গ্ৰুপে ধৰ্মীয় আৱেগ ব্যৱহাৰ কৰি শিশুক যৌন শোষণ কৰাৰ লগতে ভিক্ষা খোজা ধান্দাত নমাই দিছিল। তদন্তত প্ৰকাশ পাইছে যে কল্যাণ গৃহত বসবাস কৰা সকলো শিশু গ্ল’বেল ইখৱান গ্ৰুপৰ কৰ্মচাৰীৰ সন্তান।
যাক জন্মৰ পৰাই পিতৃ-মাতৃয়ে কল্যাণকামী গৃহত এৰি থৈ গৈছিল। আই জি হুছেইনে কয় যে গোচৰৰ তদন্তৰ সময়ত সকলো শিশুৰ চিকিৎসা পৰীক্ষাও কৰা হ’ব।
গ্ল’বেল ইখৱান গ্ৰুপৰ ৱেবছাইটত প্ৰকাশ পোৱা তথ্য অনুসৰি, ইয়াৰ প্ৰতিষ্ঠা কৰিছিল এজন ধৰ্মগুৰু আছাৰী মহম্মদে। ১৯৯৪ চনত মালয়েছিয়া চৰকাৰে নিষিদ্ধ কৰা মালয়েছিয়াত আল-আৰকাম নামৰ এটা ধৰ্মীয় পন্থা আৰম্ভ কৰিছিল।
২০১০ চনত আছাৰীৰ মৃত্যুৰ পিছত এই গোটটোৱে পুনৰ অপপ্ৰচাৰ আৰম্ভ কৰে। শেহতীয়াকৈ এই গোটটোও ইছলামিক অথৰিটিৰ ৰাডাৰত আহিছিল, দাবী কৰা হৈছিল যে এই গোটটোৱে পুনৰ আল-আৰকাম সম্প্ৰদায়ৰ প্ৰচাৰ কৰিছে।
অৱশ্যে বুধবাৰে গ্ল’বেল ইখৱান বিজনেছ গ্ৰুপে এক বিবৃতি প্ৰকাশ কৰি শিশু শোষণৰ অভিযোগ নাকচ কৰে। ইখোৱান গোটে তদন্তত কৰ্তৃপক্ষক সহযোগিতা আগবঢ়াব বুলি জানিবলৈ দিছে। বিবৃতিটোত কোৱা হৈছে যে কোম্পানীয়ে কোনো ধৰণৰ অবৈধ কাৰ্যকলাপৰ সৈতে আপোচ নকৰে, বিশেষকৈ তেওঁলোকৰ কৰ্মচাৰীৰ সন্তানক যৌন শোষণৰ দৰে গোচৰত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
