ভাৰতীয় মহিলা ক্ৰিকেট দলত আহিছে এক গুৰুত্বপূৰ্ণ পৰিৱৰ্তন। প্ৰায় এটা দশক ধৰি দলটোক নেতৃত্ব দিয়া হৰমনপ্ৰীত কৌৰে সকলো ফৰ্মেটৰ অধিনায়ক পদৰ পৰা আঁতৰি যোৱাৰ সিদ্ধান্ত লৈছে। ইয়াৰ পিছত তেওঁ কেৱল এগৰাকী খেলুৱৈ হিচাপে ভাৰতীয় দলৰ হৈ খেলি যাব। হৰমনপ্ৰীত কৌৰৰ এই সিদ্ধান্তৰ পিছতে এতিয়া ভাৰতীয় মহিলা দলৰ নতুন অধিনায়ক হিচাপে স্মৃতি মান্ধনাৰ নাম বিশেষভাৱে চৰ্চালৈ আহিছে।
এছিয়ান গেমছৰ সামৰণিৰ পিছত সোমবাৰে ভাৰতীয় মহিলা ক্ৰিকেট দলক লৈ BCCI-এ এখন পৰ্যালোচনা বৈঠক অনুষ্ঠিত কৰিছিল। গুৱাহাটীত অনুষ্ঠিত এই বৈঠকত দলৰ অধিনায়ক হৰমনপ্ৰীত কৌৰ, উপ-অধিনায়ক স্মৃতি মান্ধনা আৰু BCCIৰ সচিব দেৱজিৎ শইকীয়া উপস্থিত আছিল। বৈঠকত BCCI-এ নেতৃত্বৰ ক্ষেত্ৰত পৰিৱৰ্তন বিচৰাৰ বিষয়ে হৰমনপ্ৰীত আৰু মান্ধনাক সদৰী কৰা বুলি হিন্দুস্তান টাইমছৰ এক প্ৰতিবেদনত উল্লেখ কৰিছে। ভৱিষ্যতৰ কথা মনত ৰাখি এতিয়াৰে পৰা এগৰাকী নতুন অধিনায়ক গঢ়ি তোলাৰ সময় আহি পৰিছে বুলি ব’ৰ্ডে মত প্ৰকাশ কৰিছিল।
অৱশ্যে হৰমনপ্ৰীত কৌৰে নিজে অধিনায়ক হিচাপে আগবাঢ়ি যাব বিচাৰিছিল। তেওঁৰ মতে, দলটোক এই সময়ত অভিজ্ঞ নেতৃত্বৰ প্ৰয়োজন আছিল আৰু তেওঁ তিনিওটা ফৰ্মেটতে দলক নেতৃত্ব দিবলৈ সাজু আছিল। কিন্তু T20 ক্ৰিকেটত কৌৰে দীৰ্ঘদিনৰ পৰা দুৰ্বল বেটিং প্ৰদৰ্শনৰ সৈতে যুঁজি থকা বিষয়টোক স্বীকাৰ কৰিছিল। অৱশ্যে অনিচ্ছাসত্বেও কম বয়সীয়া খেলুৱৈসকলক অধিক সুযোগ দিয়াৰ বাবে প্ৰয়োজন হ’লে অধিনায়ক পদ এৰিবলৈ তেওঁ সাজু বুলি ইংগিত দিছিল। তথাপি হৰমনপ্ৰীতৰ ইচ্ছা আছিল যে অন্ততঃ এদিনীয়া আৰু টেষ্ট ক্ৰিকেটত তেওঁ অধিনায়ক হিচাপে থাকক। কিন্তু সকলো ফৰ্মেটতে নেতৃত্বৰ পৰিৱৰ্তন কৰাৰ ক্ষেত্ৰত BCCI নিজৰ সিদ্ধান্তত অটল হৈ থাকে।
২০১৬ চনত হৰমনপ্ৰীত কৌৰে ভাৰতীয় মহিলা T20 দলৰ অধিনায়ক হিচাপে দায়িত্ব গ্ৰহণ কৰিছিল। পৰৱৰ্তী সময়ত তেওঁ এদিনীয়া আৰু টেষ্ট দলৰো নেতৃত্ব লাভ কৰে। অৰ্থাৎ প্ৰায় এটা দশক ধৰি ভাৰতীয় মহিলা ক্ৰিকেট দলৰ নেতৃত্বৰ সৈতে জড়িত হৈ আছিল হৰমনপ্ৰীত। তেওঁৰ নেতৃত্বত ভাৰতীয় মহিলা ক্ৰিকেট দলে কেইবাটাও উল্লেখযোগ্য সফলতা লাভ কৰে। ২০২০ চনত ভাৰতীয় দলটোৱে প্ৰথমবাৰৰ বাবে মহিলা টি-২০ বিশ্বকাপৰ ফাইনেলত প্ৰৱেশ কৰিছিল। ইয়াৰ উপৰি এছিয়ান গেমছতো ভাৰতীয় মহিলা ক্ৰিকেট দলে স্বৰ্ণ পদক লাভ কৰিছিল। কৌৰৰ সৰ্বশ্ৰেষ্ঠ সাফল্য হৈছে ২০২৫ৰ এদিনীয়া মহিলা বিশ্বকাপত চেম্পিয়নৰ খিতাপ অৰ্জন কৰাটো। হৰমনপ্ৰীত কৌৰৰ অধিনায়কত্বৰ অধ্যায় শেষ হ’লেও ভাৰতীয় দলৰ সৈতে তেওঁৰ যাত্ৰা এতিয়াও শেষ হোৱা নাই। আগন্তুক দিনত তেওঁ এগৰাকী খেলুৱৈ হিচাপে দলৰ অংশ হৈ থাকিব। ইফালে, নতুন অধিনায়ক নিৰ্বাচনৰ ক্ষেত্ৰত স্মৃতি মান্ধনাৰ নাম এতিয়া সন্মুখলৈ আহিছে। বিপৰীতে জেমিমা ৰড্ৰিগছ অথবা দিপ্তী শৰ্মাক দিব পাৰে সহঃ অধিনায়কৰ দায়িত্ব। অৱশ্যে চূড়ান্ত সিদ্ধান্ত BCCI আৰু নিৰ্বাচকসকলেই গ্ৰহণ কৰিব।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
