অসম লাইভ২৪ঃ পূৰ্বতে ৰজা মহাৰজাসকলৰ কেইবাগৰাকীও ৰাণী আছিল৷ বুৰঞ্জীৰ পাতত আমি সেই বিষয়ে পঢ়িবলৈ পাই আহিছো৷ কেৱল ভাৰততেই ৰজা মহাৰজাসকলে বহুকেইগৰাকী পত্নী বিয়া কৰাইছিল এনে নহয়৷ ছৌদি আৰৱৰ ৰজাসকলে বহু পত্নীক বিবাহ কৰাই বহু সন্তানৰ পিতৃও হৈছিল৷ সাধাৰণতে ছৌদি আৰবৰ ৰজাসকলৰ ক্ষেত্ৰত এই পৰম্পৰা আছিল বুলি ইতিহাসত উল্লেখ আছে৷
যুদ্ধত জয়লাভ কৰা ৰাষ্ট্ৰসমূহ দখল কৰি সেই ৰজাৰ কন্যাক বিয়া কৰাই পাৰিবাৰিক সম্পৰ্ক গঢ়ি তোলাৰ পাছত দেশ বা ৰাষ্ট্ৰৰ ভিতৰত গৃহযুদ্ধৰ আশংকা বহু পৰিমাণে কমি যায়৷ ইয়াৰ ফলত ৰজাই দেশ শাসন কৰাৰ পথ অধিক সূচল হৈ পৰে৷ সেই পন্থা ছৌদিৰ ৰজাইয়ো অৱলম্বন কৰিছিল৷
এইদৰে তথাকথিত শান্তি বজাই ৰখাৰ স্বাৰ্থত ছৌদিৰ ৰজাসকলে বহু ৰাণীক বিবাহ কৰোৱাৰ পাছতে বহু সন্তানৰ পিতৃ হৈছিল৷ অৱশ্যে কিছু ৰজাই স্বেচ্ছাই বহুবিবাহ কৰাইছিল৷ সেয়া অৱশ্যে পৌৰাণিক আৰু মধ্য যুগৰ ৰজাৰহে কথা৷ কিন্তু আধুনিক যুগত ৰাজতন্ত্ৰ প্ৰচলন থকা কিছুসংখ্যক দেশৰ ৰজাইও পৌৰাণিক তথা মধ্য যুগীয় ৰজাৰ দৰেই বহুসংখ্যক পত্নীক বিবাহ কৰাই অসংখ্য সন্তানৰ পিতৃ হৈছিল৷
ছৌদি আৰৱত দেশখনক ঐক্যবদ্ধ কৰি ৰখাৰ আটাইতকৈ সহজ উপায় হিচাপে ৰজাসকলে অধিক ৰাণীক বিয়া কৰাইছিল। অৰ্থাৎ যেতিয়াই কোনো শত্ৰুৱে ৰজাক আক্ৰমণ কৰে, তেতিয়াই তেওঁ ৰজাক পৰাস্ত কৰি সেই ৰাষ্ট্ৰৰ ৰজাৰ কন্যাক বিয়া কৰাই পাৰিবাৰিক সম্বন্ধ গঢ়ি তুলিছিল৷ আজি আমি আধুনিক ৰাজতন্ত্ৰ ছৌদি আৰৱৰ এনে কিছুমান ৰজাৰ বিষয়ে ক’বলৈ আগবাঢ়িছো৷
আব্দুলজিজ বিন আব্দুল ৰহমান আল ছৌদক ছৌদি আৰৱৰ প্ৰতিষ্ঠাপক হিচাপে গণ্য কৰা হয়। ১৯৩২ চনৰ পৰা ১৯৫৩ চনলৈ তেওঁ ছৌদি আৰবৰ ৰজা আছিল। তথ্য অনুসৰি তেওঁৰ প্ৰায় ২২ গৰাকী পত্নী আছিল৷ আল ছৌদে ৰাজ্য সম্প্ৰাসৰণ কৰিবলৈ তেওঁ অন্য সম্প্ৰদায়ৰ মহিলাক বিয়া কৰাইছিল। তথ্য অনুসৰি তেওঁৰ মুঠ ১০০ টা সন্তান আছিল, ইয়াৰে ৪৫ গৰাকী আছিল পুত্ৰ সন্তান।
আৰৱৰ প্ৰথম ৰজাৰ দ্বিতীয় পুত্ৰ আছিল ছৌদ বিন আব্দুলাজিজ আল ছৌদ। ১৯৫৩ চনৰ পৰা ১৯৬৪ চনলৈকে তেওঁ ছৌদি আৰৱৰ ৰজা আছিল। তেওঁৰ ৩০ গৰাকীতকৈ অধিক পত্নী থকাৰ তথ্য লাভ কৰিলেও এনে কিছুসংখ্যক পত্নী আছিল যিসকলৰ তথ্য পোৱা নাযায়৷ তেওঁৰ মুঠ সন্তানৰ সংখ্যা আছিল ১০৮ টা৷
১৯৮২ চনৰ পৰা ২০০৫ চনলৈকে ছৌদি আৰৱৰ ৰজা আছিল ফাহাদ বিন আব্দুলজিজ আল ছৌদ। তেওঁ আছিল ৰজা আব্দুলআজিজৰ অষ্টম পুত্ৰ। তেওঁৰো প্ৰায় ১৩ গৰাকী পত্নী আছিল। তেওঁ ৬ গৰাকী পুত্ৰ আৰু ৪ গৰাকী কন্যা সন্তানৰ পিতৃ আছিল।
ছৌদি আৰৱৰ প্ৰথম ৰজাৰ দশম পুত্ৰ আছিল আব্দুল্লাহ বিন আব্দুলাজিজ আল ছৌদ। ২০১৫ চনত তেওঁৰ মৃত্যু হয়। তেওঁৰ প্ৰায় ৩০ গৰাকী পত্নী আৰু মুঠ ৩৬ গৰাকী সন্তান আছিল৷ ইয়াৰে ১৬ গৰাকী আছিল পুত্ৰ সন্তান।
আব্দুল মুহছিন বিন আব্দুলজিজ আল ছৌদ প্ৰথম ৰজাৰ ১৩ সংখ্যক পুত্ৰ। ১৯৮৫ চনত মৃত্যু হোৱা আব্দুল মুহছিন মদিনাৰ ৰাজ্যপাল নিযুক্ত কৰা হৈছিল। তেওঁৰ ৮ গৰাকী পত্নী আৰু ১২ গৰাকী সন্তান আছিল।
১৯৬৪ চনৰ পৰা ১৯৭৫ চনলৈ ছৌদি আৰৱৰ ৰজা আছিল ফৈজল বিন আব্দুলজিজ আল ছৌদ৷ ১৯৭৫ চনত হত্যাৰ বলি হোৱা ফৈজল প্ৰথম ৰজাৰ তৃতীয় পুত্ৰ আছিল। তেওঁ ৭ গৰাকী পত্নীক বিয়া কৰাইছিল।
প্ৰথম ৰজাৰ পঞ্চম পুত্ৰ আছিল খালিদ বিন আব্দুলাজিজ আল ছৌদ। ১৯৭৫ চনৰ পৰা ১৯৮২ চনলৈ তেওঁ ছৌদি আৰবৰ ৰজা আছিল। ৪ বাৰ বিবাহপাশত আবদ্ধ হৈ ১০ টা সন্তানৰ পিতৃ হৈছিল।
ছৌদি আৰৱৰ প্ৰথম ৰজাৰ ২০ সংখ্যক পুত্ৰ আছিল তালাল বিন আব্দুলাজিজ আল ছৌদ। ২০১৮ চনত তেওঁৰ মৃত্যু হয়। ৪ গৰাকী পত্নী বিয়া কৰাই তেওঁ মুঠ ১৫ টা সন্তানৰ পিতৃ হৈছিল।
চৌদি আৰৱৰ প্ৰথম ৰজাৰ ২৩ নম্বৰ গৰাকী পুত্ৰ নায়েফ বিন আব্দুলজিজ আল ছৌদে ৩ গৰাকী পত্নীক বিবাহ কৰাই ১০ টা সন্তানৰ পিতৃ হৈছিল।
ছৌদি আৰৱৰ প্ৰথম ৰজাৰ ২৫ সংখ্যক পুত্ৰ ছলমান বিন আব্দুলজিজ আল ছৌদ আৰু তেওঁ বৰ্তমান ছৌদি আৰৱৰ ৰজা। ৩ গৰাকী পত্নীক কৰোৱাই তেওঁ বৰ্তমান ১৩ টা সন্তান পিতৃ হৈ আছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
