অসম লাইভ ২৪ঃ মৰ্ত্যৰ পৰা আজি বিদায় মাগিব দেৱী দুৰ্গাই। বিগত ১ মাহে চলা উৎসৱৰ প্ৰস্তুতিৰ অৱসান ঘটিব। মৰ্ত্য এৰি দুৰ্গতিনাশিনী কৈলাশলৈ উভতিব। মৰ্ত্যত ম্লান পৰিব উৎসাহ। দুৰ্গাপূজাৰ শেষৰ দিনটোক কিয় বিজয়া দশমী বুলি কোৱা হয় জানেনে?
মহিষাসুৰ নামৰ অসুৰে ব্ৰহ্মাৰ বৰ পায় প্ৰৱল ক্ষমতাশালী হৈ উঠিছিল। ব্ৰহ্মাই বৰ দিছিল যে কোনো পুৰুষেই মহিষাসুৰক বধ কৰিব নোৱাৰিব। কিন্তু বৰত এই কথা উল্লেখ নাছিল যে কোনো নাৰীয়েও মহিষাসুৰক বধ কৰিব নোৱাৰিব। ব্ৰহ্মাৰ বৰ পাই স্বৰ্গ, মৰ্ত্য, পাতাল সকলোতে আধিপত্য চলাবলৈ আগবাঢ়িছিল মহিষাসুৰে। দেৱৰাজ ইন্দ্ৰকেই স্বৰ্গৰ পৰা বাহিৰ কৰি দিছিল মহিষাসুৰে। শেষত উপায়হীন হৈ দেৱতাসকলে তেওঁলোকৰ সন্মিলিত শক্তিৰে জন্ম দিছিল মা দুৰ্গাক।
পুৰাণত উল্লেখ থকা মহিষাসুৰ বধৰ কাহিনী অনুসৰি শুক্লা দশমীৰ নিশা দুৰ্গাই মহিষাসুৰক বধ কৰে। এই বিজয়কেই বিজয়া দশমী বুলি কোৱা হয়। আনহাতে ৰামায়ণত উল্লেখ থকা অনুসৰি ত্ৰেতা যুগত লংকাৰ ৰজা ৰাৱণে শ্ৰী ৰামচন্দ্ৰৰ পত্নী সীতাক অপহৰণ কৰে। দেৱী দুৰ্গাৰ আশীৰ্বাদ লৈহে ৰামে পত্নী সীতাক উদ্ধাৰৰ বাবে লংকা আক্ৰমণ কৰে। শুক্লা দশমীতেই ৰামে ৰাৱন বধ কৰে। ৰাৱণৰ বিৰুদ্ধে ৰামৰ যুদ্ধ জয়ৰ এই দিনটোকো বিজয়া দশমী বুলি কোৱা হয়।
মহাভাৰততো বিজয়া দশমীৰ কথা উল্লেখ আছে। পাণ্ডৱৰ ১২ বছৰীয়া বনবাস আৰু এবছৰ অজ্ঞাতবাসৰ সময়ত আহিন মাহৰ শুক্লা দশমীতেই তেওঁলোকে লুকুৱাই ৰখা অস্ত্ৰভাণ্ডাৰ পুনৰুদ্ধাৰ কৰে আৰু নিজৰ পৰিচয় সকলোৰে সন্মুখত তুলি ধৰে। সেয়ে এই দিনটোকো বিজয়া দশমী বুলি কোৱা হয়।
বৌদ্ধ ধৰ্মালম্বী লোকসকলেও বিজয়া দশমীক বিশ্বাস কৰে। বহুতেই বিজয়া দশমীক অশোক বিজয়া দশমী বুলিও ক’ব খোজে। কলিঙ্গ যুদ্ধৰ পিছতেই ১০ দিন ধৰি মৌৰ্য সম্ৰাট অশোকে বিজয় উৎসৱ পালন কৰিছিল। সেই বিজয় উৎসৱৰ অন্তত শুক্লা দশমীতেই সম্ৰাট অশোকে বৌদ্ধ ধৰ্ম গ্ৰহণ কৰে। সেয়ে বিজয়া দশমী বৌদ্ধ ধৰ্মালম্বী লোকসকলৰ বাবেও গুৰুত্বপূৰ্ণ দিন।
উল্লেখ্য যে বহুসংখ্যকৰ মতে এই দিনটোত দেৱীক মাটিৰ প্ৰতিমাৰ পৰা মুক্ত কৰি দিয়া হয়। সেইবাবেই এই দিনটো বিজয়া দশমী হিচাপে পৰিচিত। ৪ দিন ধৰি দেৱীৰ মৃন্ময়ীৰূপক পূজা কৰি থকাৰ পিছত দশমীত বিসৰ্জনৰ অন্ততহে দেৱীয়ে মুক্তি লাভ কৰে বুলিও একাংশই ক’ব খোজে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ