অসম লাইভ২৪ঃ বিগত কেইবাদিনো ধৰি সংবাদ শিৰোনামত গৌতম আদানীৰ শ্বেয়াৰ মাৰ্কেটত হোৱা লোকচানৰ খবৰ। প্ৰকৃততে এটা মাত্ৰ কাৰণতেই হোৰাহোৰে নামি আহিল আদানীৰ শ্বেয়াৰ মাৰ্কেট। কেৱল শ্বেয়াৰ মাৰ্কেটত লোকচানেই নহয় হ্ৰাস পাইছে তেওঁৰ সম্পত্তিৰ পৰিমানো। ২০ আৰৱ ডলাৰতকৈয়ো অধিক লোকচানৰ সন্মুখীন হৈছে আদানী। আনহাতে ৫০ আৰৱ ডলাৰৰ ঘাটিয়েই লাগিছে ধনকুবেৰ আদানীৰ৷ বিশ্বৰ তৃতীয় ধনী ব্যক্তিৰ পৰা সপ্তম স্থানলৈ অৱনমিত হৈছে আদানীৰ স্থান৷
হিণ্ডেনবাৰ্গ ৰিপৰ্টত কি আছে?
হিণ্ডেনবাৰ্গৰ ৰিচাৰ্ছৰ ৰিপৰ্ট অনুসৰি আদানী গ্ৰুপে এতিয়া ২০, ০০০ কোটি টকাৰ FPO আনিছে৷ আদানী এণ্টাৰপ্ৰাইজ লিমিটেডৰ বাবে এই FPO এ প্ৰথম দিনটোত মাত্ৰ এক শতাংশ ছাৱস্ক্ৰিপশ্ব্যনহে লাভ কৰিছে৷ এইয়াই হয়তো গৌতম আদানীৰ জীৱনলৈ অহা প্ৰথমটো বৃহৎ প্ৰত্যাহ্বান৷ হিণ্ডেনবাৰ্গৰ প্ৰতিবেদনত আদানী গ্ৰুপৰ ওপৰত অভিযোগ তুলি কোৱা হৈছে যে, আদানি গ্ৰুপৰ কোম্পানীবোৰৰ শ্বেয়াৰৰ মূল্য বৃদ্ধিৰ ভুল তথ্য দি অহা হৈছিল৷ এই প্ৰতিবেদন প্ৰকাশৰ পাছতেই হোৰাহোৰে নামিছে আদানিৰ শ্বেয়াৰ মাৰ্কেট৷ অৱশ্যে, এয়াই আদানীৰ জীৱনলৈ অহা প্ৰথমটো প্ৰত্যাহ্বান নহয়৷ ইয়াৰ পূৰ্বেও আদানীয়ে বহুতো প্ৰত্যাহ্বানৰ সন্মুখীন হৈছে। ১৯৯৮ চনত ডকাইতে অপহৰণ কৰাৰ প্ৰায় ১১ বছৰ পিছত সন্ত্ৰাসবাদীয়ে মুম্বাইত আক্ৰমণ কৰাৰ সময়ত তাজ হোটেলত বন্দী হৈ থকা সকলৰ ভিতৰত আদানি গ্ৰুপৰ মুৰব্বী গৌতম আদানিও আছিল। কলেজীয়া শিক্ষা আদাতে সামৰা আদানীয়ে ব্যৱসায়িক দক্ষতাৰেই ভাৰতৰ আটাইতকৈ ধনী ব্যক্তি হ’বলৈ সক্ষম হৈছিল৷
LIC, SBI-য়ে ৰাখিবনে আদানী গ্ৰুপৰ সৈতে লেন-দেন?
জ্যেষ্ঠ কংগ্ৰেছ নেতা তথা ৰাজ্যসভাৰ সদস্য ৰণদীপ সুৰজেৱালাই আদানি শ্বেয়াৰ মূল্য হ্ৰাস হোৱাৰ পাছতেই কেইবাটাও তথ্য দাঙি ধৰিছে৷ LICক ‘ৰাজহুৱা ধন’ৰ দ্বাৰা পুঁজি যোগান ধৰা বুলি উল্লেখ কৰি সুৰজেৱালাই কয় যে আদানি গ্ৰুপৰ শ্বেয়াৰত LICৰ বিনিয়োগ মূল্য ৭৭,০০০ কোটি পৰা ৫৩,০০০ কোটিলৈ হ্ৰাস পাইছে৷ যাৰ ফলত ২৩,৫০০ কোটি লোকচান হৈছে৷ আনহাতে LIC ৰ শ্বেয়াৰ ২২,৪৪২ কোটি হেৰুৱাইছে। ইমান লোকচানৰ পাছতো LIC এতিয়াও আদানি গ্ৰুপত ৩০০ কোটি কিয় বিনিয়োগ কৰিছে বুলি প্ৰশ্ন কৰিছে জ্যেষ্ঠ কংগ্ৰেছ নেতাগৰাকীয়ে৷ SBI-ৰ সন্দৰ্ভত শ্ৰীযুত সুৰজেৱালাই উল্লেখ কৰে যে SBIত কৰ্মচাৰী পেঞ্চন ফাণ্ড আৰু SBI লাইফে এতিয়াও আদানি গোটত ২৫ কোটিৰ বিনিয়োগ ৰাখিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
