চৰকাৰী সংস্থা বা আইনী ক্ষমতা থকা প্ৰতিষ্ঠানৰ পৰা দিয়া হৈছিল বন্ধ কৰাৰ নিৰ্দেশনা! ভাৰতত বন্ধ হ’ল ককৰ’চ জনতা পাৰ্টীৰ এক্স হেণ্ডেল

ভাৰতত বন্ধ কৰা হ’ল কক’ৰচ জনতা পাৰ্টীৰ এক্স হেণ্ডেলৰ একাউণ্ট৷ বিগত কেইবাদিন ধৰি সামাজিকমাধ্যমত খুবেই জনপ্ৰিয় হৈ আছে সদ্য জন্মগ্ৰহণ কৰা এই ব্যঙ্গাত্মক ৰাজনৈতিক দলৰ একাউণ্টটো৷ ইনষ্টাগ্ৰামতো CJP ৰ ফলৱাৰ্ছৰ সংখ্যাই বিজেপি দলক চেৰাই গৈছে৷ শেহতীয়াকৈ ২১ মেৰ দিনটোত এক্স কৰ্তৃপক্ষই ভাৰতত একাউণ্ট বন্ধ কৰি দিয়াৰ সিদ্ধান্ত লয়৷

এক্স হেণ্ডেলৰ তৰফৰ পৰা জনোৱা হৈছে যে এখন নিৰ্দিষ্ট দেশৰ কোনো চৰকাৰী সংস্থা বা আইনী ক্ষমতা আছে তেনে প্ৰতিষ্ঠানৰ তৰফৰ পৰা আনুষ্ঠানিকভাৱে কোনো নিৰ্দেশ আহিলে এই ধৰণৰ সিদ্ধান্ত লোৱা হয়৷ এইক্ষেত্ৰত একাউণ্ট সম্পূৰ্ণৰূপে বন্ধ কৰি দিয়া হয়৷ কেৱল এখন নিৰ্দিষ্ট দেশৰ ব্যৱহাৰকাৰীয়ে যাতে একাউণ্টটোৰ কনটেণ্ট চাব নোৱাৰে তাৰবাবে ব্যৱস্থা কৰা হয়৷ যাতে স্থানীয় আইন অমান্য নহয় সেয়া চিন্তা কৰিয়েই এই সিদ্ধান্ত লয় কৰ্তৃপক্ষই৷ বিশ্বৰ অন্যান্য দেশৰ মানুহে অৱশ্যে এই একাউণ্ট দেখা পাব৷ বিজ্ঞাপ্তিত কোৱা হৈছে এই ধৰণৰ নিষেধাজ্ঞা বা ব্লক কেৱলমাত্ৰ সেই নিৰ্দিষ্ট দেশ বা এলেকাতেই সীমাবদ্ধ থাকিব৷ তাৰ চৰকাৰ বা আইনী কৰ্তৃপক্ষই এই নিৰ্দেশ দিছে অথবা য’ত একাউণ্টটোৰ কনটেণ্টে স্থানীয় আইন ভংগ কৰিছে৷

বেকাৰ তৰুণ তৰুণীসকলৰ একাংশই পইতাচোৰাৰ দৰে আচৰণ কৰিবলৈ লৈছে বুলি ১৫ মেত এক মন্তব্য কৰিছিল দেশৰ মুখ্য ন্যায়াধীশ সূৰ্যকান্তই৷ ছুপ্ৰিম কৰ্টৰ মুখ্য ন্যায়াধীশৰ এই মন্তব্যৰ প্ৰতিক্ৰিয়াস্বৰূপেই ককৰ’চ জনতা পাৰ্টীৰ যাত্ৰা আৰম্ভ হয় সামাজিক মাধ্যমত৷ জেন জিৰ মাজত বিপুল জনপ্ৰিয় হৈ পৰে এই ভাৰ্চুৱেল মঞ্চ৷ বিগত পাঁচ দিনত ইনষ্টাগ্ৰামত এই মঞ্চৰ ফলৱাৰ্ছৰ সংখ্যা হৈছে ১৪ মিলিয়ন৷ যি বিজেপিতকৈ প্ৰায় ৫০ লাখ বেছি৷

এই ব্যঙ্গাত্মক মঞ্চৰ নেপথ্যত আছে ৩০ বছৰীয়া এজন যুৱক অভিজিৎ দীপক৷ তেওঁ বৰ্তমান আমেৰিকাৰ বষ্টন বিশ্ববিদ্যালয়ৰ জনসংযোগকল লৈ স্নাতকোত্তৰৰ পঢ়াশুনা কৰিছে৷ ইয়াৰ পূৰ্বে তেওঁ ২০২০ৰ পৰা ২০২৩ চনৰ ভিতৰত আম আদমী পাৰ্টীৰ সামাজিকমাধ্যম শাখাৰ সৈতে যুক্ত আছিল অভিজিৎ৷ তেওঁ জনাইছে যে দেশৰ যুৱসমাজৰ ভাৱনা, তেওঁলোকৰ প্ৰতিবাদ তুলি ধৰোতেই নতুন প্লেটফৰ্ম গঢ়াৰ ভাৱনা মনলৈ আহে তেওঁ৷

বিভিন্ন সংবাদমাধ্যমক দিয়া সাক্ষাৎকাৰত অভিজিতে কৈছে, ‘সন্মানীয় মুখ্য ন্যায়াধীশৰ মন্তব্যৰ বিৰুদ্ধে কমবয়সীয়া যুৱসমাজৰ প্ৰতিবাদী কণ্ঠ তুলি ধৰিব জনতা পাৰ্টীয়ে৷ মুখ্য ন্যায়াধীশে সংবিধান, বাক স্বাধীনতাৰ ৰক্ষক৷ তেওঁৰ পৰা এনে মন্তব্য কাম্য নহয়৷ কমবয়সীয়া যুৱসমাজক সমালোচনা কৰিবলৈ এইধৰণৰ বাক্য ব্যৱহাৰ কৰাটো উচিত নহয়৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ