অসম লাইভ২৪ঃ হিৰ’ হোণ্ডা চিডি ১১০ আছিল দুই সংস্থাই যৌথ উদ্যোগত তৈয়াৰ কৰা মটৰচাইকেল। ১৯৮৫ চনক বজাৰলৈ আহিছিল দেশৰ প্ৰথম ৪ ষ্ট্ৰোক ইঞ্জিনৰ এই বাইক। ৮০-৯০ দশকত খুবেই বিক্ৰি হোৱা বাইকখনেই হৈছে CD 110, তাৰপিছতেই বজাৰলৈ আহে Splendor, Karizmaৰ দৰে মটৰচাইকেল। প্ৰায় ২৬ বছৰ ধৰি (১৯৮৫-২০১১)লৈ হিৰো-হোণ্ডাই যুঁটীয়াভাৱে বাহন মুকলি কৰি আহিছিল। কিন্তু এই দুই সংস্থা কিয় পৃথক হ’ল?
হিৰো-হোণ্ডা কিয় পৃথক হয়?
জাপানৰ হোণ্ডাই সেই সময়ত বিশ্বৰ একাধিক দেশত বাইক বিক্ৰি কৰিছিল। হিৰোৱেও ভাৰতত বৃহৎ এখন বজাৰ গঢ়ি তুলিছিল। এই যাত্ৰাক দেশত আৰু ভালধৰণে আগুৱাই নিবলৈ ১৯৮৩ চনত জয়েণ্ট ভেঞ্চাৰৰ এটা প্ৰস্তাৱ ৰখা হয়। এই প্ৰস্তাৱৰ পাছতেই ১৯৮৫ চনত নতুন দিল্লীত স্থাপিত হয় হিৰো-হোণ্ডাৰ প্রথমটো কাৰ্যালয়। বিজয় ৰথ চলিবলৈ আৰম্ভ কৰিলে হিৰো-হোণ্ডাৰ। জাপানৰ প্ৰযুক্তি আৰু কৰ্মঠ ভাৰতীয়ৰ দক্ষতাৰে এক অপ্ৰতিৰোধ্য জুটি তৈয়াৰ হয়। কিন্তু এই সম্পৰ্ক বেছি দিন টিকি নাথাকিল। সম্পৰ্কলৈ তিক্ততা আহিল ২০১০ চনত। সেই সময়ত হিৰোৰ নাম ভাৰতীয়ৰ মুখে মুখে। দেশত গাড়ী বিক্ৰিৰ হাৰৰ দিশলৈ লক্ষ্য ৰাখি হোণ্ডাইয়ো নিজাকৈ বাহন ওলিওৱাৰ পৰিকল্পনা কৰিলে। তাৰপিছতেই এই সম্পৰ্ক শেষ কৰি দুয়োটা কোম্পানীয়ে নিজাববীয়াকৈ কাম কৰাৰ মন মেলে।
কেৱল ব্যৱসায়িক স্বাৰ্থতেই পৃথক হৈছিল নেকি হিৰো-হোণ্ডা?
বিশেষজ্ঞসকলৰ মতে, সেই সময়ত বাইকৰ ৰপ্তানীৰ বিষয়টোক লৈ দুয়োটা কোম্পানীৰ মাজত বিবাদ আৰম্ভ হৈছিল। হিৰো হোণ্ডাৰ উচ্চ অধিকাৰীসকলে হোণ্ডাৰ পৰিকল্পনাসমূহত একমত হ’ব পৰা নাছিল। হিৰো হোণ্ডাই একেলগে বাহন তৈয়াৰ কৰাৰ সলনি হোণ্ডাই নিজাববীয়াকৈ বাহন তৈয়াৰ কৰি বজাৰত মুক্তি দিবলৈ আৰম্ভ কৰে। যাৰ ফলস্বৰূপে ২০১১ চনত পৃথক হৈ যায় হিৰো মটোকৰ্প আৰু হোণ্ডা মটৰচাইকেল। কিন্তু এই বিচ্ছেদত সংকটত পৰিছিল হিৰো। কাৰণ সেই সময়ত হিৰোৰ হাতত ইঞ্জিনিয়াৰীঙত দক্ষতা থকা ব্যক্তিৰ অভাৱ আছিল।
একেলগে থকাৰ সময়ত ইঞ্জিনীয়াৰিঙৰ সমূহ বিষয় হোণ্ডাই চাইছিল। পোনতে মটৰচাইকেল কেনেকৈ সৃষ্টি কৰিব সেই বিষয়কলৈ হিৰো কোম্পানীৰ বিষয়ববীয়াসকল উদ্বিগ্ন হৈ পৰিছিল। কিন্তু সময়ৰ সৈতে তেঁওলোকো আগবাঢ়ে? প্ৰতিষ্ঠা হয় ৰিচাৰ্ছ চেণ্টাৰ। নতুন ষ্ট্ৰেটেজিৰে ভাৰততেই নহয় বিশ্বৰ একাধিক দেশত নিজৰ বাইক লঞ্চ কৰিছে হিৰো মটোকৰ্পে। বৰ্তমান ভাৰতত সকলোতকৈ ডাঙৰ টু হুইলাৰ সংস্থাই হৈছে হিৰো মটোকৰ্প।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
