অসম লাইভ২৪ঃ লোকসভা নিৰ্বাচনৰ পূৰ্বে দেশত সংশোধিত নাগৰিকত্ব আইন (CAA) কাৰ্যকৰী হ’ব বুলি জনাইছে কেন্দ্ৰীয় গৃহমন্ত্ৰী অমিত শ্বাহে। শনিবাৰে গৃহমন্ত্ৰীয়ে কয়, ‘লোকসভা নিৰ্বাচনৰ পূৰ্বেই CAA কাৰ্যকৰী কৰা হ’ব।’ ২০১৯ চনত দ্বিতীয়বাৰ ক্ষমতালৈ আহিয়েই CAA বিল পাছ কৰিছিল নৰেন্দ্ৰ মোদীৰ চৰকাৰে। এই নতুন নাগৰিকত্ব আইন অনুসৰি বাংলাদেশ, পাকিস্তান আৰু আফগানিস্তানৰ দৰে মুছলমান ধৰ্মাৱলম্বী দেশত যদি সেই দেশৰ ধৰ্মীয় সংখ্যালঘূয়ে ধৰ্মীয় উৎপীড়নৰ বাবে এই দেশত আশ্ৰয় বিচাৰে তেন্তে ভাৰতত তেওঁলোকক আশ্ৰয় দিয়া হ’ব।
সংসদৰ দুই কক্ষই পাছ কৰাৰ পাছতেই ৰাষ্ট্ৰপতিয়েও অনুমোদন দিছিল CAA বিলত। কিন্তু বৰ্তমান পৰ্যন্ত আইনখন দেশত লাঘু হোৱা নাই। জানুৱাৰী মাহত এই আইনৰ ধাৰা তৈয়াৰৰ
বাবে সপ্তমবাৰ সময়বৃদ্ধিত সেউজ সংকেত দিছিল সংসদীয় সচিবালয়ে। চৰকাৰী সূত্ৰৰ খবৰ অনুসৰি সেই কাম শেষ হোৱাৰ পথত। ৰাজনৈতিক বিশ্লেষকসকলৰ একাংশৰ মতে প্ৰায় চাৰে চাৰি বছৰ ধৰি বিষয়টো সমাধান নোহোৱাৰ বাবে ক্ষোভিত হৈ পৰিছে একাংশ হিন্দু।
লোকসভা নিৰ্বাচনৰ পূৰ্বেই CAAকাৰ্যকৰী কৰিব মোদী চৰকাৰে বুলি মুকলিকৈ ঘোষণা কৰিছে কেন্দ্ৰীয় গৃহমন্ত্ৰী অমিত শ্বাহে। শনিবাৰে দিল্লীত এক বিশেষ সভাত এই কথা স্পষ্টৰূপত জনাইছে গৃহমন্ত্ৰী অমিত শ্বাহে। তেওঁ কয়, ‘CAA দেশৰ এখন আইন। এই আইন অৱশ্যেই কাৰ্যকৰী কৰা হৈছে। এই বিষয়ে কোনো সংশয় আপোনালোকে নাৰাখিব।’ পশ্চিমবংগৰ দৰে বিৰোধী শাসিত ৰাজ্যসমূহে ধৰ্মীয় পৰিচয়ৰ ভিত্তিত CAA কাৰ্যকৰী কৰাৰ এতিয়াও বিৰোধিতা কৰি আছে। গৃহমন্ত্ৰী অমিত শ্বাহে জনোৱামতে বিদেশৰ পৰা কোনো নাগৰিক আহিলে তেওঁলোকৰ নাগৰিকত্ব দিয়াৰ সকলো প্ৰক্ৰিয়া অনলাইনৰ মাধ্যমেৰে হ’ব। তেওঁলোকে নিজা তথ্য পৰ্টেলৰ জৰিয়তে দিব লাগিব। তেওঁলোকৰ তথ্য চায়েই নাগৰিকত্ব প্ৰদানৰ সিদ্ধান্ত লোৱা হ’ব।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
