কুকুৰ পোহপাল দিয়া মালিকসকলৰ বাবে এটা গুৰুত্বপূৰ্ণ খবৰ

পঞ্জাবৰ পাটিয়ালাৰ ঘূমন নগৰ অঞ্চলত সংঘটিত এটা ভয়ংকৰ পিটবুল আক্ৰমণৰ ঘটনাই সমগ্ৰ দেশতে পুনৰবাৰ পোহনীয়া কুকুৰৰ সুৰক্ষা, মালিকৰ দায়িত্ব আৰু বিপজ্জনক কুকুৰৰ ওপৰত নিয়ন্ত্ৰণৰ বিষয়টো চৰ্চালৈ আনিছে। এটা ভাড়াঘৰ চাবলৈ গৈছিল প্ৰাইভেট বেংকৰ মেনেজাৰ অংকিত চভৰৱাল আৰু তেওঁৰ পত্নী শ্বেফালী চভৰৱাল। তেওঁলোকৰ সৈতে আছিল এজন প্ৰপাৰ্টি ডিলাৰ। ঘৰৰ বাহিৰত থিয় হৈ তেওঁলোকে গেটৰ বেল বজোৱাৰ কিছুসময়ৰ পাছতে গেট খোল খায়। গেট খোলাৰ লগে লগে এটা পিটবুল প্ৰজাতিৰ কুকুৰে শ্বেফালীৰ ওপৰত জঁপিয়াই পৰে। কুকুৰটোৱে শ্বেফালীক আক্ৰমণ কৰাৰ লগতে অংকিতকো আক্ৰমণ কৰে। CCTV দৃশ্য অনুসৰি, মাত্ৰ প্ৰায় ৭৫ ছেকেণ্ডৰ ভিতৰতে পিটবুলটোৱে ২৬ বাৰ কামুৰিছিল বুলি অভিযোগ উঠিছে। আক্ৰমণত শ্বেফালীৰ হাত, উৰু আৰু কঁকালত গুৰুতৰ আঘাত লাগে। আনহাতে অংকিতৰ পিঠিতো গম্ভীৰ আঘাত কৰে। এই ঘটনাৰ ভিডিঅ’ ছ’চিয়েল মিডিয়াত ভাইৰেল হোৱাৰ পাছত মানুহৰ মাজত তীব্ৰ ক্ষোভৰ সৃষ্টি হৈছে। কেৱল কুকুৰটোৰ আচৰণেই নহয়, কুকুৰটোৰ মালিকৰ দায়িত্ব আৰু আইনী দায়বদ্ধতাক লৈও প্ৰশ্ন উত্থাপন হৈছে।

কুকুৰৰ আচৰণ বিশেষজ্ঞসকলৰ মতে, এনে আক্ৰমণৰ আঁৰত কেইবাটাও কাৰণ থাকিব পাৰে। অৱশ্যে CCTV দৃশ্য বা ঘটনাৰ সম্পূৰ্ণ তদন্ত অবিহনে কোনো এটা নিৰ্দিষ্ট কাৰণক চূড়ান্ত বুলি ক’ব নোৱাৰি। আমেৰিকান কলেজ অব ভেটেৰিনেৰী বিহেভিয়ৰিষ্টছৰ ডাঃ জুলিয়া আলব্ৰাইটৰ মতে, কুকুৰে নিজৰ এলেকাত কোনো অচিনাকি ব্যক্তিৰ প্ৰৱেশক ভাবুকি হিচাপে ল’ব পাৰে। বিশেষকৈ গেট বা দুৱাৰৰ সন্মুখত থকা ব্যক্তিজন কুকুৰৰ প্ৰথম লক্ষ্য হোৱাৰ আশংকা থাকে। এই ঘটনাত গেট খোলাৰ সময়ত শ্বেফালী অংকিততকৈ আগফালে আছিল।

কুকুৰে মানুহৰ শৰীৰৰ ভংগীমা আৰু আচৰণৰ প্ৰতি অতি সংবেদনশীলভাৱে প্ৰতিক্ৰিয়া কৰিব পাৰে। কোনো ব্যক্তিয়ে হঠাৎ পিছলৈ আঁতৰি যোৱা, দৌৰা বা ভয়ত অস্বাভাৱিকভাৱে হাত-ভৰি লৰচৰ কৰা আদি আচৰণক কুকুৰে ভাবুকি হিচাপে গ্ৰহণ কৰিব পাৰে। CCTV দৃশ্যত শ্বেফালীয়ে কুকুৰটো দেখি পিছলৈ আঁতৰি যোৱা দেখা যায়। অৱশ্যে এইটোৱেই আক্ৰমণৰ নিশ্চিত কাৰণ আছিল বুলি ক’ব নোৱাৰি। বিশেষজ্ঞসকলৰ মতে, আক্ৰমণৰ সময়ত জোৰেৰে চিঞৰা বা হঠাৎ তীব্ৰ শব্দই কেতিয়াবা কুকুৰৰ উত্তেজনা আৰু আক্ৰমণাত্মক আচৰণ বৃদ্ধি কৰিব পাৰে।

ঘটনাৰ পাছত পাটিয়ালা আৰক্ষীয়ে কুকুৰটোৰ মালিকৰ বিৰুদ্ধে FIR ৰুজু কৰিছে। কিন্তু তদন্তৰ সময়লৈকে মালিকজনৰ পৰিচয় নিশ্চিত হোৱা নাই। পীড়িতসকলে মালিকজনৰ নাম জানিব পৰা নাছিল যদিও আৰক্ষীয়ে ঘৰৰ নম্বৰ আৰু অঞ্চলৰ তথ্য সংগ্ৰহ কৰি তদন্ত আৰম্ভ কৰিছে। DSP জংশেৰ সিং ৰন্ধাৱাই জনোৱা অনুসৰি, আৰক্ষীয়ে পীড়িতসকলৰ বক্তব্য গ্ৰহণ কৰি FIR ৰুজু কৰিছে আৰু তদন্তৰ জৰিয়তে অভিযুক্তৰ পৰিচয় নিৰ্ধাৰণ কৰা হ’ব।

কোনবোৰ আইনী ধাৰাত গোচৰ ৰুজু হৈছে?

আৰক্ষীয়ে ভাৰতীয় ন্যায় সংহিতা (BNS), ২০২৩ৰ কেইবাটাও ধাৰাৰ অধীনত গোচৰ ৰুজু কৰিছে বুলি প্ৰকাশ পাইছে। ধাৰা ২৯১ত পশুৰ সৈতে জড়িত অসাৱধান আচৰণৰ কথা উল্লেখ আছে। নিজৰ নিয়ন্ত্ৰণত থকা পশুৰ পৰা মানুহৰ জীৱন বা গুৰুতৰ আঘাতৰ সম্ভাৱ্য বিপদ ৰোধ কৰিবলৈ প্ৰয়োজনীয় সুৰক্ষা ব্যৱস্থা গ্ৰহণ নকৰিলে এই ধাৰা প্ৰযোজ্য হ’ব পাৰে। ইয়াত ছয় মাহলৈ কাৰাদণ্ড, জৰিমনা বা দুয়োটাৰে ব্যৱস্থা আছে। ইয়াৰ উপৰি ঘটনাৰ প্ৰকৃতি অনুসৰি ধাৰা 125A আৰু 125Bৰ অধীনতো ব্যৱস্থা লোৱাৰ কথা উল্লেখ কৰা হৈছে। ইয়াৰ পিছতেই স্বাভাৱিকভাৱে এটা প্ৰশ্ন উত্থাপন হৈছে—এজন মানুহ গুৰুতৰভাৱে আহত হোৱা ঘটনাত কেৱল কাৰাদণ্ড বা সামান্য জৰিমনাই যথেষ্ট নেকি? বিশেষকৈ কোনো কুকুৰৰ মালিকে নিজৰ পোহনীয়া জন্তুটোক নিয়ন্ত্ৰণত ৰখাত ব্যৰ্থ হ’লে তেওঁৰ দায়বদ্ধতাৰ পৰিসৰ কিমান হ’ব লাগে, সেই বিষয়টো লৈ নতুনকৈ আলোচনা আৰম্ভ হৈছে।

কুকুৰে কামুৰি গুৰুতৰভাৱে আহত কৰিলে চিকিৎসা ব্যয়ৰ ক্ষেত্ৰত কিছুমান বীমা পলিচীৰ পৰা সহায় লাভ কৰাৰ সুযোগ থাকিব পাৰে। বহু স্বাস্থ্য বীমা পলিচীত animal bite বা dog biteৰ ফলত হোৱা চিকিৎসাক accident-related treatment হিচাপে সামৰি লোৱা হয়। অৱশ্যে প্ৰতিখন পলিচীৰ নিয়ম বেলেগ হ’ব পাৰে। সেয়েহে বীমা কোম্পানীৰ চৰ্তসমূহ পৰীক্ষা কৰাটো গুৰুত্বপূৰ্ণ। কিছুমান pet insurance পলিচীত third-party liabilityৰ ব্যৱস্থা থাকে। অৰ্থাৎ পোহনীয়া কুকুৰে আন কোনো ব্যক্তিক ক্ষতি কৰিলে পলিচীৰ চৰ্ত অনুসৰি ক্ষতিপূৰণ দিয়াৰ ব্যৱস্থা থাকিব পাৰে।

ভাৰতত পিটবুলৰ ওপৰত ৰাষ্ট্ৰীয়ভাৱে নিষেধাজ্ঞা আছেনে?

পিটবুল, ৰটৱেইলাৰ আদি কুকুৰৰ জাতৰ ওপৰত ভাৰতত বৰ্তমান সৰ্বভাৰতীয় পৰ্যায়ত একেটা স্থায়ী blanket ban নাই। ২০২৪ চনৰ মাৰ্চত কেন্দ্ৰীয় চৰকাৰৰ মৎস্য, পশুপালন আৰু দুগ্ধ বিভাগে পিটবুলকে ধৰি ২৩টা আক্রমণাত্মক বুলি গণ্য কৰা কুকুৰৰ জাতৰ আমদানি, প্ৰজনন আৰু বিক্ৰীৰ ওপৰত নিষেধাজ্ঞা আৰোপৰ নিৰ্দেশ জাৰি কৰিছিল। কিন্তু এই নিৰ্দেশক লৈ আইনী বিতৰ্কৰ সৃষ্টি হয়। দিল্লী উচ্চ ন্যায়ালয়ে ২০২৪ চনৰ এপ্ৰিলত সংশ্লিষ্ট নিৰ্দেশ বাতিল কৰিছিল। আদালতে সিদ্ধান্ত লোৱাৰ পূৰ্বে সংশ্লিষ্ট পক্ষ আৰু পশু চিকিৎসা বিশেষজ্ঞসকলৰ সৈতে পৰ্যাপ্ত পৰামৰ্শ কৰা হোৱা নাছিল বুলি বিষয়টো উত্থাপন হৈছিল। কৰ্ণাটক উচ্চ ন্যায়ালয়েও অনুৰূপ বিষয়ত কয় যে বিধিগত ভিত্তি আৰু উপযুক্ত কমিটীৰ পৰামৰ্শ অবিহনে সকলোৰে ওপৰত প্ৰযোজ্য blanket ban আৰোপ কৰাটো সহজ বিষয় নহয়।

পাটিয়ালাত এতিয়া কি ব্যৱস্থা লোৱা হ’ব?

ঘটনাটোৰ পাছত পাটিয়ালাৰ মেয়ৰ কুন্দন গোগিয়াই চহৰত আক্রমণাত্মক বুলি গণ্য কৰা কুকুৰৰ জাত পোহনীয়া হিচাপে ৰখাৰ ক্ষেত্ৰত নিষেধাজ্ঞা আৰোপৰ কথা ঘোষণা কৰিছে। এই বিষয়ত পৌৰ নিগমৰ সভাত বিশেষ প্ৰস্তাৱ উত্থাপন কৰাৰ কথাও কোৱা হৈছে। পৌৰ নিগমৰ কমিছনাৰ পূজা গ্ৰেৱালে ইতিমধ্যে বিপজ্জনক জাতৰ কুকুৰ পোহনীয়া হিচাপে ৰখাৰ ক্ষেত্ৰত নিষেধাজ্ঞা থকা বুলি উল্লেখ কৰি পোহনীয়া কুকুৰৰ পঞ্জীয়ন প্ৰক্ৰিয়া অধিক কঠোৰ কৰাৰ কথা প্ৰকাশ কৰিছে। ইয়াৰ লগে লগে এটা গুৰুত্বপূৰ্ণ প্ৰশ্নও উত্থাপন হৈছে—যদি পাটিয়ালা পৌৰ নিগমৰ নিয়ম অনুসৰি এনে কুকুৰ পোহনীয়া হিচাপে ৰখা নিষিদ্ধ আছিল, তেন্তে এই পিটবুলটো সেই স্থানত কেনেকৈ ৰখা হৈছিল? অৰ্থাৎ কেৱল নতুন আইন বা নিষেধাজ্ঞা জাৰি কৰাই যথেষ্ট নহয়; নিয়মসমূহ বাস্তৱত কিমান কঠোৰভাৱে ৰূপায়ণ কৰা হৈছে, সেইটোও সমানেই গুৰুত্বপূৰ্ণ।

আৱৰ্জনা বা পথৰ কুকুৰৰ আক্ৰমণক লৈও দেশত দীৰ্ঘদিন ধৰি বিতৰ্ক চলি আহিছে। ২০২৫ চনৰ ২৮ জুলাইত উচ্চতম ন্যায়ালয়ে এটা সংবাদ প্ৰতিবেদনৰ ভিত্তিত স্বতঃস্ফূৰ্তভাৱে বিষয়টো গ্ৰহণ কৰিছিল। প্ৰতিবেদনটোত পথৰ কুকুৰৰ আক্ৰমণত এগৰাকী ছয় বছৰীয়া শিশুৰ মৃত্যুৰ কথা উল্লেখ আছিল। পৰৱৰ্তী সময়ত দিল্লী-NCR অঞ্চলত পথৰ কুকুৰৰ সমস্যাক লৈ উচ্চতম ন্যায়ালয়ে বিভিন্ন নিৰ্দেশ জাৰি কৰে। ২০২৫ চনৰ ৭ নৱেম্বৰত বিদ্যালয়, চিকিৎসালয়, মহাবিদ্যালয়, বাছ আস্থান আৰু ৰে’ল ষ্টেচনৰ দৰে গুৰুত্বপূৰ্ণ স্থানৰ পৰা পথৰ কুকুৰ আঁতৰোৱাৰ বিষয়টোত আদালতে নিৰ্দেশ দিয়ে।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ