শ্বেখ হাছিনাক আশ্ৰয় দিব ব্ৰিটেইনে? এতিয়াও স্পষ্ট নহয়৷ অসমৰ্থিত এক সূত্ৰৰ দাবী, হাছিনাই ব্ৰিটেইনত আশ্ৰয় বিচাৰিছে৷ কিন্তু এতিয়াও ব্ৰিটেইনৰ পৰা সেউজ সংকেত পোৱা নাই৷ বৰ্তমানো ভাৰততেই আছে বাংলাদেশৰ প্ৰাক্তন প্ৰধানমন্ত্ৰী হাছিনা৷ এন ডিটিভিৰ এক প্ৰতিবেদনত প্ৰকাশ পোৱা অনুসৰি হাছিনাই যি পদ্ধতিত ব্ৰিটেইনৰ ওচৰত আশ্ৰয় বিচাৰিছে সেয়া মানি লোৱাটো আইন অনুসৰি সম্ভৱ নহয়৷ এই পদ্ধতিৰে কাকোৱেই আশ্ৰয় দিব নোৱাৰে ব্ৰিটেইনে৷ সেই দেশৰ স্বৰাষ্ট্ৰ মন্ত্ৰণালয়ৰ সৈতে যোগাযোগ কৰি এই তথ্য লাভ কৰিছে ৰাষ্ট্ৰীয় সংবাদমাধ্যমে৷
সম্প্ৰতি ব্ৰিটেইনত ক্ষমতাত আছে লেবাৰ পাৰ্টী৷ প্ৰধানমন্ত্ৰী হৈছে কিয়েৰ ষ্টাৰ্মাৰ৷ সূত্ৰৰ খবৰমতে হাছিনাৰ আৱেদন বিবেচনা কৰি চাব ব্ৰিটেইনে৷ এই নিয়ম অনুসৰি এই ধৰণৰ পৰিস্থিতিত যি কোনো ব্যক্তিয়ে নিকটতম নিৰাপদ দেশত আশ্ৰয় বিচাৰে৷ এই কথা জনাইছে ব্ৰিটেইন বিদেশ মন্ত্ৰণালয়ে৷ সেই দফতৰৰ এগৰাকী অধিকাৰীয়ে কয়, ‘কঠিন সময়ত ব্যক্তিবিশেষক আশ্ৰয় দিয়াৰ ইতিহাস আছে ব্ৰিটেইনৰ৷ সেই ইতিহাস গৰ্বৰ ইতিহাস৷ কিন্তু ব্ৰিটেইনত উপস্থিত হৈ আশ্ৰয় বিচৰাৰ নিয়ম নাই৷ যিসকলক আন্তৰ্জাতিক নিৰাপত্তাৰ প্ৰয়োজন তেওঁলোকে দেশ এৰাৰ পাছত প্রথম নিকটবৰ্তী নিৰাপদ দেশত ভৰি দিয়ে, তাতেই আশ্ৰয় বিচাৰে৷ তাতেই তেওঁলোকে দ্ৰুততমভাৱে নিৰাপত্তাও লাভ কৰিব পাৰে৷’
ব্ৰিটেইনৰ বিদেশ মন্ত্ৰণালয়ৰ বক্তব্য অনুসৰি ব্ৰিটেইনলৈ গৈ তাতই আশ্ৰয় বিচাৰিব নোৱাৰিব হাছিনাই৷ তাৰ পূৰ্বে তেওঁ আবেদন কৰিব লাগিব আশ্ৰয়দানকাৰী দেশৰ চৰকাৰক৷ এই ক্ষেত্ৰত হাছিনাই অৱশ্যে সময় পোৱা নাই৷ সেয়ে এতিয়াও তেওঁৰ ওচৰলৈ ব্ৰিটেইনৰ সেউজ সংকেত অহা নাই৷ বাংলাদেশ এৰি প্ৰথম ভাৰততেই ভৰি দিছে হাছিনাই৷ বৰ্তমান তেওঁক ভাৰতত আশ্ৰয় দিয়া হৈছে৷ নিজৰে স্থৱিৰ কৰিবলৈকে তেওঁক কিছুদিন সময়ৰ প্ৰয়োজন বুলি জনাইছে ভাৰতৰ বিদেশমন্ত্ৰী এছ জয়শংকৰে৷ হাছিনাৰ পৰবৰ্তী পৰিকল্পনা কি, তেওঁ ভাৰত চৰকাৰক জনালে সেই অনুসৰিয়ে পদক্ষেপ গ্ৰহণ কৰা হ’ব৷
উল্লেখ্য যে বাংলাদেশৰ প্ৰধানমন্ত্ৰী পদৰ পৰা ইস্তাফা দিয়াৰ পাছত সোমবাৰে দেশ এৰিছে হাছিনাই৷ তেওঁৰ সৈতে দেশ এৰিছে ভনীয়েক ৰেহানাইয়ো৷ তেওঁলোকৰ বিমান নামিছিল গাজিয়াবাদৰ হিণ্ডণ বিমানঘাটীত৷ সূত্ৰৰ খবৰ অনুসৰি তাতেই নিশা কটাইছে হাছিনাই৷ তাৰপাছতেই তেওঁ দিল্লীলৈ গৈছে৷ হাছিনাৰ ভনীয়েকৰ অৱশ্যে ব্ৰিটেইনৰ নাগৰিকত্ব আছে৷ ৰেহানাৰ কন্যাও ব্ৰিটেইন সংসদৰ এগৰাকী সদস্য৷ সেই অনুসৰি তেওঁ ব্ৰিটেইন যোৱা কোনো ডাঙৰ কথা নহয়৷ অৱশ্যে অসুবিধা এতিয়া হাছিনাৰহে৷ তেওঁক দিল্লীতেই থৈ ৰেহানা ব্ৰিটেইনলৈ যাব পাৰে বুলিও দাবী কৰিছে অসমৰ্থিত সূত্ৰই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
