মধ্যপ্ৰদেশৰ ইন্দোৰৰ যুৱক ৰজা ৰঘুবংশীৰ ক্ষতবিক্ষত দেহ উদ্ধাৰ হলেও এতিয়াও সন্ধান লাভ কৰিব পৰা হোৱা নাই পত্নী সোনমৰ৷ আৰক্ষী সূত্ৰৰ খবৰ অনুসৰি বিগত ২৩ মেৰ দুপৰীয়া ১ বজাত আত্মীয়ৰ সৈতে শেষ কৰা হৈছিল সোনমৰ৷ মেঘালয় ফুৰিবলৈ গৈ যি স্কুটি ৰাজা আৰু সোনমে ভাড়া কৰিছিল তাত থকা জি পি এছে কৈছে দুপৰীয়া ২ বজাত স্কুটিৰ গতি বন্ধ হৈছিল৷ অৰ্থাৎ স্কুটি ৰৈ গৈছিল৷ তাৰপাছতেই সেই নৱদম্পতিৰ সৈতে আৰু কোনো যোগাযোগ কৰিব পৰা হোৱা নাই৷
তদন্তকাৰীসকলৰ অনুমান যে দুপৰীয়া ২ বজাৰ পৰা ২.৩০ মিনিটৰ ভিতৰতেই দুষ্কতিকাৰীয়ে আক্ৰমণ চলাইছে৷ লুটপাটত বাধা দিয়াৰ বাবেই ৰাজাক হত্যা কৰা হৈছে৷ আৰু সোনমক অপহৰণ কৰি লৈ যোৱা হৈছে৷ যৰ পৰা দম্পতি নিখোঁজ হৈছে সেই স্থানৰ পৰা কেই কিঃমিঃ দূৰৈত আছে বাংলাদেশ সীমান্ত৷ আশংকা কৰা হৈছে দুষ্কৃতীকাৰীয়ে সোনমক অপহৰণ কৰি বাংলাদেশলৈ লৈ যাব পাৰে৷ যদিও ইয়াৰ কোনো তথ্যপ্ৰমাণ এতিয়াও আৰক্ষীৰ হাতত পৰা নাই৷ সূত্ৰৰ খবৰ অনুসৰি ইতিমধ্যে বাংলাদেশ আৰক্ষীৰ সৈতেও যোগাযোগ কৰিছে মেঘালয় আৰক্ষীয়ে৷ সোনম আৰু ৰাজাৰ পৰিয়ালে এই নিখোঁজ ৰহস্যৰ নেপথ্যত মানৱ সৰবৰাহ চক্ৰৰ হাত থকা বুলি সন্দেহ কৰিছে৷
সোনমৰ পৰিয়ালে নানান ধৰণৰ প্ৰযুক্তিৰ সাহায্যও লৈছে৷ ইয়াৰোপৰি মেঘালয়ৰ ছহৰাৰ যি স্থানৰ পৰা ৰাজাৰ দেহ উদ্ধাৰ কৰা হৈছে সেই স্থানৰ আশেপাশে ৫০ কিঃমিঃ দূৰত্বলৈকে তালাচি অভিযান চলাইছে আৰক্ষীয়ে৷ বিগত মাহত ডাবল ডেকাৰ ব্ৰীজলৈ অহা প্ৰত্যেকখন বাহনৰ তথ্যও পৰীক্ষা কৰিছে আৰক্ষীয়ে৷ আৰক্ষী সূত্ৰৰ খবৰ, ইন্দোৰৰ সেই দম্পতিয়ে ছহৰাৰ এক হোটেলত আছিল৷ তাৰপাছতেই চেৰাপুঞ্জীৰ মৌলকায়া গাওঁলৈ যায়৷ তাৰপাছতেই তেওঁলোকক আৰু কোনোৱে বিচাৰি পোৱা নাই৷ ২৪ মেত তেওঁলোকে স্কুটি ভাড়া কৰিছিল সোহৰাৰিমত৷ তাৰপাছত বিগত ২ জুনত দেহ উদ্ধাৰ হৈছে৷ দেহৰ কাষৰ পৰা এটা ফোন আৰু এখন ধৰাল অস্ত্ৰও উদ্ধাৰ হৈছে৷ এটা ৰেইনকোটো উদ্ধাৰ হৈছে বুলি জনাইছে পূৱ খাঁচি হিলছৰ আৰক্ষী ছুপাৰিণ্টেণ্ডেণ্ট বিবেক চিমে৷ সেই ৰেইনকোটত আছে বিশেষ দাগ৷ সেয়া তেজৰ দাগ নে আন কিবা সেয়া স্পষ্ট হোৱা নাই৷
ফৰেন্সিক পৰীক্ষাৰ বাবে সেই ৰেইনকোট পঠিওৱা হৈছে বুলি আৰক্ষী সূত্ৰই প্ৰকাশ কৰিছে৷ বিগত ১১ মেত ৰাজা আৰু সোনমৰ বিয়া হৈছিল৷ ২০ মেত তেওঁলোকে ইন্দোৰৰ পৰা শ্বিলংলৈ মধুচন্দ্ৰিমালৈ যায়৷ ২৩ মেত তেওঁলোকৰ শেষবাৰ দেখা হৈছিল৷ ২ জুনত ৰাজাৰ দেহ উদ্ধাৰ হয় ছহৰাত৷ কিন্তু এতিয়াও পত্নী সোনমৰ কোনো সন্ধান লাভ কৰা হোৱা নাই৷ তাৰমাজতেই এতিয়া মানৱ সৰবৰাহৰ দিশটোও বহুতে উত্থাপন কৰিছে৷ সোনমক তেন্তে অপহৰণেই কৰা হৈছে নেকি? সেই উত্তৰো বিচাৰি সন্ধান অব্যাহত ৰাখিছে আৰক্ষীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
