বলিউডৰ জনপ্ৰিয় অভিনেতা গোবিন্দা পুনৰবাৰ ব্যক্তিগত জীৱনক লৈ চৰ্চাৰ কেন্দ্ৰবিন্দু হৈ পৰিছে। অভিনেতাগৰাকীৰ নাম তেওঁৰ সহ-অভিনেত্ৰী কোমল ৰাণী স্বৰ্ণকাৰৰ সৈতে জড়িত হোৱাৰ পিছতে ডেটিঙৰ জল্পনা-কল্পনা আৰম্ভ হৈছে। এই চৰ্চাই অধিক গুৰুত্ব লাভ কৰে যেতিয়া গোবিন্দাৰ পত্নী সুনীতা আহুজাই অভিনেতাগৰাকীৰ বিৰুদ্ধে প্ৰতাৰণাৰ অভিযোগ উত্থাপন কৰে। জুলাইত গোবিন্দাই সংবাদ মাধ্যমৰ সন্মুখত কোমল ৰাণী স্বৰ্ণকাৰক তেওঁৰ আগন্তুক ছবি ৰূপাৰ নতুন সহ-অভিনেত্ৰী হিচাপে পৰিচয় কৰাই দিছিল। ছবিখনৰ জৰিয়তে কোমলে বলিউডত নিজৰ পৰিচয় গঢ়ি তোলাৰ চেষ্টা কৰিছে।
কোন এই কোমল ৰাণী স্বৰ্ণকাৰ?
কোমল ৰাণী স্বৰ্ণকাৰ বলিউডৰ এগৰাকী তুলনামূলকভাৱে নতুন মুখ। ৰূপা ছবিত গোবিন্দাৰ সৈতে জড়িত হোৱাৰ পূৰ্বে মূলধাৰাৰ দৰ্শকৰ মাজত তেওঁৰ পৰিচিতি যথেষ্ট সীমিত আছিল। খবৰ অনুসৰি, কোমল উত্তৰ প্ৰদেশৰ বাসিন্দা। অভিনয় জগতত তেওঁ এতিয়াও এগৰাকী নৱাগত। তেওঁৰ শিক্ষা, পৰিয়াল আৰু ব্যক্তিগত জীৱনৰ বিষয়ে ৰাজহুৱাভাৱে বিশেষ তথ্য উপলব্ধ নহয়। আনকি তেওঁৰ বয়সৰ বিষয়েও সংবাদ মাধ্যমৰ সন্মুখত কোনো স্পষ্ট তথ্য প্ৰকাশ পোৱা নাই। অৱশ্যে সামাজিক মাধ্যমত কোমল যথেষ্ট সক্ৰিয়। বিভিন্ন ফটোশ্বুট, ব্যক্তিগত ফটো আৰু দৈনন্দিন জীৱনৰ বিভিন্ন মুহূৰ্তৰ ছবি-ভিডিঅ’ তেওঁ সামাজিক মাধ্যমত শ্বেয়াৰ কৰি থাকে।
‘ৰূপা’ৰ উপৰি গোবিন্দাৰ সৈতে তেওঁৰ আন এখন আগন্তুক ছবি ‘দুনিয়াদাৰী’তো কাম কৰাৰ খবৰ পোৱা গৈছে। এই খবৰ সঁচা হ’লে, আগন্তুক দিনত একাধিক প্ৰকল্পত গোবিন্দাৰ সৈতে কোমলক একেলগে দেখা যাব পাৰে।
ডেটিঙৰ চৰ্চাক লৈ কি ক’লে গোবিন্দৰ পত্নী সুনীতাই?
শেহতীয়াকৈ মুম্বাই বিমানবন্দৰত গোবিন্দাক কোমলৰ সৈতে দেখা পোৱাৰ পিছতে দুয়োৰে সম্পৰ্কক লৈ জল্পনা বৃদ্ধি পায়। ইয়াৰ পিছত সুনীতাই গোবিন্দাৰ অনুৰাগীসকলক উদ্দেশ্য কৰি কয় যে পূৰ্বে তেওঁ গোবিন্দাই তেওঁক প্ৰতাৰণা কৰাৰ কথা কোৱাৰ সময়ত বহু অনুৰাগীয়ে তেওঁক ট্ৰ’ল কৰিছিল। এতিয়া এই বিষয়ত গোবিন্দাৰ অনুৰাগী আৰু সংবাদ মাধ্যমে উত্তৰ দিব লাগে বুলি তেওঁ মন্তব্য কৰে। লগতে এই বিষয়ত তেওঁক আৰু কোনো প্ৰশ্ন নকৰিবলৈও সুনীতাই কয় আৰু বিষয়টোৰ প্ৰতি তেওঁৰ কোনো আগ্ৰহ নাই বুলি স্পষ্ট কৰে।
উল্লেখ্য যে গোবিন্দা আৰু সুনীতা আহুজাই ১৯৮৭ চনত বিবাহপাশত আবদ্ধ হৈছিল। দুয়োৰে দুটি সন্তান আছে—কন্যা টিনা আহুজা আৰু পুত্ৰ যশবৰ্ধন আহুজা। কোমল ৰাণী স্বৰ্ণকাৰৰ সৈতে গোবিন্দাৰ সম্পৰ্কক লৈ চলি থকা চৰ্চাৰ মাজতে সুনীতাৰ এই মন্তব্যই বিষয়টোক পুনৰ চৰ্চালৈ আনিছে। অৱশ্যে গোবিন্দা আৰু কোমলৰ মাজত প্ৰকৃততে কোনো প্ৰেমৰ সম্পৰ্ক আছে নে নাই, সেই সন্দৰ্ভত দুয়োগৰাকীৰ পৰা কোনো নিশ্চিত বক্তব্য প্ৰকাশ পোৱা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
