অসম লাইভ২৪ঃ বিশ্বকাপৰ মাজতেই ধৰ্ষণত অভিযুক্ত ক্ৰিকেটাৰ দানুষ্কা গুণথিলকাক নিৰ্বাসন দিছে শ্ৰীলংকা ক্ৰিকেট বৰ্ডে। সোমবাৰে শ্ৰীলংকা ক্ৰিকেট বৰ্ডৰ এগজিকিউটিভ কমিটিয়ে লৈছে এই সিদ্ধান্ত। আগন্তক দিনত শ্ৰীলংকাৰ খেলত আৰু দেখা নাযাব দানুষ্কাক।
শ্ৰীলংকা ক্ৰিকেট বৰ্ডে এক বিবৃতিত লিখিছে, ‘আইচিচিয়ে আমাক এই বিষয়ে জনাইছে। এগৰাকী মহিলাক ধৰ্ষণৰ অভিযোগত দানুষ্কাক গ্ৰেপ্তাৰ কৰিছে ছিডনী আৰক্ষীয়ে। সোমবাৰে আদালতত হাজিৰো কৰোৱা হৈছে দানুষ্কাক। শ্ৰীলংকাৰ ক্ৰিকেট বৰ্ডে এই বিষয়টোৰ ওপৰত নজৰ দিছে। আশা কৰো এই বিষয়টোৰ ওপৰত উচিত তদন্ত হ’ব। দানুষ্কাৰ বিৰুদ্ধেও উচিত পদক্ষেপ লোৱা হ’ব।’
আনহাতে দানুষ্কাৰ জামিন আবেদন নাকচ কৰিছে ছিডনীৰ আদালতে। সোমবাৰে ভিডিঅ’ কনফাৰেন্সৰে দানুষ্কাক হাজিৰ কৰোৱা হৈছে আদালতত। ইপিনে দানুষ্কাৰ অধিবক্তাই জামিনৰ আবেদন কৰিছে আদালতত। কিন্তু মেজিষ্ট্ৰেট ৰবাৰ্ট উইলিয়ামছে দানুষ্কাৰ জামিন আবেদন নাকচ কৰে। বুধবাৰে এই বিষয়টোক পুনৰ আদালতত তোলা হ’ব। বুধবাৰলৈ আৰক্ষীৰ জিম্মাতেই থাকিব শ্ৰীলংকান ক্ৰিকেটাৰ দানুষ্কা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
