নতুন জীৱনৰ পাতনি মেলিলে বলীউড অভিনেত্ৰী সোনাক্ষী সিনহাই৷ আন দহোগৰাকীৰ দৰেই যুগ্ম জীৱনৰ পাতনি মেলিলেও সোনাক্ষীৰ বিয়াখন কৰোবাত যেন কিছু ব্যতিক্ৰমো৷ কাৰণ সোনাক্ষীৰ স্বামী মুছলমান সম্প্ৰদায়ৰ ব্যক্তি৷ স্বামী মুছলমান হোৱা স্বত্ত্বেও বিবাহৰ পাছৰ পাৰ্টীত সোনাক্ষীক দেখা গ’ল ৰঙা শাৰীৰে সৈতে শিৰত সেন্দুৰ লোৱা৷ দেওবাৰে নিশা বিবাহপাশত আৱদ্ধ হৈছে সোনাক্ষী-জাহিৰ৷ কিন্তু কি বিধি মানি বিয়া কৰালে দুয়োৱে?
হিন্দু ৰীতি নে মুছলমান ৰীতি মানি বিয়া কৰাইছে সোনাক্ষী-জাহিৰে? বিবাহৰ নামত অন্যান্য কোনো নীতি নিয়ম পালন কৰাৰ সলনি দুয়োকে কেৱল এখন বিশেষ পত্ৰত ছহী কৰা দেখা গৈছে৷ অৰ্থাৎ হিন্দু অথৱা মুছলমান কোনো নিয়মকেই এই বিবাহত অগ্ৰাধিকাৰ দিয়া হোৱা নাই৷ মুছলমান পৰিয়ালৰ বোৱাৰী হ’লেও সোনাক্ষীয়ে ধৰ্ম পৰিবৰ্তন নকৰে বুলি সোনাক্ষীৰ শহুৰেক ইকবাল ৰতনছিয়ে৷ স্পেছিয়েল মেৰিজ এক্ট অৰ্থাৎ, বিশেষ বিবাহ আইন অনুসৰি বিয়া হৈছে সোনাক্ষী-জাহিৰৰ৷
বিশেষ বিবাহ আইন কি?
ভাৰতত বিবাহ সংক্ৰান্তীয় তিনিধৰণৰ আইন আছে৷ ১) হিন্দু বিবাহ আইন ২) মুছলমান বিবাহ আইন আৰু ৩) বিশেষ বিবাহ আইন৷ ১৯৫৪ চনৰ ৯ অক্টোবৰত সংসদত এই বিশেষ আইন পাছ কৰা হৈছে৷ কোনো ধৰ্মীয় আচাৰ নমনাকৈ বিবাহবন্ধনৰ অধিকাৰ দিয়ে এই আইনে৷ এই আইনে ধৰ্মান্তৰিত হোৱাৰ কথা নকয়৷ ধৰ্মীয় পৰিচয় অপৰিবৰ্তিত ৰাখিয়েই বিবাহবন্ধনত আৱদ্ধ হ’ব পাৰি৷
এই আইনৰ অধীনত কোনে কোনে বিয়া কৰাব পাৰে?
ধৰ্ম আৰু বৰ্ণ পৰিচয় নিৰ্বিশেষে সকলো ভাৰতীয় নাগৰিকেই এই আইন মানি বিয়া কৰাব পাৰে৷ এওঁলোকে যিয়ে নিজৰ ধৰ্ম পৰিচয় বিবাহৰ পাছতো ধৰি ৰাখিব খোজে তেওঁলোকে এই আইনৰ অধীনত বিয়া কৰাব পাৰে৷
এই আইনৰ অধীনত বিয়া কৰাৰ পদ্ধতি কি কি?
এই আইন অনুসৰি বিয়া কৰাৰ কিছু নিয়ম আছে৷ প্ৰথমে দম্পত্তিহালে বিয়াৰ অন্তত এমাহ আগত মেৰিজ ৰেজিষ্ট্ৰী অফিচাৰৰ ওচৰত বৈধ নথিসহ আৱেদন জমা দিব লাগে৷ অনলাইনতো আবেদন কৰিব পাৰে৷ এই সংক্ৰান্তীয় সংশ্লিষ্ট ৱেবচাইটত আৱেদন কৰিব পাৰে৷ ৰেজিষ্ট্ৰিৰ দিনা সেই আৱেদন পত্ৰ উভয় পক্ষই লগত ৰাখিব লাগে৷ উভয় পক্ষৰ পৰা তিনিজন সাক্ষীৰ উপস্থিতিত বিয়াৰ ৰেজিষ্ট্ৰীপত্ৰৰ ছহী কৰিব লাগে দুয়োগৰাকীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
