cockroach janata party-এ ডিজেটল মাধ্যমত ব্যাপক জনপ্ৰিয়তা অৰ্জন কৰাৰ পিছতে এইবাৰ সামাজিক মাধ্যমত আত্মপ্ৰকাশ ঘটিছে Broiler Chicken Party নামৰ এটা নতুন সংগঠনৰ। ফেচবুকত আত্মপ্ৰকাশ কৰা এই সংগঠনটোৰো মূল দাবী হৈছে শিক্ষামন্ত্ৰীৰ পদত্যাগ। দৰাচলতে এই Broiler Chicken Partyটো গঠন হৈছে বাংলাদেশত। বাংলাদেশত উচ্চ মাধ্যমিক (HSC) পৰীক্ষাক কেন্দ্ৰ কৰি সৃষ্টি হোৱা বিতৰ্কই নতুন ৰাজনৈতিক-সামাজিক ৰূপ লাভ কৰিছে। দেশখনৰ শিক্ষামন্ত্ৰীৰ এটা বিতৰ্কিত মন্তব্যক কেন্দ্ৰ কৰি জেন-জি শিক্ষাৰ্থীসকলে ব্যংগ, মীম আৰু সামাজিক মাধ্যমক অস্ত্ৰ হিচাপে ব্যৱহাৰ কৰি আৰম্ভ কৰিছে এক অভিনৱ অনলাইন আন্দোলন। এই আন্দোলনৰ প্ৰতীক হিচাপে ফেচবুকত ইতিমধ্যে আৰম্ভ হৈছে Broiler Chicken Partyৰ।
ফেচবুকত মঙলবাৰৰ পৰা আৰম্ভ হয় এই Broiler Chicken Party নামৰ পেজটো। Broiler Chicken Partyৰ মূল শ্লোগান হৈছে— We are not insulted, We are awakened. ফেচবুকত Broiler Chicken Party নামেৰে পৃষ্ঠাটো খোলাৰ কেইঘণ্টামানৰ ভিতৰতে দেশখনত বিপুল জনপ্ৰিয়তা লাভ কৰে। ইয়াৰ পিছৰে পৰা পৃষ্ঠাটোত অসংখ্য মীম, ব্যংগচিত্ৰ, ফটো, ভিডিঅ’ আৰু ব্যংগাত্মক পোষ্টৰ জৰিয়তে চৰকাৰ আৰু সংশ্লিষ্ট কৰ্তৃপক্ষক কঠোৰ সমালোচনা কৰা হৈছে।
কেনেকৈ আন্দোলনৰ সূচনা হ’ল?
বিগত কেইবাদিনো ধৰি বাংলাদেশৰ বহু উচ্চ মাধ্যমিক পৰীক্ষাৰ্থীয়ে ধাৰাসাৰ বৰষুণ, বান আৰু দুৰ্যোগপূৰ্ণ বতৰৰ মাজতো পৰীক্ষা অনুষ্ঠিত কৰাৰ সিদ্ধান্তৰ বিৰুদ্ধে প্ৰতিবাদ সাব্যস্ত কৰি আহিছিল। শিক্ষাৰ্থীসকলৰ দাবী আছিল—এই পৰিস্থিতিত পৰীক্ষা অনুষ্ঠিত কৰাটো অনুচিত। দেশখনৰ শিক্ষাৰ্থীসকলৰ এই দাবীক আওকান কৰাৰ বাবে শিক্ষামন্ত্ৰী ডাঃ এ এন এম এহছানুল হক মিলনৰ পদত্যাগ দাবীৰেও চলিছিল তীব্ৰ প্ৰতিবাদ। এই প্ৰতিবাদ চলি থকাৰ মাজতে সামাজিক মাধ্যমত এটা অডিঅ’ ক্লিপ দ্ৰুতগতিত ভাইৰেল হৈ পৰে। সেই অডিঅ’টোত বাংলাদেশৰ শিক্ষামন্ত্ৰীয়ে HSC পৰীক্ষাৰ্থীসকলক “Farm Chickens”ৰ সৈতে তুলনা কৰা বুলি অভিযোগ উত্থাপিত হৈছিল।
শিক্ষামন্ত্ৰীৰ ভাইৰেল অডিঅ’ই জন্ম দিলে BCPৰ
ভাইৰেল হোৱা অডিঅ’টোত বাংলাদেশৰ শিক্ষামন্ত্ৰী ডাঃ এ এন এম এহছানুল হক মিলনে কৈছিল-“ইহঁত ফাৰ্ম চিকেনৰ দৰে। বৰষুণৰ পানী মূৰত পৰিলেই জ্বৰ উঠে। মোৰ কন্যাৰো তেনেকুৱাই হয়।” এই মন্তব্যই সামাজিক মাধ্যমত ব্যাপক সমালোচনাৰ সৃষ্টি কৰে। শিক্ষাৰ্থীসকলে অভিযোগ কৰে যে তেওঁলোকৰ অসুবিধা আৰু বান পৰিস্থিতিক গুৰুত্ব নিদি শিক্ষাৰ্থীক লৈ শিক্ষামন্ত্ৰীয়ে অপমানজনক ভাষা ব্যৱহাৰ কৰিছে।
শিক্ষামন্ত্ৰীৰ ক্ষমাপ্ৰাৰ্থনা
অৱশ্যে এই আন্দোলনে তীব্ৰ ৰূপ লোৱাৰ পিছতে দেশখনৰ শিক্ষামন্ত্ৰী ডাঃ এ এন এম এহছানুল হক মিলনে নিজৰ মন্তব্যৰ বাবে ক্ষমা বিচাৰে। ইয়াৰ লগতে শিক্ষামন্ত্ৰীজনে ঘোষণা কৰে যে চলি থকা HSC পৰীক্ষাৰ পদাৰ্থ বিজ্ঞানৰ ফাৰ্ষ্ট পেপাৰ, একাউণ্টিঙৰ ফাৰ্ষ্ট পেপাৰ আৰু লজিকৰ ফাৰ্ষ্ট পেপাৰৰ পৰীক্ষা প্ৰয়োজন হ’লে পুনৰ অনুষ্ঠিত কৰাৰ ব্যৱস্থা কৰা হ’ব।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
