নিজৰ দেশতে বিভিন্ন বিতৰ্ক আৰু ব্যৰ্থতাৰ বাবে কৰ্কথনা আৰু সমালোচনাৰ সন্মুখীন হৈ আহিছে পাকিস্তানৰ প্ৰধানমন্ত্ৰী ইমৰাণ খানে৷ এই ইমৰাণ খানে এতিয়া ভাৰতৰৰ প্ৰধানমন্ত্ৰী নৰেন্দ্ৰ মোদীক টিভিৰ চেনেলত দুয়ো দেশৰ সমস্যাৰ বিষয়ে আলোচনা কৰিবলৈ প্ৰত্যাহ্বান জনাইছে৷
ইফালে কোনো দিনে সংবাদ মাধ্যমৰ সন্মুখীন নোহোৱা ভাৰতৰ প্ৰধানমন্ত্ৰী নৰেন্দ্ৰ মোদীক এই আহ্বান জনাই ইমৰাণ খানে একপ্ৰকাৰে কটাক্ষ কৰিলেই বুলিবই পাৰিব৷ উল্লেখ্য যে ২০১৪ চনত প্ৰধানমন্ত্ৰী হোৱাৰে পৰা যোৱা প্ৰায় ৮ টা বছৰে ভাৰতৰ প্ৰধানমন্ত্ৰী নৰেন্দ্ৰ মোদীয়ে এবাৰো সংবাদ মেল সম্বোধন কৰা নাই৷
আনহাতে, পাক প্ৰধানমন্ত্ৰী ইমৰাণ খানে কয় যে দুই দেশৰ মাজৰ বিভিন্ন সমস্যাৰাজি সমাধান কৰিবলৈ ভাৰতৰ প্ৰধানমন্ত্ৰীৰ সৈতে চেনেলৰ মজিয়াত বহিবলৈ তেওঁ আগ্ৰহী৷
দুদিন পূৰ্বে ৰাছিয়া ভ্ৰমণলৈ যোৱা পাক প্ৰধানমন্ত্ৰী ইমৰাণ খানে এক সংবাদ মাধ্যমক দিয়া সাক্ষাৎকাৰত কয় যে তেওঁ আন্তৰিকভাৱে এটা টিভি চেনেলত ভাৰতৰ প্ৰধানমন্ত্ৰীৰ সৈতে আলোচনাত বহিব বিচাৰে৷
পাক প্ৰধানমন্ত্ৰী গৰাকীৰ মতে সেই আলোচনা অথবা বিতৰ্কত সকলো সমস্যা সমাধান হৈ গ’লে দুয়ো দেশৰ কোটি কোটি মানুহ উপকৃত হ’ব৷
কিন্তু পাক প্ৰধানমন্ত্ৰী ইমৰাণ খানৰ এই প্ৰত্যাহ্বান ভাৰতৰ প্ৰধানমন্ত্ৰী নৰেন্দ্ৰ মোদীয়ে গ্ৰহণ কৰিববলৈ সাহস কৰিব নে নাই সেয়া এতিয়াও স্পষ্ট হোৱা নাই৷ আনকি ভাৰতে ইমৰাণ খানৰ এই প্ৰত্যাহ্বানৰ সম্পৰ্কেও এতিয়াও আনুষ্ঠানিক প্ৰতিক্ৰিয়া প্ৰকাশ কৰা নাই৷
অৱশ্যে, পূৰ্বৰে পৰা ভাৰতে নিজৰ স্থিতি স্পষ্ট কৰি কৈ আহিছে যে পাকিস্তানে সন্ত্ৰাসবাদী সংগঠনসমূহক নিৰ্মূলৰ ব্যৱস্থা গ্ৰহণ নকৰালৈকে ভাৰতে পাকিস্তানৰ লগত আলোচনাত নবহে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
