বগা জোতা দেখিলেই ক্ৰয় কৰিবলৈ মন যায়৷ বৰ্তমান বিশ্বক পুৰুষ-মহিলা উভয়েই আটাইতকৈ বেছি পৰিধান কৰা জোতাৰ ভিতৰত অন্যতম হৈছে বগা জোতা৷ প্ৰায় প্ৰতিযোৰ সাজ-পোছাকৰ লগতেই পিন্ধিব পাৰি বগা জোতা। কেজুৱেল টপ হওক, চৰ্ট ড্ৰেছ হওক, বা পৰম্পৰাগত কুৰ্তা হওক, বগা স্নিকাৰে আৰামদায়ক আৰু ষ্টাইলিছ ৰূপ সৃষ্টি কৰে। পিন্ধাটো যিমান সহজ, যত্ন লোৱাটো কিন্তু প্ৰত্যাহ্বানমূলক। বগা জোতা এবাৰ লেতেৰা হ’লেই ইয়াৰ জিলিকনি ঘূৰাই অনাটো প্ৰায় অসম্ভৱ হৈ পাৰে। কেইটামান উপায় অৱলম্বন কৰি আপুনি বগা জোতাত নতুনৰ দৰে চিকমিকনি দিব পাৰে৷
বগা জোতা জিলিকাবলৈ সহজ উপায়
- টুথপেষ্টঃ টুথপেষ্টে আপোনাৰ বগা স্নিকাৰ উজ্জ্বল কৰি তুলিব পাৰে। প্ৰথমে তিতা কাপোৰেৰে জোতাযোৰ পৰিষ্কাৰ কৰক আৰু তাৰ পিছত দাগলগা স্থানসমূহত টুথপেষ্ট লগাওক। টুথপেষ্ট লগাই কিছুক্ষণ ৰাখি ব্ৰাছেৰে জোতাযোৰ ধুই পেলাওক। মনত ৰাখিব জোতা জিলিকাবলৈ জেল টুথপেষ্ট ব্যৱহাৰ নকৰিব।
- ভিনেগাৰ আৰু বেকিং চ’ডাঃ ভিনেগাৰ আৰু বেকিং ছ’ডাৰে জোতা জিলিকাই তোলাই নহয় পূৰ্বৰ দৰে বগা হোৱাৰ ওপৰিও ইয়াৰ বেক্টেৰিয়া প্ৰতিৰোধী গুণৰ বাবে দুৰ্গন্ধও নাইকিয়া হয়। এক কাপ বেকিং চ’ডা আৰু আধা কাপ ভিনেগাৰ মিহলাই এই মিশ্ৰণ আপোনাৰ জোতাত ঘঁহি কিছু সময় থৈ দিয়ক। আধা ঘণ্টা শুকুৱাই লোৱাৰ পাছত ভালদৰে ব্ৰাছেৰে ঘঁহি ধুই দিয়ক৷
- নেইল ৰিমভাৰঃ বগা স্নিকাৰ উজ্জ্বল কৰাৰ বাবে নেল ৰিমভাৰো উত্তম। কপাহত নেল পেইণ্ট ৰিমুভাৰ লগাই দাগ লগা স্থানসমূহত ঘঁহি দিয়ক৷ ইয়াৰ দ্বাৰা সহজে দাগবোৰ আঁতৰি যাব। ইয়াৰ পিছত চেম্পুৰে ধুই পেলালে জোতাযোৰ পূৰ্বৰ দৰে জিলিকি উঠিব।
- নেমুৰ ৰসঃ নেমুত চাইট্ৰিক এচিড থাকে, যিয়ে বগা স্নিকাৰ ভালদৰে পৰিষ্কাৰ কৰে আৰু লগতে দুৰ্গন্ধও নাইকিয়া কৰে। নেমুৰ ৰস ঠাণ্ডা পানীৰ লগত মিহলাই দাগ পৰা ঠাইত কাপোৰেৰে লগাব। ইয়াৰ ফলত আপোনাৰ জোতা চিকচিকিয়া হৈ পৰিব আৰু যিকোনো দাগ আঁতৰি যাব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
