তামিলনাডুৰ উদ্যোগ বৃদ্ধিৰ বাবে সাজু হৈছে তামিলনাডুৰ মুখ্যমন্ত্ৰী চি জোচেফ বিজয় ওৰফে থালাপাথী বিজয়ে। এতিয়া তামিলনাডু চৰকাৰে চেন্নাইত অনুষ্ঠিত প্ৰথমটো বৃহৎ বিনিয়োগ সন্মিলনত ৬৭,৫৪২ কোটি টকাৰ বিনিয়োগৰ প্ৰস্তাৱ লাভ কৰিছে। বৃহস্পতিবাৰে অনুষ্ঠিত হোৱা ‘ভেট্ৰি তামিলনাডু বিনিয়োগ সন্মিলন ২০২৬’ত মুঠ ৯৭খন বুজাবুজি চুক্তি স্বাক্ষৰিত হয়। এই বিনিয়োগৰ প্ৰস্তাৱসমূহে ৰাজ্যত ১২ লাখতকৈ অধিক চাকৰিৰ সৃষ্টি কৰিব বুলি আশা কৰা হৈছে। এই নতুন চুক্তিসমূহৰ জৰিয়তে চৰকাৰৰ প্ৰথম ১০০ দিনত তামিলনাডুত আকৰ্ষিত হোৱা মুঠ বিনিয়োগৰ প্ৰস্তাৱে এক লাখ কোটি টকা অতিক্ৰম কৰিছে।
প্ৰতিদিনে ১০০০ কোটি টকা বিনিয়োগৰ দাবী
উদ্যোগ মন্ত্ৰী কীৰথানাই কয় যে চৰকাৰৰ কাৰ্যকালৰ প্ৰতিটো দিনেই গড়ে প্ৰায় ১০০০ কোটি টকাৰ বিনিয়োগ আকৰ্ষণ কৰা হৈছে। তেখেতে কয় যে এই প্ৰকল্পসমূহে তামিলনাডুক ২০৩৬ চনৰ ভিতৰত ১.৫ ট্ৰিলিয়ন ডলাৰৰ অৰ্থনীতিৰ লক্ষ্যত আগুৱাই নিয়াৰ ক্ষেত্ৰত সহায় কৰিব।
এই খণ্ডসমূহত বৃহৎ বিনিয়োগ
এটা ঔদ্যোগিক গোটে নবীকৰণযোগ্য শক্তি, বৈদ্যুতিক গতিশীলতা, অটোমোটিভ সেৱা আৰু চাৰ্জিং আন্তঃগাঁথনিৰ দৰে খণ্ডত ২৫০০ কোটি টকাৰ বিনিয়োগৰ প্ৰস্তাৱ আগবঢ়াইছে। ইয়াৰ ভিতৰত ২০০ মেগাৱাটতকৈ অধিক ক্ষমতাৰ সৌৰ, বতাহ আৰু বেটাৰী প্ৰকল্পও অন্তৰ্ভুক্ত। ওৰাগাডামত ৪০০ একৰ ভূমিত থকা বাণিজ্যিক বাহনৰ ডিজাইন, গৱেষণা, উন্নয়ন আৰু উৎপাদনৰ সুবিধা সম্প্ৰসাৰণৰ বাবে ৪,০০০ কোটি টকা বিনিয়োগ কৰা হ’ব ।
ৰামনাথপুৰমত ১০০০ কোটি টকাৰ প্ৰকল্পৰ প্ৰস্তাৱ দিয়া হৈছে, যিটো জিলাখনৰ প্ৰথমটো বৃহৎ উদ্যোগিক বিনিয়োগ বুলি কোৱা হৈছে। ইয়াৰ উপৰিও কৃষ্ণগিৰিত এটা নতুন উৎপাদন ইউনিটৰ বাবে আৰু কাঁচিপুৰমত বৰ্তমানৰ ব্যৱসায় সম্প্ৰসাৰণৰ বাবে ২০০০ কোটি টকা বিনিয়োগ কৰা হ’ব। জাপানৰ এটা ফাষ্টনিং-প্ৰডাক্ট কোম্পানীয়ে তিৰুভাল্লুৰত ১৬৫১ কোটি টকা বিনিয়োগ কৰিব, যাৰ ফলত প্ৰায় ৪,৩১৬ টা চাকৰিৰ সৃষ্টি হ’ব বুলি আশা কৰা হৈছে। তিৰুৱল্লুৰতো ১০০০ কোটি টকাৰ উদ্যোগিক উদ্যানৰ প্ৰস্তাৱ দিয়া হৈছে। হোছুৰত প্ৰিমিয়াম ঘড়ী, গহনা আৰু ইলেক্ট্ৰনিকছ-অটোমেচনৰ সুবিধা সম্প্ৰসাৰণৰ বাবে ১০০০ কোটি টকাৰ বিনিয়োগ কৰা হ’ব। ইয়াৰ ফলত প্ৰায় ১,২০০ টা চাকৰিৰ সৃষ্টি হোৱাৰ সম্ভাৱনা আছে।
তামিলনাডুৰ মহাকাশ খণ্ডই ৬৫০ কোটি টকাৰ বিনিয়োগৰ প্ৰস্তাৱ লাভ কৰিছে, যাৰ ফলত প্ৰায় ২০০০ চাকৰিৰ সৃষ্টি হ’ব বুলি আশা কৰা হৈছে। জীৱন বিজ্ঞান কোম্পানীসমূহে ফাৰ্মা, ভেছকুলাৰ প্ৰযুক্তি, আৰু স্বাস্থ্যসেৱা উৎপাদন প্ৰকল্পত মুঠ ১৬০০ কোটি ₹ৰ বিনিয়োগ ঘোষণা কৰিছে।
এই সকলোবোৰ কোম্পানীৰ বিনিয়োগৰ ফলত ৰাজ্যখনত অনাগত দিনত ১২লাখতকৈও অধিক নিবনুৱাই সংস্থাপন লাভৰ আশা কৰা হৈছে। এয়া কেৱল ৰাজ্যখনৰ নিবনুৱাসকলৰ বাবেই সুখৰ খবৰ নহয়, দেশৰ বিভিন্ন প্ৰান্তৰ নিবনুৱা যুৱক-যুৱতীয়েও এই বিনিয়োগৰ ফল লাভ কৰিব বুলি আশা কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
