উত্তৰ প্ৰদেশৰ হাপুৰ জিলাত সংঘটিত এক ব্যতিক্ৰমী ঘটনাই সমগ্ৰ অঞ্চলজুৰি ব্যাপক চাঞ্চল্যৰ সৃষ্টি কৰিছে। বিগত ২৫ জুনত সামাজিক ৰীতি-নীতি অনুসৰি এগৰাকী যুৱক আৰু মেৰঠৰ এগৰাকী যুৱতীৰ বিবাহ সম্পন্ন হয়। কিন্তু বিবাহৰ প্ৰথম নিশাই কইনাই এনেকুৱা কথা প্ৰকাশ কৰিলে যিয়ে দৰা আৰু তেওঁৰ পৰিয়ালক স্তম্ভিত কৰি তোলে। জানিব পৰা মতে, বিৱাহৰ নিশা দৰাই কোঠালৈ যোৱাৰ লগে লগে নৱবিবাহিত পত্নীয়ে তেওঁক স্পৰ্শ নকৰিবলৈ কয় আৰু কয় যে নববিবাহিত পত্নীৰ হৃদয়ত অন্য এজনেহে স্থান লাভ কৰিছে আৰু তেওঁৰ শৰীৰৰ ওপৰতো তেওঁৰ প্ৰেমিকৰহে অধিকাৰ আছে। কেৱল সেয়াই নহয়, যদি দৰাই তেওঁক স্পৰ্শ কৰিবলৈ চেষ্টা কৰে, তেন্তে তেওঁ হ*ত্যাও কৰাব পাৰে বুলি ভাবুকি দিয়ে। এই অস্বাভাৱিক পৰিস্থিতিত দৰাজন আতংকিত হৈ পৰে আৰু তৎক্ষণাত কইনাৰ পিতৃগৃহলৈ ফোন কৰি সমগ্ৰ বিষয়টো অৱগত কৰে। কিন্তু যুৱতীৰ পৰিয়ালে বিষয়টোক বিশেষ গুৰুত্ব নিদি কেৱল তেওঁলোকৰ জীয়েকক ঘৰলৈ ঘূৰাই অনিবলৈ কয়। দৰাৰ পৰিয়ালে এই পৰিস্থিতিত কইনক অকলে পঠিয়াবলৈ অনিচ্ছা প্ৰকাশ কৰে।
দৰাৰ ব্যতিক্ৰমী সিদ্ধান্ত
অৱশেষত, বিবাহৰ মাত্ৰ তিনিদিন পিছতে দৰাই এক ব্যতিক্ৰমী সিদ্ধান্ত গ্ৰহণ কৰে। তেওঁ নিজেই নৱবিবাহিত পত্নীৰ প্ৰেমিকক হাপুৰলৈ মাতি আনে আৰু পত্নীক সন্মান সহকাৰে প্ৰেমিকৰ হাতত গতাই দিয়ে। এই সিদ্ধান্তই সামাজিকভাৱে ব্যাপক আলোচনা আৰু চৰ্চাৰ সৃষ্টি কৰিছে। ইয়াৰ পিছত ভৱিষ্যতে কোনো ধৰণৰ আইনী জটিলতা বা মিছা অভিযোগৰ সন্মুখীন নহ’বলৈ দৰা আৰু তেওঁৰ পিতৃয়ে হাপুৰ মহিলা থানাত উপস্থিত হৈ লিখিত অভিযোগ দাখিল কৰে। তেওঁলোকে আৰক্ষীক জনায় যে যুৱতীগৰাকী নিজৰ ইচ্ছামতে প্ৰেমিকৰ সৈতে গুচি গৈছে, সেয়েহে ভৱিষ্যতে তেওঁলোক বা তেওঁলোকৰ পৰিয়ালৰ বিৰুদ্ধে কোনো ধৰণৰ অপ্ৰীতিকৰ ঘটনা বা আইনী ব্যৱস্থা গ্ৰহণ নহ’ব লাগে।
ঘটনা সন্দৰ্ভত কি কয় আৰক্ষীয়ে?
হাপুৰ মহিলা থানাৰ ভাৰপ্ৰাপ্ত বিষয়া অৰুণা ৰায়ে জনোৱা মতে, যুৱতীগৰাকীৰ আন এজন যুৱকৰ সৈতে প্ৰেমৰ সম্পৰ্কত আছিল। কিন্তু পৰিয়ালৰ ইচ্ছাত তেওঁৰ মতামতৰ বিপৰীতে এই বিবাহ সম্পন্ন কৰা হৈছিল। পিছত দুয়োপক্ষৰ আলোচনা আৰু পাৰস্পৰিক সন্মতিৰ ভিত্তিত বিষয়টোৰ শান্তিপূৰ্ণ সমাধান কৰা হয়। বৰ্তমান যুৱতীগৰাকী নিজৰ প্ৰেমিকৰ সৈতে আছে আৰু ঘটনাটো লৈ আৰক্ষীয়েও প্ৰয়োজনীয় নথি-পত্ৰ সংৰক্ষণ কৰিছে। এই ঘটনাই পুনৰ এবাৰ প্ৰমাণ কৰিলে যে বিবাহৰ দৰে গুৰুত্বপূৰ্ণ সিদ্ধান্তত সংশ্লিষ্ট দুয়োপক্ষৰ পূৰ্ণ সন্মতি আৰু ইচ্ছাক সৰ্বাধিক গুৰুত্ব দিয়াটো অতি প্ৰয়োজনীয়। অন্যথা এনে অনাকাংক্ষিত আৰু জটিল পৰিস্থিতিৰ সৃষ্টি হ’ব পাৰে, যাৰ প্ৰভাৱ কেৱল দম্পতীয়েই নহয়, দুয়োটা পৰিয়ালৰ ওপৰতো পৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
