১৩ বছৰৰ মূৰকত ৰঞ্জী ট্ৰফী খেলিব কোহলীয়ে, লগত আছে পন্ত, দিল্লী দলত নাম প্ৰকাশ
বৰ্ডাৰ গাভাস্কাৰ ট্ৰফীত অষ্ট্ৰেলিয়াৰ হাতত টিম ইণ্ডিয়াৰ পৰাজয়ৰ পিছত ভাৰতীয় বেটছমেনক লৈ বহু প্ৰশ্ন উত্থাপন হৈছে। এই সমগ্ৰ ছিৰিজত বিৰাট কোহলী, শুভমন গিলৰ পৰা আৰম্ভ কৰি অধিনায়ক ৰোহিত শৰ্মালৈকে সকলোৱে ফ্লপ বুলি প্ৰমাণিত হয়।
ইয়াৰ পিছতে প্ৰাক্তন ক্ৰিকেটাৰসকলে টিম ইণ্ডিয়াৰ সকলো খেলুৱৈকে ঘৰুৱা ক্ৰিকেট খেলিবলৈ পৰামৰ্শ দিয়ে। সেই পৰামৰ্শৰ পাছতে এতিয়া ৰঞ্জী ট্ৰফী খেলিবলৈ সাজু হৈছে বিৰাট কোহলী আৰু ঋষভ পন্ত।
২৩ জানুৱাৰীৰ পৰা আৰম্ভ হব দ্বিতীয় পৰ্যায়ৰ ৰঞ্জী ট্ৰফী। এতিয়া দ্বিতীয় পৰ্যায়ৰ ৰঞ্জী ট্ৰফীৰ বাবে প্ৰকাশ হৈছে দিল্লী দলৰ দল। সেই দিল্লী দলতেই বিৰাট কোহলী আৰু ঋষভ পন্তৰ নামো সন্নিবিষ্ট কৰা হৈছে।
ৰঞ্জী ট্ৰফী ২০২৪-২৫ ছিজনৰ দ্বিতীয় পৰ্যায়ৰ বাবে দিল্লীৰ সম্ভাৱ্য দলত অন্তৰ্ভুক্ত হৈছে বিৰাট কোহলী, ঋষভ পণ্ট আৰু হৰ্ষিত ৰানাৰ দৰে খেলুৱৈ। দিল্লী আৰু জিলা ক্ৰিকেট সন্থাই ঘোষণা কৰা ৪১ জনীয়া সম্ভাৱ্য দলত অন্তৰ্ভুক্ত হৈছে আয়ুষ বদোনী, নৱদীপ ছাইনী আৰু যশ ধুল আদিয়ো।
উল্লেখ্য যে, বিৰাট কোহলীয়ে ২০১২ চনত শেষৰখন ৰঞ্জী মেচ খেলিছিল। উত্তৰ প্ৰদেশৰ বিৰুদ্ধে খেলা এই মেচখনত কোহলীয়ে প্ৰথম ইনিংছত ১৪ ৰান আৰু দ্বিতীয় ইনিংছত ৪২ ৰান সংগ্ৰহ কৰিছিল। তাৰ পিছৰ পৰা কোহলীয়ে কোনো ৰঞ্জী মেচ খেলা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
