অসম লাইভ২৪ঃ এদিন তেওঁ জী টিভিত ভুমুকি মাৰিছিল। দেশৰ প্ৰায়সংখ্যক লোকৰ ঘৰে ঘৰে হৈছিল তেওঁৰ চৰ্চা। মানৱে আজি এইটো কৰিলে, মানৱৰ আগন্তুক পদক্ষেপ কি হ’ব?ইত্যাদি ইত্যাদি। পূৰ্বে তেওঁ টেলিভিছনৰ পৰ্দাত ভুমুকি মাৰিছিল যদিও ‘পৱিত্ৰ ৰিস্তা’ ধাৰাবাহিকৰ জৰিয়তে সকলোৰে মনত সোমাই পৰিছিল। প্ৰকৃত নাম বহুতেই হয়তো সেই সময়ত জনা নাছিল। মুঠৰ ওপৰত মানৱ এটা যুগৰ নাৰীৰ ক্ৰাছ, সেই কথা বিনাদ্বিধাই ক’ব পাৰি। মানৱ চৰিত্ৰটোৰে সকলোৰে হৃদয়ত ঠাই লোৱা সুশান্ত সিং ৰাজপুতৰ আজি ওপজা দিন। সপোনপিপাসী সুশান্ত আজি আমাৰ মাজত নাই যদিও দেশজুৰি ওপজা দিনটোত চলিছে তেওঁৰ চৰ্চা।
দুৰদৰ্শনৰ ধাৰাবাহিকত অভিনয়ৰ জৰিয়তে কৰ্মজীৱনৰ পাতনি মেলিছিল সুশান্তে। তেওঁ পোন প্ৰথমে ষ্টাৰ প্লাছৰ ৰোমাণ্টিক ধাৰাবাহিক ‘কিচ দেশ মে হে মেৰা দিল’ত (২০০৮) অভিনয়ৰ সুযোগ লাভ কৰিছিল। তাৰপিছত তেওঁক জী টিভিৰ জনপ্ৰিয় ধাৰাবাহিক ‘পৱিত্ৰ ৰিস্তা’ (২০০৯-১১) ৰ মুখ্য চৰিত্ৰ ‘মানৱ’ৰ ৰূপত দেখা গৈছিল। ২০১৩ চনত ‘কাই প’ চে’ৰ জৰিয়তে তেওঁ বলীউডত প্ৰৱেশ কৰে। এই ছবিত কৰা অভিনয়ৰ বাবে তেওঁ ফিল্মফেয়াৰ বঁটাৰ শ্ৰেষ্ঠ নৱাগত শিল্পীৰ শিতানতো মনোনীত হৈছিল। তাৰপিছত তেওঁ ‘শুদ্ধ দেশী ৰোমাঞ্চ’ (২০১৩) আৰু ‘ডিটেক্টটিভ ব্যোমকেশ বক্সি’ (২০১৫) ছবিত অভিনয় কৰে। ২০১৪ চনত মুক্তি লাভ কৰা জনপ্ৰিয় ছবি ‘পিকে’ত সহযোগী চৰিত্ৰত অভিনয় কৰিছিল। এইসমূহৰ মাজতে তেওঁ চিনেমাপ্ৰেমীক উপহাৰ দিছিল এখন ব্লকব্লাষ্টাৰ চিনেমা ‘এম এছ ধোনী’।
১৯৮৬ চনৰ ২১ জানুৱাৰী তাৰিখে বিহাৰৰ ৰাজধানী পাটনাত সুশান্ত সিং ৰাজপুতৰ জন্ম হৈছিল। সুশান্তই শিক্ষা জীৱনৰ পাতনি মেলিছিল বিহাৰৰ পাটনাতেই। পাটনাৰ চেইণ্ট কাৰণেছ হাইস্কুল আৰু দিল্লীৰ কুলাচি হংসৰাজ মডেল স্কুলত শিক্ষা গ্ৰহণ কৰিছিল। ২০০৩ চনত দিল্লী কলেজ অফ ইঞ্জিনীয়াৰিঙৰ প্ৰৱেশ পৰীক্ষাত তেওঁ সপ্তম স্থান দখল কৰিছিল। তাৰপিছত তেওঁ দিল্লী কলেজ অফ ইঞ্জিনীয়াৰিঙত যান্ত্ৰিক অভিযান্ত্ৰিক বিভাগৰ স্নাতক শ্ৰেণীত নামভৰ্তি কৰে।
সুশান্তৰ কেৱল অভিনয় প্ৰতিভাই আছিল তেনে নহয়। ৰাষ্ট্ৰীয় পদাৰ্থ বিজ্ঞান অলিম্পিয়াডতো পদক অৰ্জন কৰিছিল সুশান্তই। ইয়াৰ লগতে তেওঁ ভাৰতীয় খনি বিদ্যালয়কে আদি কৰি ১১টা অভিযান্ত্ৰিক প্ৰৱেশ পৰীক্ষাত উত্তীৰ্ণ হৈছিল। কিন্তু থিয়েটাৰ আৰু নৃত্যৰ প্ৰতি আগ্ৰহী সুশান্ত সিং ৰাজপুতে কেইবাটাও বিষয়ত বেকলগ লগাৰ পিছত দিল্লী কলেজ অফ ইঞ্জিনীয়াৰিঙৰ পাঠ্যক্ৰম এৰি পেলায়। তেওঁ অভিযান্ত্ৰিক পাঠ্যক্ৰমৰ তিনিটা বছৰ সম্পূৰ্ণ কৰাৰ পিছত চূড়ান্ত বৰ্ষত পঢ়া এৰি অভিনয়ত মনোনিৱেশ কৰে।
সুশান্ত সিং ৰাজপুতে দিল্লী কলেজ অফ ইঞ্জিনীয়াৰিঙত পঢ়ি থাকোঁতে শ্বামক দাভাৰৰ নৃত্যশ্ৰেণীত যোগদান কৰিছিল। পৰিচালক বেৰী জনৰ নাটকৰ শ্ৰেণীত দেখি তেওঁ অভিনয়ৰ প্ৰতি আকৰ্ষিত হয় আৰু অভিনয় শ্ৰেণীতো যোগদান কৰে। যোগদানৰ কেইমাহমানৰ পিছতেই তেওঁ শ্বামক দাভাৰৰ মুখ্য নৃত্যদলত স্থান লাভ কৰে। ২০০৫ চনত তেওঁ ৫১তম ফিল্মফেয়াৰ বঁটা অনুষ্ঠানত বেকগ্ৰাউণ্ড নৃত্যশিল্পী হিচাপে চয়নিত হয়। ২০০৬ চনত অষ্ট্ৰেলিয়াত অনুষ্ঠিত কমনৱেলথ গেমছৰ উদ্বোধনী অনুষ্ঠানত তেওঁলোকৰ দলে সাংস্কৃতিক কাৰ্যসূচীত পৰিবেশন কৰিছিল। এইসময়ত তেওঁ অভিযান্ত্ৰিক শিক্ষা সম্পূৰ্ণকৈ বাদ দি নৃত্য আৰু অভিনয়ত মনোনিবেশ কৰে।তেওঁ হিন্দী চলচ্চিত্ৰত অভিনয়ৰ সুযোগৰ আশাত মুম্বাইলৈ আহে আৰু নাদিৰা বব্বৰৰ থিয়েটাৰ দল ‘একজোঁটে’ত যোগদান কৰে। তেওঁ প্ৰায় আঢ়ৈ বছৰ কাল একজোঁটে’ থিয়েটাৰ গোষ্ঠীৰ লগত জড়িত আছিল। এই সময়ত তেওঁ নেছলে কোম্পানীৰ মাঞ্চ চকলেটৰ বিজ্ঞাপনত কাম কৰাৰ সুযোগ লাভ কৰিছিল।২০০৮ চনত বালাজী টেলিফিল্মছৰ এটা দলে ‘একজোঁটে’ৰ নাটকত সুশান্ত সিং ৰাজপুতৰ অভিনয় প্ৰতিভাৰ উমান পায়। তেওঁলোকে সুশান্তক ষ্টাৰ প্লাছত প্ৰচাৰিত ‘কিচ দেশ মে হে মেৰা দিল’ ধাৰাবাহিকৰ প্ৰীত জুনেজাৰ চৰিত্ৰৰ বাবে অডিছন দিবলৈ নিমন্ত্ৰণ জনায়। ২০০৯ চনত তেওঁ জী টিভিত প্ৰচাৰিত ‘পৱিত্ৰ ৰিস্তা’ৰ মুখ্য চৰিত্ৰ মানৱ দেশমুখৰ চৰিত্ৰত অভিনয়ৰ সুযোগ লাভ কৰে।
বহু প্ৰতিভাৰ অধিকাৰী সুশান্তই ২০২০ চনৰ ১৪ জুন তাৰিখে মুম্বাইৰ বেন্দ্ৰাত অৱস্থিত তেওঁৰ নিজা এপাৰ্টমেণ্টত চিপজৰীলৈ থকা অৱস্থাত তেওঁৰ মৃতদেহ উদ্ধাৰ কৰা হয়। প্ৰাৰম্ভিক অনুসন্ধানত আৰক্ষীয়ে তেওঁ আত্মহত্যা কৰিছে বুলি জনায়। আৰক্ষী সূত্ৰই প্ৰকাশ কৰা অনুযায়ী কেইবামাহ জুৰি হতাশগ্ৰস্ততাত ভুগি আছিল সুশান্ত যাৰ বাবে জীৱনক এনেদৰে বিদায় দিয়ে সুশান্ত সিং ৰাজপুতে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
