তদন্ত আৰম্ভ হোৱাৰ প্ৰায় ছমাহৰ পিছত অৱশেষত প্ৰকাশ কৰা হয় ছু গ্ৰেৰ প্ৰতিবেদন। প্ৰতিবেদনখনত ২০২০ চনত ব্ৰিটিছ প্ৰধানমন্ত্ৰীৰ বাসগৃহ ১০ ডাউনিং ষ্ট্ৰীটত অনুষ্ঠিত হোৱা কেইবাটাও পাৰ্টিৰ ছবি আৰু বিশদ তথ্য প্ৰকাশ পাইছে। ইয়াৰে অধিকাংশই আইন উলংঘা কৰি সংগঠিত কৰা হৈছিল বুলি কোৱা হৈছে। প্ৰতিবেদনত আৰু কোৱা হৈছে যে, ‘‘যি সময়ত মহামাৰীৰ সময়ত যেতিয়া সাধাৰণ মানুহৰ জীৱনৰ ওপৰত ইটোৰ পিছত সিটো নিষেধাজ্ঞা জাপি দিয়া হৈছিল, সেই সময়ত চৰকাৰৰ এনে আচৰণৰ ন্যায্যতা প্ৰদান কৰাটো অসম্ভৱ।’’
গ্ৰেৰ প্ৰতিবেদন প্ৰকাশ পোৱাৰ কিছু সময়ৰ পিছতে হাউছ অৱ কমনছত ক্ষমা খুজি ব্ৰিটিছ প্ৰধানমন্ত্ৰী বৰিছ জনচনে কয় যে তেওঁ সমগ্ৰ বিষয়টোৰ সম্পূৰ্ণ দায়িত্ব লৈছে। ‘‘এই ঘটনাৰ পৰা মই বহু কথা শিকিছো। সৰ্বোপৰি মোৰ উপস্থিতিত ঘটা সকলো কাৰ্যৰ সম্পূৰ্ণ দায়িত্ব মই লৈছো।’’
উল্লেখ্য যে ২০২০ চনত ব্ৰিটেইনৰ কঠোৰ কোভিড লকডাউনৰ নিয়ম উলংঘা কৰি ব্ৰিটিছ প্ৰধানমন্ত্ৰী বৰিছ জনছনৰ চৰকাৰী বাসগৃহত কেইবাটাও পাৰ্টি কৰাৰ অভিযোগ উঠিছিল। প্ৰধানমন্ত্ৰী বৰিছ প্ৰথমে সংসদত কয় যে তেওঁ সেই পাৰ্টিসমূহৰ বিষয়ে অৱগত নহয় আৰু কোনো এটা পাৰ্টিতে তেওঁ উপস্থিত থকা নাছিল বুলি দাবী কৰি আহিছিল।
লগতে পঢ়ক বিধায়কৰ বান বিলাসিতা! বান বিধ্বস্ত জিলাৰ উপায়ুক্তৰ অনুকৰণীয় কৰ্তব্য নিষ্ঠা
অৱশ্যে, ব্ৰিটিছ সংবাদ মাধ্যমৰ কেইবাখনো ফ্ৰণ্ট লাইন ছবিত বৰিছে বহু পাৰ্টিত অংশগ্ৰহণ কৰা দেখা গৈছিল। প্রধানমন্ত্রীয়ে মিছা কথা কৈ সংসদক বিপথে পৰিচালিত কৰাৰ অভিযোগ উত্থাপন হৈছিল৷ ইয়াৰ পিছতে সমগ্ৰ বিষয়টো লণ্ডন আৰক্ষীয়ে তদন্ত আৰম্ভ কৰে। ইতিমধ্যে প্ৰধানমন্ত্ৰী বৰিছ আৰু তেওঁৰ পত্নীকে ধৰি দলটোত উপস্থিত থকা কেইবাজনো চৰকাৰী বিষয়াকো আৰক্ষীয়ে জৰিমনা বিহিছে।
প্ৰধানমন্ত্ৰীৰ বাসগৃহত এজন চৰকাৰী ফটোগ্ৰাফাৰে তোলা ছবিও পোহৰলৈ আহিছে। অভিযোগ উত্থাপন হৈছে যে সেইদিনা (২৩ নৱেম্বৰ, ২০২০) ১০ ডাউনিং ষ্ট্ৰীটত বৰিছৰ এজন সহায়কৰ বিদায় সম্বৰ্ধনা অনুষ্ঠান অনুষ্ঠিত কৰা হৈছিল। সেই সময়ত ব্ৰিটেইনত দুজনতকৈ অধিক লোকৰ সমাৱেশ সম্পূৰ্ণৰূপে নিষিদ্ধ কৰা হৈছিল।
প্ৰধানমন্ত্ৰী বৰিছে দাবী কৰিছিল যে সেইটো তাৰিখত তেওঁৰ বাসগৃহত কোনো পাৰ্টি হোৱা নাছিল। কিন্তু সেই ছবিখনত বৰিছৰ কাষৰ টেবুলখনত ৱাইন আৰু জিনৰ বটল, বহুত খালী গিলাচ৷ গ্ৰে প্ৰতিবেদন প্ৰধানমন্ত্ৰী বৰিছ জনচনৰ মিথ্যাচাৰ প্ৰমাণ কৰিলে বুলি এতিয়া ব্ৰিটিছ সংবাদ মাধ্যমত চৰ্চা লাভ কৰিছে৷
লগতে পঢ়ক সময়ৰ কি যে পৰিহাস! কোটিপতি নৱজ্যোৎ সিদ্ধু হ’লগৈ জে’লৰ কেৰাণী
ইফালে এই সমগ্ৰ বিষয়টোক লৈ বিৰোধীয়ে প্ৰধানমন্ত্ৰীক আক্ৰমণ কৰাই নহয়, পদত্যাগৰ দাবীও কৰি আহিছে। ছু গ্ৰে প্ৰতিবেদনৰ পিছতো সংসদৰ মজিয়াত মিথাচ্যাৰ আশ্ৰয় লোৱাৰ দাবী কৰি বিৰোধী সাংসদে পুনৰ প্ৰধানমন্ত্ৰী জনচনৰ পদত্যাগৰ দাবী উত্থাপন কৰিছে৷
অৱশ্যে প্ৰতিবেদন প্ৰকাশ পোৱা পিছতে সংসদৰ মজিয়াত প্ৰধানমন্ত্ৰী জনচনে ক্ষমা খুজি কয় যে ‘‘আমাৰ দোষ যিয়েই নহওক কিয়, মই বিশ্বাস কৰো যে আমাৰ আমোলাসকল কঠোৰ পৰিশ্ৰমী, ভাল মানুহ, দেশৰ বাবে ভাল কাম কৰে।’’
প্ৰধানমন্ত্ৰীয়ে লগতে কয় যে তেওঁ সেই পাৰ্টিসমূহত অতি কম সময়ৰ বাবে অংশগ্ৰহণ কৰি কৰ্মীসকলক উৎসাহিত কৰিছিল আৰু তাৰ পিছত কি হ’ল তেওঁ একোৱে নাজানে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
