এটাও গ’ল বা এছিষ্ট নকৰাকৈয়ে কিয় গোল্ডেন বলৰ সন্মান লাভ কৰিলে ৰড্ৰিয়ে?

সদ্যসমাপ্ত ফিফা বিশ্বকাপত অসংখ্য তাৰকাই নিজৰ প্ৰতিভাৰে উজলি উঠিছে। এমবাপে একাৰাহে দ্বিতীয়বাৰলৈ গ’ল্ডেন বুটৰ সন্মান লাভ কৰিলে, লিয়নেল মেছি, জুড বেলিংহেম, য়ামাল, এৰ্লিং হালাণ্ড, হেৰী কেন, ওছমান ডেম্বেলেকে ধাৰাবাহিকভাৱে উজ্জীৱিত প্ৰদৰ্শন কৰি দৰ্শকক মুগ্ধ কৰিলে। কিন্তু টুৰ্ণামেণ্টৰ শেষত আটাইতকৈ মূল্যৱান খেলুৱৈ হিচাপে যাক স্বীকৃতি দিয়া হ’ল, তেওঁ সদ্যসমাপ্ত বিশ্বকাপৰ গ’লস্ক’ৰাৰ তালিকাতো নাছিল, নাছিল এছিষ্টৰো তালিকাত। কিন্তু তেওঁ আছিল ফুটবলৰ নতুন বিশ্ব চেম্পিয়ন স্পেইনৰ মেৰুদণ্ডস্বৰূপ। তেওঁ এই বিশ্বকাপৰ সবাটোকৈ মূল্যৱান ব্যক্তিগত সন্মান গোল্ডেন বলৰ অধিকাৰী ৰড্ৰিগো হেৰ্নাণ্ডেজ কাছকাণ্টে, চমুকৈ সকলোৰে পৰিচিত ৰড্ৰি। ৰড্ৰিক এই অভিজাত সন্মানেৰে সন্মানিত কৰাটোৱে ইয়াকেই প্ৰমাণ কৰে যে আধুনিক ফুটবল কেৱল গ’ল স্ক’ৰ কৰাৰেই খেল নহয়, মেচ এখনক নিয়ন্ত্ৰণ কৰাৰো কলা। মেছি, এমবাপে, হালাণ্ডৰ দৰে গ’ল স্ক’ৰ নকৰিলেও মেচখনক নিয়ন্ত্ৰণত ৰখা কলাৰ বাবেই ৰড্ৰিয়ে লাভ কৰিলে এই ঈৰ্ষণীয় সন্মান।

ৰড্ৰিৰ এই সফলতাই ইয়াকো প্ৰমাণ কৰে যে যিকোনো দলীয় খেলত কেৱল শক্তিশালী শৰীৰেই সফলতাৰ একমাত্ৰ চাবিকাঠি নহয়। ৰড্ৰিৰ গতি ফুটবল বিশ্বৰ আন তাৰকাসকলৰ তুলনাত অতি দ্ৰুত নহ’ব পাৰে, নহ’ব পাৰে বিস্ময়কৰ ড্ৰিবলাৰো। কিন্তু ৰড্ৰিয়ে সহজ যেন লগা কিছুমান শৈলীৰে নিজৰ পৰিসংখ্যাৰ বাবে নহয়, দলৰ বাবে আনিলে অভূতপূৰ্ব সফলতা। ১০-১৫ গজৰ পাছেৰে মেচ এখনৰ গতি কেনেকৈ নিজৰ নিয়ন্ত্ৰণত ৰাখিব লাগে সেয়া ৰড্ৰিতকৈ বেছি সাম্প্ৰতিক ফুটবলত অন্য কোনো তাৰকাই হয়টো নাজানে। যিসকলে ফুটবলক বুজে, ফুটবলৰ গাণিতিক বা ব্যাকৰণৰ ভাষাক বুজে তেওঁলোকে জানে যিকোনো এখন মেচত ৰড্ৰিৰ এই নীৰৱ যেন লগা প্ৰভাৱেই তেওঁক অসাধাৰণ কৰি তোলে। সদ্যসমাপ্ত বিশ্বকাপত ৰড্ৰিয়ে এটাও গ’ল কৰা নাই। এটাও এছিষ্টো দিয়া নাই। কিন্তু ৰড্ৰিৰ পাছিং সফলতাৰ হাৰ আছিল ৯৩.২ শতাংশ। টেকল, ইণ্টাৰচেপচন বা ফাউলৰ পৰিসংখ্যায়েও ৰড্ৰিক পৃথিৱীৰ শ্ৰেষ্ঠ মিডফিল্ডাৰসকলৰ অন্যতম বুলি প্ৰমাণ নকৰে কাৰণ ৰড্ৰি এই সকলো পৰিসংখ্যাৰ উৰ্ধত এগৰাকী দলৰ বাবে খেলা খেলুৱৈ। সদ্যসমাপ্ত বিশ্বকাপত ৰড্ৰিয়ে সৰ্বাধিক ৭৫৬টা সফল পাছ সম্পন্ন কৰিছিল। ই এইটোকেই প্ৰমাণ কৰে যে ৰড্ৰিৰ পৰা বল ওলোৱা মানে কোনোবা এজন দলীয় সতীৰ্থৰ ভৰিতেই পৰিব। কেৱল এই বিশ্বকাপতেই নহয়, এই অসাধৰণ শৈলীৰ বাবেই ইউৰো ২০২৪তো শ্ৰেষ্ঠ খেলুৱৈৰ সন্মান লাভ কৰিছিল স্পেইনৰ অধিনায়কজনে।

ৰড্ৰিৰ শৈশৱ আৰু কিশোৰকালো বৰ্তমানৰ স্বভাৱটোৰ দৰেই অত্যন্ত শৃংখলাবদ্ধ আছিল। তেওঁৰ খেলত যি শৃংখলাবদ্ধ শৈলী বৰ্তমান বিৰাজমান সেয়া যেন শৈশৱৰ জীৱনধাৰাৰ পৰায়ে লাভ কৰিছিল। তেওঁ মধ্যবিত্ত, শিক্ষিত আৰু শৃংখলাপ্ৰিয় পৰিয়ালত ডাঙৰ হোৱা ৰড্ৰি সৰুৰে পৰাই যথেষ্ট নম্ৰ, ফুটবলৰ লগতে শিক্ষাতো সমানে গুৰুত্ব দিয়া কিশোৰ আছিল। শৈশৱত তেওঁ অতি শান্ত, সংযত আৰু চিন্তাশীল স্বভাৱৰ আছিল বুলি তেওঁক ওচৰৰ পৰা পোৱা লোকসকলে বিভিন্ন সময়ত মন্তব্য কৰি আহিছে। আন বহু শিশুৰ দৰে কেৱল খেলতেই ব্যস্ত নাথাকি তেওঁ ফুটবলৰ কৌশল, বলৰ গতি আৰু খেলুৱৈসকলৰ স্থানবিন্যাস লক্ষ্য কৰি ফুটবলক আয়ত্ত কৰি ভাল পাইছিল বুলি শৈশৱৰ প্ৰশিক্ষকসকলে মন্তব্য কৰে। খুব কম বয়সতে ৰড্ৰিয়ে স্থানীয় ক্লাবত খেলিবলৈ আৰম্ভ কৰিছিল। ৰড্ৰিৰ প্ৰতিভালৈ লক্ষ্য কৰি তেওঁক এটলেটিকো ডি মাড্ৰিদ একাডেমীত ভৰ্তি কৰোৱা হৈছিল। কিন্তু এসময়ত প্ৰতিযোগিতামূলক ফুটবলৰ বাবে শাৰীৰিকভাৱে দুৰ্বল বুলি অভিহিত কৰি এটলেটিকো ডি মাড্ৰিদ একাডেমীয়ে ৰড্ৰিক বাহিৰ কৰি দিয়ে। এটলেটিকোৰ এই সিদ্ধান্তই যেন ৰড্ৰিৰ জীৱন সলনি কৰাত নিৰ্ণায়ক ভূমিকা পালন কৰিলে। এটলেটিকোৰ এই সিদ্ধান্তৰ পিছতে ফুটবলক পূৰ্বতকৈও অধিক গুৰুত্বসহকাৰে লবলৈ আৰম্ভ কৰে ৰড্ৰিয়ে। পূৰ্বতকৈ অনুশীলনৰ মাত্ৰা, ফুটবলক তীক্ষ্ণতাৰে পৰ্যবক্ষেণ কৰাৰ লগতে নিজৰ শাৰীৰিক ক্ষমতাক কেনেকৈ চতুৰভাৱে ব্যৱহাৰ কৰিব পাৰি এই দিশত মনোনিৱেশ কৰিবলৈ ধৰে ৰড্ৰিয়ে। এটলেটিকোই একাডেমীৰ পৰা ৰড্ৰিক বাহিৰ কৰাৰ পিছত তেওঁ  ভিয়াৰিয়েলৰ যুৱ একাডেমীত যোগ দিয়ে। তাত তেওঁ প্ৰশিক্ষকৰ পৰাও অধিক সঁহাৰি আৰু আত্মবিশ্বাস লাভ কৰে। ভিয়াৰেলতেই ৰড়্ৰিয়ে ধৈৰ্য, কঠোৰ পৰিশ্ৰম আৰু নিয়মীয়া অনুশীলনৰ জৰিয়তে নিজৰ খেলৰ মান বহুগুণে উন্নত কৰিবলৈ সক্ষম হয়। কিয়নো ভিয়াৰিয়েলৰ প্ৰশিক্ষকসকলে ৰড্ৰিৰ বুদ্ধিদীপ্ত খেল, নিখুঁত পাছ আৰু খেল নিয়ন্ত্ৰণ কৰাৰ ক্ষমতাক বিশেষভাৱে মূল্যায়ন কৰিছিল।

ৰড্ৰি কেৱল ফুটবলতেই সীমাবদ্ধ নাছিল। শিক্ষাৰ প্ৰতিও তেওঁ দিছিল সমান গুৰুত্ব দিছিল। ফুটবল অনুশীলনৰ মাজতো তেওঁ বিশ্ববিদ্যালয় পৰ্যায়ত ব্যৱসায় আৰু অৰ্থনীতি-সম্পৰ্কীয় অধ্যয়ন কৰিছিল। এই অভ্যাসে তেওঁক সিদ্ধান্ত লোৱাত, সময় পৰিচালনাত আৰু পেছাদাৰী জীৱনত অধিক পৰিপক্ব কৰি তুলিছিল বুলি বিভিন্ন সাক্ষাৎকাৰত তেওঁ নিজেই মন্তব্য কৰিছে। শিক্ষা জীৱনৰ পৰা কেনেকৈ চাপৰ মাজতো শান্তভাৱে সিদ্ধান্ত ল’ব পাৰি, সতীৰ্থসকলক সংগঠিত কৰি খেল নিয়ন্ত্ৰণ কৰাৰ নেতৃত্বৰ দৰে গুণ লাভ কৰিছিল বুলি তেওঁ বিভিন্ন সময়ত মন্তব্য কৰি আহিছে। ৰড্ৰিৰ শৈশৱ আৰু কৈশোৰৰ কাহিনীৰ প্ৰেৰণাদায়ক দিশ এইটোৱেই যে প্ৰাথমিক ব্যৰ্থতা বা বাধা সত্ত্বেও অধ্যৱসায়, আত্মবিশ্বাস আৰু নিয়মিত পৰিশ্ৰমে এগৰাকী খেলুৱৈক বিশ্বমানৰ সফলতালৈ লৈ যাব পাৰে।

এই প্ৰতিবেদন যুগুতাইছে মানসজ্যোতিয়ে