মানৱেন্দ্ৰ কুমাৰ দাসঃ যোৱা কিছুদিন ধৰি একেৰাহে হৈ থকা নেৰেনেপেৰা বৰষুণে গুৱাহাটীৰ বহু অঞ্চল জলমগ্ন কৰিছে৷ মহানগৰবাসীৰ দৈনন্দিন জীৱন ব্যাহত হৈ পৰিছে৷ যাতায়াত ব্যৱস্থাত জটিলতা আহিছে৷ অন্য অৰ্থত বৰষুণসৃষ্ট কৃত্ৰিম বানপানীয়ে উত্তৰ-পূৰ্বাঞ্চলৰ প্ৰাণকেন্দ্ৰ তথা প্ৰৱেশদ্বাৰ হিচাপে পৰিচত গুৱাহাটীত আভিজ্যক যেন উপহাস কৰিছে৷ সেইবাবে গুৱাহাটী মহানগৰীৰ ভৱিষ্যতক লৈ নতুন চিন্তা-চৰ্চা আৰম্ভ হৈছে৷ কিন্তু কি সেই চিন্তা-চৰ্চা?
ৰাজ্য চৰকাৰৰ এক শীৰ্ষ সূত্ৰৰ পৰা সম্ভেদ পোৱা অনুসৰি জনতা ভৱন আৰু অসম বিধানসভা সচিবালয় গুৱাহাটীৰ পৰা স্থানান্তৰিত হ’ব পাৰে৷ তাৰ পৰিৱৰ্তে চৰকাৰী পৰ্যায়ত ছিংগাপুৰৰ আৰ্হিত গুৱাহাটী মহানগৰী পৰ্যটনৰ প্ৰাণকেন্দ্ৰ হিচাপে গঢ়ি তুলিবলৈ চিন্তা-চৰ্চা চলিছে৷ তাৰ লগে লগে দেশত গুৱাহাটীয়ে এক নতুন পৰিচয় লাভ কৰিব৷ সেউজ মহানগৰ হিচাপে পৰিচিত হ’ব গুৱাহাটী আৰু দেশৰ অন্যতম পৰ্যটন মহানগৰৰ মৰ্যাদাও লাভ কৰিব পাৰে৷ কিন্তু তাৰ লগে লগে উত্তৰ-পূব ভাৰতৰ অন্যতম মহানগৰখনে হেৰুৱাব আন এক পৰিচয়৷ সেই পৰিচয় হ’ল ৰাজধানীৰ পৰিচয়৷
লগতে পঢ়ক অগ্নিপথে অগ্নিকুণ্ডত পৰিণত কৰিছে দেশৰ ৰাজ্যসমূহ! নিজৰ স্থিতিত অটল চৰকাৰ
অৰ্থাৎ, গুৱাহাটীত নাথাকিব ৰাজ্য-প্ৰশাসনৰ হৃদপিণ্ড৷ সকলো চৰকাৰী কাৰ্যালয় স্থানান্তৰিত হ’ব নতুন এক স্থানলৈ৷ মহানগৰবাসীক ৰাজ্য চৰকাৰৰ এই পৰিকল্পনাই হয়তো কিছু সকাহ দিব পাৰে৷ আনহাতে, একে সময়তে গুৱাহাটী মহানগৰীৰ অন্য কিছু তথ্যও জানিব পৰা হৈছে৷ সেই অনুসৰি বৰ্তমান গুৱাহাটী মহানগৰীৰ ৪০ শতাংশতকৈও অধিক মাটি বহিৰাগত ব্যৱসায়ীৰ দখললৈ গৈছে৷ মূল ৰাজপথৰ আশে-পাশে গঢ় লৈ উঠা বহুমহলীয়া অট্টালিকাসমূহত স্থায়ী আবাসী হিচাপে থকাসকলৰো ৬০ শতাংশই অনাঅসমীয়া পৰিয়াল আৰু যদি এনে ধাৰা অব্যাহত থাকে তেন্তে আগন্তুক ২০ বছৰৰ ভিতৰত হয়তো গুৱাহাটী মহানগৰীৰ গৰিষ্ঠসংখ্যক ভূমিতে থলগিৰি অসমীয়াৰ অধিকাৰ নাথাকিব৷ সংস্কাৰকামী মুখ্যমন্ত্ৰী হিচাপে পৰিচিত ড০ হিমন্ত বিশ্ব শৰ্মাই হয়তো এইবোৰ দিশৰ প্ৰতিও গুৰুত্ব আৰোপ কৰিছে৷ সেই মতে যদি আগন্তুক ৫ বছৰৰ ভিতৰত গুৱাহাটীৰ পৰা ৰাজ্যৰ ৰাজধানী স্থানান্তৰিত হয়, তেন্তে কেতবোৰ জটিল সমস্যাৰ পৰা গুৱাহাটীবাসীয়ে কিছু হ’লেও সকাহ পাব৷ বিশেষকৈ যান-জঁট, বজাৰ-সমাৰ, কৃত্ৰিম বান আদিৰ পৰা গুৱাহাটীবাসীক মুক্ত কৰাটো সম্ভৱ হৈ উঠিব পাৰে৷
সূত্ৰৰ মতে ইতিমধ্যে ছিংগাপুৰৰ এক প্ৰতিষ্ঠানৰে ৰাজ্য চৰকাৰৰ বৈঠকো অনুষ্ঠিত হৈ গৈছে৷ ছিংগাপুৰৰ আৰ্হিত গুৱাহাটী মহানগৰী সৰ্বাংগসূন্দৰ কৰি তুলিবলৈও প্ৰস্তাৱ লোৱা হৈছে৷ অৱশ্যে, অসম চৰকাৰে আনুষ্ঠানিকভাৱে এতিয়াও এই তথ্য সদৰী কৰা নাই৷ কিন্তু তৎসত্ত্বেও খোদ ৰাজ্য চৰকাৰৰ শীৰ্ষ সূত্ৰৰ পৰা সম্ভেদ পোৱা অনুসৰি আগন্তুক সময়ত গুৱাহাটীৰ উত্তৰ দিশে ব্ৰহ্মপুত্ৰৰ নাতিদূৰলৈ স্থানান্তিৰত হ’ব পাৰে ৰাজধানী৷ উত্তৰ গুৱাহাটীৰ আশে-পাশে ভূমিৰ জৰীপ কাৰ্যও আৰম্ভ হৈছে৷ যদি সেয়ে হয় তেন্তে গুৱাহাটীৰ সমীপৰ আন এখন বৃহৎ মহানগৰ গঢ়ি উঠাৰো পূৰ্ণ সম্ভাৱনা থাকিব৷
লগতে পঢ়ক ‘হিমন্ত বিশ্ব শৰ্মা গুৱাহাটীৰ বান সমস্যাৰ বাবে মূল জগৰীয়া’ কিয় ক’লে অখিল গগৈয়ে?
কৃত্ৰিম বান সম্পৰ্কীয় পৰ্যালোচনাত ৪০ বছৰ পূৰ্বৰ গুৱাহাটীৰ ভৌগোলিক পৰিৱেশো নিৰ্ণয় কৰি উলিওৱা হৈছে৷ সেই পৰিৱেশৰ তথ্য অনুসৰি গণেশগুৰিৰ পৰা হাতীগাঁও, জটিয়া, কাহিলিপাৰা, সৰুসজাই, বেতকুছি, বৰাগাঁও, গড়চুক আদি অঞ্চল বিস্তীৰ্ণ কৃষিভূমি হিচাপে পৰিচিত আছিল৷ নাৰেংগীৰ পৰা বৰবাৰী হৈ ছয়মাইললৈ এই সমগ্ৰ অঞ্চলটো কৃষিভূমি আছিল৷ ১৯৮৫ চন পৰ্যন্ত গুৱাহাটীৰ যিবোৰ অঞ্চল জলাশয় বা বিল হিচাপে পৰিচিত আছিল সেই অঞ্চলসমূহ বৰ্তমান আৱাসিক অথবা ব্যস্ত বাণিজ্যিক এলেকা হিচাপে পৰিচিত হৈছে৷ মহানগৰীৰ পাৰিপাৰ্শ্বিকতাতো আহিছে ভয়াৱহ পৰিৱৰ্তন আৰু সেই বাবে হয়তো ঐতিহাসিক এই মহানগৰীখনৰ প্ৰাচীন পৰিচয় সংৰক্ষিত কৰাৰ স্বাৰ্থতে ৰাজ্য চৰকাৰে আৰম্ভ কৰিছে নতুন চিন্তা-চৰ্চা৷ সেই চিন্তা-চৰ্চাই ৰাজধানী গুৱাহাটীৰ পৰা কাঢ়ি নিব বৰ্তমানৰ পৰিচয়৷ অৱশ্যে, অনাগত সময়ত হয়তো উত্তৰ-পূবৰ মহানগৰীখন অধিক চঞ্চলা আৰু সৌন্দৰ্যময় হৈ উঠিব৷ অন্য অৰ্থত যেন ‘গাভৰু গুৱাহাটী’ৰ বাবেহে চলিছে আয়োজন৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
