কৰ্ডেলিয়া ক্ৰুজ ড্ৰাগছ গোচৰত আৰিয়ান খানক ক্লীণ চিট প্ৰদান কৰিছে নাৰ্ক’টিকছ কণ্ট্ৰল ব্যুৰো(NCB)এ। এই গোচৰত সংস্থাটোৱে দাখিল কৰা চাৰ্জশ্বীটত আন চাৰিজনৰ সৈতে আৰিয়ান খানৰ নাম উল্লেখ কৰা নাই।
অক্টোবৰৰ আৰম্ভণিতে মুম্বাই ক্ৰুজ ড্ৰাগছ গোচৰত গ্ৰেপ্তাৰ কৰা হৈছিল বলীউডৰ ছুপাৰষ্টাৰ শ্বাহৰুখ খানৰ পুত্ৰ আৰিয়ান খানক। কেইবাবাৰো আদালতৰ শুনানি, বহুত নাটকীয় পৰিঘটনাৰ অন্তত ২৬ দিনৰ দীঘলীয়া কাৰাবাস খাটি যোৱা বৰ্ষৰ ২৮ অক্টোবৰত বোম্বাই উচ্চ ন্যায়ালয়ে তেওঁক জামিন প্ৰদান কৰে আৰু অৱশেষত তেওঁ ৩০ অক্টোবৰত কাৰামুক্ত হয়।
৩১ মাৰ্চত বিশেষ ন্যায়াধীশ ভি ভি পাটিলে এজেন্সীটোক বিচাৰ বিভাগৰ অভিযোগনামা দাখিল কৰিবলৈ সময় দিছিল, কিন্তু সংস্থাটোৱে ৬০ দিনৰ বিপৰীতে ইয়াৰ ম্যাদ ৯০ দিনলৈ বৃদ্ধিৰ বাবে আবেদন কৰিছিল।ন্যায়ালয়ে তদন্তকাৰী সংস্থাটোৰ এই আবেদন অগ্ৰাহ্য কৰিছিল৷
লগতে পঢ়ক বিশ্বৰ কণিষ্ঠতম বিলিয়নাৰগৰাকী কোন? জানো আহক তেওঁ কোন?
আৰু এইদৰেই যোৱা ১৮০ দিন ধৰি গোচৰটোৰ তদন্ত কৰি থকা NCBৰ চাৰ্জশ্বীট দাখিলৰ নিৰ্ধাৰিত সময় যোৱা ৩১ মাৰ্চত অন্ত পৰে৷ আনহাতে, শুকুৰবাৰে নিৰ্দেশ দিয়াৰ পূৰ্বে ন্যায়াধীশ পাটিলে প্ৰায় দুঘণ্টা ধৰি দুয়োপক্ষৰ যুক্তি শুনিছিল।
এই গোচৰত আৰিয়ানৰ উপৰিও আন ঊনৈশজন অভিযুক্ত আছিল। দুজনৰ বাহিৰে সকলো অভিযুক্ত বৰ্তমান জামিনত আছে।
উল্লেখ্য যে অভিযুক্ত লোকসকলৰ বিৰুদ্ধে নিষিদ্ধ ড্ৰাগছ ৰখা, সেৱন কৰা, বিক্ৰী/ক্ৰয় কৰা, ষড়যন্ত্ৰ আৰু সহায় কৰা আদিৰ অভিযোগত ড্ৰাগছ ড্ৰাগছ এণ্ড চাইকোট্ৰপিক ছাবষ্টেন্স (এনডিপিএছ) আইনৰ সংশ্লিষ্ট ধাৰাত গোচৰ ৰুজু কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
