অসম লাইভ ২৪ঃ মহিলাই ‘শাখা-সেন্দুৰ’ নিপিন্ধিলে ই বিবাহ বিচ্ছেদৰ কাৰক হ’ব। এই সন্দর্ভত গুৱাহাটী উচ্চ ন্যায়ালয়ৰ মুখ্য ন্যায়াধীশ অজয় লাম্বা আৰু ন্যায়াধীশ সৌমিত্ৰ শইকীয়াৰ খণ্ড বিচাৰপীঠে প্ৰদান কৰিছে এক গুৰুত্বপূর্ণ ৰায়। এগৰাকী স্বামীৰ আবেদনৰ ভিত্তিত ৰায়টোত এনেদৰে কোৱা হয়- ‘শাখা-সেন্দুৰ পিন্ধিবলৈ অস্বীকাৰ কৰাটোৱে স্বামীৰে মহিলাগৰাকীয়ে বিবাহ অগ্ৰাহ্য কৰাটোকে সূচায়; আৰু ই মহিলাগৰাকীক অবিবাহিতাৰূপে চিহ্নিত কৰে। ন্যায়ালয়ে এই ৰায় প্ৰদান কৰে ১৯ জুনত।
ইয়াৰ পূর্বে পাৰিবাৰিক আদালতত স্বামীৰ আবেদন খাৰিজ হৈছিল। বিবাহ বিচ্ছেদৰ আবেদন খাৰিজ কৰি পাৰিবাৰিক আদালতে কয় যে যিহেতু স্বামীৰ বিৰুদ্ধে মহিলাগৰাকীৰ কোনো ধৰণৰ নিষ্ঠুৰতা প্ৰদর্শনৰ প্ৰমাণ নাই সেয়ে বিবাহ বিচ্ছেদ মঞ্জুৰ কৰিব নোৱাৰি।
২০১২ৰ ১৭ ফেব্ৰুৱাৰীত দুয়ো বিবাহপাশত আৱদ্ধ হৈছিল।পিছে স্বামীগৃহৰ লোকেৰে একেলগে থকাত অসন্তুষ্টি প্ৰকাশ কৰি মহিলাগৰাকীয়ে প্ৰায়ে স্বামীৰে কাজিয়াত লিপ্ত হৈছিল। ইয়াৰ পৰিণতিতে ২০১৩ৰ ৩০ জুনৰ পৰা দুয়ো পৃথকে থাকিবলৈ লৈছিল। ইয়াৰ পাছত মহিলাগৰাকীয়ে স্বামী তথা স্বামীগৃহৰ লোকসকলৰ বিৰুদ্ধ হাৰাশাস্তিৰ অভিযোগ আনি আৰক্ষীৰ ওচৰত এক গোচৰ তৰিছিল, খণ্ড বিচাৰপীঠে কিন্তু এই অভিযোগ খাৰিজ কৰিছে।
বৃদ্ধ পিতৃ-মাতৃক সেৱা-শুশ্ৰূষা কৰাৰ যি আইনগত তথা নৈতিক দায়িত্ব, তাত যে স্বামীক মহিলাগৰাকীয়ে বাধা দিছিল এই বিষয়ত গুৰুত্ব প্ৰদান কৰা নাছিল পাৰিবাৰিক আদালতে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
