অসম লাইভ২৪ঃ টি-২০ বিশ্বকাপত এইবাৰো তুংগত উঠিছে হোটেল বিতৰ্ক। ভাৰতীয় দলটোৱে অনুশীলনৰ সময়ত অষ্ট্ৰেলিয়াত থকা বিশেষ হোটেলখনক লৈ চলিছে চৰ্চা। ভাৰতীয় দলটোৰ অধিনায়ক ৰোহিত শৰ্মাক নিম্ন মানদণ্ডৰ এখন হোটেলত থাকিবলৈ দিয়া হৈছে। এই ঘটনা ভাৰতীয় দলটোৰ ক্ষেত্ৰত প্ৰথমবাৰেই হৈছে এনে নহয়। পূ্ৰ্বেও ২০২১ চনৰ স্মৃতি ভাঁহি উঠিছে খেলুৱৈৰ মানসপটত। সেইবাৰো ৰোহিত শৰ্মাই থকা হোটেলখনত নিজেই শৌচাগাৰ পৰিষ্কাৰ কৰিব লগা হৈছিল।
২০২০ চনত ডিচেম্বৰত টেষ্ট ছিৰিজ খেলিবলৈ ভাৰতীয় দলটো অষ্ট্ৰেলিয়ালৈ গৈছিল। সেই ছিৰিজৰ শেষৰখন মেছ হৈছিল ব্ৰিছবেনত। কৰ’নাৰ মাজতেই এই ছিৰিজ চলিছিল। ভাৰতীয় দলটোৱে পোনতে ব্ৰিছবেনত যাবলৈ ৰাজি হোৱা নাছিল যদিও পিছলৈ বিচিচিআই ৰ হেঁচাত যাবলৈ বাধ্য হয়। কিন্তু তাত দলটো উপস্থিত হোৱাৰ পিছতেই আৰম্ভ হয় বিতৰ্ক। দলটোক থাকিবলৈ দিয়া হোটেলখনত ৰোহিত শৰ্মা আৰু অজিঙ্ক ৰাহানে নিজৰ কাম নিজেই কৰিবলগাত পৰে। আনকি শৌচাগাৰো নিজেই পৰিষ্কাৰ কৰিব লগা হয়। ৰোহিতে নিজেই টুইটযোগে জে’লখানাত আছো বুলি উল্লেখ কৰিছিল। ব্ৰিছবেনত এইবাৰো একে ঘটনাৰেই পুনৰাবৃত্তি হ’ল। এইবাৰো ভাৰতীয় দলটোক ৰখা হোটেল ৰুমবোৰ অত্যন্ত সৰু হোৱাৰ লগতে হোটেলখনত থকা জিম, ছুইমিং পুল আদি এখন দেশক প্ৰতিনিধিত্ব কৰি যোৱা এটা দলৰ উপযোগী নহয়। হোটেলৰ অসুবিধাৰ কথা ভাৰতীয় দলটোৱে আইছিছি-ৰ আগত প্ৰকাশ কৰাৰ পিছতো হোটেল সলনি নকৰাক লৈ আক্ষেপ প্ৰকাশ কৰিছে ভাৰতীয় দলটোৱে।
ভাৰতৰ পৰৱৰ্তী খেল ছিডনীত অনুষ্ঠিত হ’ব। বৃহস্পতিবাৰে অৰ্থাৎ কাইলৈ নেদাৰলেণ্ডৰ বিৰুদ্ধে খেলত নামিব ভাৰত। ইপিনে খেলৰ বাবে অনুশীলন চলাই থকাৰ সময়তে ভাৰতীয় দলটোৱে খাদ্যৰ সমস্যাত পৰিছে। মঙলবাৰে ভাৰতীয় দলটোক দিয়া মধ্যাহ্নভোজন ভাৰতীয় দলটোৰ পছন্দ হোৱা নাছিল। সেয়ে ষ্টেডিয়ামত খাদ্যগ্ৰহণ নকৰাকৈয়ে হোটেললৈ গুচি যায় ভাৰতীয় দলটো। খাদ্যত দিয়া মাংসত আছিল অত্যন্ত জ্বলা, বিভিন্ন ফলৰ লগতে ছেণ্ডুইছ তৈয়াৰ কৰাৰ উপকৰণ। ছেণ্ডুইছো নিজেই তৈয়াৰ কৰি ল’বলৈ কোৱাৰ লগতে দলটোৰ বাবে ৰখা খাদ্যও যথেষ্ট কম। ভোকৰ সময়ত এনেকৈ খাদ্য দিয়াত খঙত থৰকাচুটি হেৰাই অধিনায়ক ৰোহিতৰ লগতে কোহলিৰো। নিম্নমানৰ খাদ্য দেখা মাত্ৰকেই কেইজনমান খেলুৱৈ টুইটত লিখিছে, ‘খাদ্য একেবাৰেই নিম্নমানৰ। কঠোৰ অনুশীলন কৰি অহাৰ পাছত ছেণ্ডুইছ বনাই কোৱাৰ ধৈৰ্য্য থাকে নেকি? ক্ৰিকেটাৰসকলৰ বাবে হোৱা খৰচৰ সিংহভাগেই বিচিচিআইয়েই দিয়ে। তাৰপিছতো আমাক এই আচৰণ দেখুওৱাৰ যুক্তি ক’ত?’
উল্লেখ্য যে টি-২০ বিশ্বকাপত পাকিস্তানৰ বিৰুদ্ধে কৰা জয়েৰে যাত্ৰা আৰম্ভ কৰিছে ভাৰতীয় দলটোৱে। আত্মবিশ্বাসী দলটোক আয়োজক দলটোৱে কৰা ব্যৱস্থাই ক্ষোভিত কৰাৰ লগতে বিভিন্ন সমস্যাতো পেলাইছে বুলি একাংশ নেটিজেনে চৰ্চা কৰা পৰিলক্ষিত হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
